Metiu
Lagale Lavavang At Ne Iesu Karisito
Metiu Ga Malagan I
Metiu Ga Malagan I
Levelinga Loklox Axasep
Lamaares 58 A.D.
Metiu neni lara atnedi lasangaun mi legepura lavaun pinivu at ne Iesu, lara laasen bok teren ne Levi. Neni laradi loklok ka pilas at lagavaman boro Rom. Melemu ne Iesu ga soxolik ka i la ni ga ravasu ngan lun pinivu ren. Metiu ga malagan i na lubuk ti lubung mixin mokmokso ren me Judaia. At laaleng ne Metiu ga malagan na lubuk limixin me Judaia diga doma i do ne Moroa na soxolik ka soso mun laradi naba vot kusu neni na lok ngan Loorong Silok atdi. At lavapaase Ibru diga so asen i mi la Mesaia (Lanarong), la at lavapaase Grik diga so asen i mi ne Karisito. Luvuttadi amgomgo at limixin me Judaia di goxoklen i do ne Iesu ga vot ngan Lanarong. Metiu ga vara i xusu na lox asuusu i ridi do ne Iesu neni Lanarong tuturun la Loorong Silok at leme Judaia, kuren la neni ga paase mumu ne Iesu ga vot kerepmo, i ngan Loorong Silok. Ne Metiu ga malagan li bok lentaba levelinga boro at Lovoang Kaala migomgo atdi mumu Lanarong at ne Moroa. At na levelinga ga sooxos at lovotpot at Lanarong.
Lengkot silok keneng at na lubuk
1:1–2:23 Diga visik ne Iesu.
3:1-12 Jon laradi sep susu ga gugu.
3:13–4:11 Satan ga lok tong pen ne Iesu.
4:12–18:35 Iesu gat pas tangtagap la ga vavang to Galili.
19:1–20:34 Iesu gat pas uto Jerusalem.
21:1–25:46 Lempanga salai ne Iesu ga lox i ro Jerusalem.
26:1–27:66 Larangtanga alis la lanmet at ne Iesu.
28:1-20 Iesu ga roo xat basinge lanmet.
1
Leretere Ri Lavalabat
At Ne Iesu
At Ne Iesu
(Lu 3:23-38)
1 *1 Let 17:11; Lur 22:18Anai ni leretere ri levenasen at lavalabat at ne Iesu Karisito, neni livisik li at ne Devit, la ne Devit neni livisik li at ne Abaram. 2 Abaram neni temen ne Aisak; Aisak neni temen ne Jakop; Jakop neni temen ne Juda eburu mi luvutneton; 3 *Lur 38:29-30; Rut 4:18-22Juda neni temen ne Peres mi ne Sara. (Nenen du laasen teren ne Tema); Peres neni temen ne Esron; Esron neni temen ne Ram; 4 Ram neni temen ne Aminadap; Aminadap neni temen ne Nason; Nason neni temen ne Salmon; 5 *Rut 4:13-17Salmon neni temen ne Boas (Raap neni nenen); Boas neni temen ne Obet (Rut neni nenen); Obet neni temen ne Jesi. 6 *2 Sml 12:24Jesi neni temen ne Devit, loorong.
Devit neni temen ne Solomon (nenen ni latkin at ne Uraia); 7 Solomon neni temen ne Roboam; Roboam neni temen ne Abaisa; Abaisa neni temen ne Asa; 8 Asa neni temen ne Josepat; Josepat neni temen ne Joram; Joram neni temen ne Usaia; 9 Usaia neni temen ne Jotam; Jotam neni temen ne Eas; Eas neni temen ne Esekia; 10 Esekia neni temen ne Manase; Manase neni temen ne Amon; Amon neni temen ne Josaia; 11 *2 Lav 24:14-15; 2 Let 36:10; Jer 27:20Josaia neni temen ne Jekonia eburu mi luvutneton. Ap mo levenaleng limixin esep boro Babilon diga lok ka limixin me Israel uto Babilon ti loxokoxo.
12 *Esr 3:2Melemu at nai, ne Jekonia neni temen ne Salatiel; Salatiel neni temen ne Serababel; 13 Serababel neni temen ne Abiut; Abiut neni temen ne Eliakim; Eliakim neni temen ne Aso; 14 Aso neni temen ne Sadok; Sadok neni temen ne Akim; Akim neni temen ne Eliuda. 15 Eliuda neni temen ne Eliasa; Eliasa neni temen ne Matan; Matan neni temen ne Jakop; 16 Jakop neni temen ne Josep, latlok at ne Maria, nenen ne Iesu, ga ruuna ka laasen do Lanarong.
17 Kuren la ga ruka i at ne Abaram la uto at ne Devit ga epovo at lasangaun mi lavanuet lavaola. La ga ruka i at ne Devit ga se leme Babilon diga lok ka limixin me Israel uto Babilon ga epovo at lasangaun mi lavanuet lavaola. La ga ruka i melemu at loxokoxo at limixin me Israel uto Babilon la ga se at livipisik at Lanarong ga epovo at lasangaun mi lavanuet lavaola.
Livipisik At Ne Iesu Karisito
(Lu 2:1-7)
18 *Lu 1:27,35Anai ni leretere ri livipisik at ne Iesu Karisito. Maria, nenen ne Iesu diga ora ka i xusu latkin ti ne Josep, ketla kovisi du goxo epot, Maria ga long lenget ka i do neni mo ga balan madak mi lolos at Loroonan Kaala. 19 Ne Josep, latlok teren, neni lagale laradi la ga mumu asu avukat Laulis Linga at ne Moses. Ga lok lodoxoma ren kusu na ke xepe ne Maria. Ketla neni goxo vara i xusu na lox amangan i ro at lemeren limixin axap. Neni ga lok do na lok kepe nemnem mene i.
20 Josep gam doma mumu i na la at lara laxanimin laangelo at ne Moroa ga vot saparav i at loromtobo la ga lok, “Josep. Livisik li at ne Devit. Nemen gat uta marat kusu una lok ka ne Maria ngan latkin tu, mila mo labalan madak neni i ruuna i, neni at Loroonan Kaala. 21 *Lu 1:31; 2:21Neni naba visik lamdak temes la una so asen i mi ne Iesu, (Lavasuun teren do laradi loklox arooro) mila neni naba lox arooro limixin teren basinge laxakapmek atdi.”
22 Ana lempanga axap ga vot kusu ti lox asoorun levelinga at ne Moroa ga ravasu at lungusno at leeme vapaase ali ren, ga lok keretna,
23 “Tatkin maxat naba balan madak la naba visik tamdak temes la dinaba so asen i mi ne Emanuel.” Ais 7:14
Lavasuun teren do, “Moroa eburu midik.”
24 La ne Josep ga xatu kaxat ap mo laaleng petpes la ga mu asu levelinga at laangelo at Leeme Silok ne Moroa, la ni ga epot ka ne Maria. 25 *Lu 2:7,21Ketla neni goxo midi eburu mi ne Maria, se neni ga visik lamdak teren. La ne Josep ga so asen i mi ne Iesu.