3
Ham anohak in Anutu dôôvu hey
+ o 3:1 1Tes 5:25*Ke halingg-aso, sa naanêêl vu ham naambe, ham anohak in Anutu dôôvu hey-ande Omaaho Bop-ate vakasin na nohvu taaku pin pavis-ambe hil pin gako jak naambe sen ham bôôy-ato. Hil ngeeyaata me-lawii-having Anutu le, om ham oo anohak vu Anutu in gilin hey in hil anipaya osin hil sen dawiing va danjeen-ato. + o 3:3 1Tes 5:24*Lemu Omaaho Bop-ame le gavuuh ham e, nganjo le kaandu ham-ande ganggin ham in nambe omaaho nipaya Saalang-ame daandiiy ham e. + o 3:4 2Ko 7:16; Gal 5:10; 1Tes 4:10*Omaaho Bop vêêl hey akangg ak, om hey aawii-having nambe va pin sen hey aanêêl vu ham nambe ham ambiing-ato ond ham nawiing, tonde ham oo le monambiing.
Hey aawiingin nambe Omaaho Bop gatongin ham alompayo be ham akam oo monambu Anutu-te ahe havingin, be ham baale niwêêk naambe sen Kalisi naale niwêêk-ambe vaaku nimeen-ato.
Hil pin oo lambiing kul
+ o 3:6 Mat 18:17; Lom 16:17*Halingg-aso, hey naanêêl vu ham jak yate Omaaho Bop Yesu Kalisi haale naambe ham ganggin ham in omaaho ango sen nind baya kul-ande me-davu taamuyin tanasin sen hey naanêêl vu ham-ato le. + o 3:7 Pil 3:17; 1Tes 1:6*Ham oo alak ni nambe ham sapa hôôk hey vahangg ond mem nivasa, in hey nando having ham-ato ond hey-ame nando malis e. + o 3:8 1Tes 2:9*Hey-ame hako vanôôn ayuuh ame malis hôôk ham namam e, yik hey oo vaanggo, de hey oo aawiing kul aniwêêk lak hey namangg langaah-ande busin in nambe hey-ame aambu kul bopaata vu ham e. + o 3:9 1Ko 9:4; 1Tes 1:6*Hey aawiing nambêênjo, ond me-nambe sen hey haalengg ma om ham-ame ambaat hey e, malis, nganjo hey aawiing in nambe ham angge be ham taamuyin. 10  + o 3:10 1Tes 4:11*De hey nando having ham ond hey aanêêl vakasin vu ham nambe omaaho ti nambe me-biing kul e, ond me-ja vanôôn e. 11  + o 3:11 1Ti 5:13*Lemu gêên hey hangoyin-ande hamate hil vaalu me-dawiing kul ti le, yoo deep paling amu, de sil oo mondakaas in hil ango-te va yuuh ame. 12  + o 3:12 1Tes 4:11*Hil nambêênja hey naanêêl tanasin vu sil jak Omaaho Bop Yesu Kalisi haale naambe sil mando nivasa de lambiing kul osin niwêêk in yoo daatovu silate vanôôn nivalok.
13  + o 3:13 Gal 6:9*Lemu halingg-aso, ham oo ambiing va nivasa jak busin pin, de ham-ame nimtambo jak e. 14  + o 3:14 1Ko 5:9,11*De naambe omaaho ti nanye doos in vakasin sen hey kaavu lokaneep hôôk kaapiyaa-jo, ond ham oo anjak ni de ham-ame bakaas gaving yi le, ond mem le ninaamum in va sen wiing-anjuuto. 15  + o 3:15 1Tes 5:14*Lemu ham-ame angge yi paya lôôt e, nganjo ham ambu kôôvu yi naambe sen ham navu kôôvu ham halim keen-ato.
Vakasin ahus
16  + o 3:16 1Tes 5:23*Ham mando nivasa me ham mando osin nimeen ayuuh ame, ond Omaaho Bop sen vakasin melaas danggakook-ato yoo bu yite vakasin melaas naas mando gaving ham jak busin pin. Ke, om Omaaho Bop mando gaving ham pin.
17  + o 3:17 1Ko 16:21*Sa Pol, yik soo namangg kaavu vakasin ahus dakaa-jo be sa lavangg hôôk ham. Sate kaapiya pin ond yoo ni nambêênjo pin, soo navu kaavu nambêênjo pin.
18 Yik vakasin lung laa-ja. Yate Omaaho Bop Yesu Kalisi-te samu samu naas mando gaving ham pin.