111
Leemi Asu Ri Leeme Silok
Leeme asu ri Leeme Silok.
Anaba tong avukat ti Leeme Silok mi labalak axap kantubu at lovotpot buru at limixin manmanton teren. Leven gugu at Leeme Silok i nunuan aleng, la limixin axap di lok momo min, dim doma solo i. La lempanga neni i lox i, i lox aurut laasen kaala ren la i lox asuusu lolos silok teren. La loklok manmanton teren naba nemen lexen.
Neni ira lok pam nedik kusu atabam doma amisik mo lempanga nunuan neni ik lox i. Leeme Silok neni ik lox anare ka limixin la i umsu mi lebelen tuntun tidi. Neni mun im taba leveluxa, tinedi dim taba asinorong i. La neni im doma amisik lekabus neni ga lok pam i eburu mi limixin teren. Neni ira vaxase vam limixin teren mi lolos at leven gugu ren keretna. Ni ga raba nedi limixin teren mi levennep kangka at levenabung mixin petpes.
Leven gugu axap at lukngen i nunuan la ik mokso. La kopmen taxaxarang keneng at Laulis Linga ren. Laulis Linga naba nemen lexen, mila mo levelinga ga laa boro at Leeme Silok la i ruturun la in manton tino. Neni xusuk mun Laradi Loklox Asepmus ti limixin teren, la ga vaxaxis aulis mo lekabus teren kusu naba nemen amisik. La laasen mun teren i melemelengan la i silok aleng. 10 Loklox asinorong ti Leeme Silok, neni lurutu kaxat ti levendomdoma nunuan. La im taba lodoxoma mokmokso rinedi ding tonga res at levempapaase ali ren.
Leemi asu rin naba nemen amisik la kopmen tekavaxap teren.