Rom
Lovoang At Ne Pol Ti Limixin Nunu to Rom
Levelinga Loklox Axasep
Lamaares 58 A.D.
Anai ni lovoang at ne Pol ga malagan i rinedi limixin nunu diga nemen to Rom. Pol gak lok to Korin la ni ga malagan na lovoang, la melemu neni ga raba lara loono min, laasen teren ne Poebe. Neni ga xip ka na lovoang uto at lemenemen silok Rom gak lok at lenep silok Itali. Ap mo levenmaares lara laradi mo gat kis sisilok ti limixin to Rom diga so asen i do ne Kaisar. Amo lemenemen ni lemenemen silok.
Pol ga vara i xusu na lox ase dik do nedik axap limixin ata gara xapmek pam at lemeren ne Moroa, la ixo epovo do nedik ataban manton at leven gugu atdik kopla leveloklok nunuan atdik. Mo dola nedik ata nunu mene at ne Iesu Karisito, Moroa naba lox asepmus nedik basinge laxakapmek atdik la neni naba doxoma xepe laxapmek atdik. Pol ga vara i xusu neni nat pas uto Rom la nak lok go mi levempavang teren. Mo limixin nunu lentaba atnedi, boro Judaia la lentaba atnedi, nedi limixin Grik.
Lengkot silok keneng at na lovoang
1:1-17 Lavasuun teren la ne Pol ga malagan i na lovoang.
1:18–3:20 Kopmen teta naba lok ka lorooro avolo mi lolos axa ren.
3:21–4:25 Lavatturunen ti lok ka lorooro avolo ni lununu mun.
5:1–8:39 Lixitkis la lavatpas atnedi di lok ka lorooro maxat.
9:1–11:36 Moroa naba ro ka amu manga limixin me Israel.
12:1–15:13 Lorooro at laradi nunu.
15:14–16:27 Lavapaase momo la levelinga loklox axap.
1
Lavapaase Axasep
* Gu 9:15; 13:2; Ga 1:15Nenia ne Pol, lasaxaruki at ne Iesu Karisito, la nia lun pavang. Moroa ga soxolik ka ia la ga ro ka ia xusu ana vavang mi Lagale Lavavang teren. * Ro 16:25-26; Ta 1:2Na Lagale Lavavang ne Moroa ga vaase ali min ganoxa at levenngusno atdi lavaeme vapaase ali ren, la diga malagan li i xeneng at Lovoang Kaala, * Mt 22:42; Ro 9:5; 2 Ti 2:8mumu ne Nitna ni Leeme Silok atnedik ne Iesu Karisito. Ni ga nemen ngan laradi mede at na lavatbung menemen, diga visik ka i at livipisik li at ne Devit. * Gu 13:33Ti loklok teren gan manton tino, ne Iesu ga lok kaka laasen do Nitna ne Moroa at loxonaleng ni ga roo xat amlong basinge lanmet mi langsangan lolos teren. * Gu 26:16-18; Ro 15:18; Ga 2:7-9Keneng mun at ne Iesu la ti lox aurut laasen teren, Moroa ga raba ia mi letaba nabalamu ren kusu nia ana ru katling i ri lok lugugu ngan laradi vavang at ne Karisito. La ana sasar asu ka limixin boro xamang at limixin kopmen di me Judaia, kusu dinaba nunu ren la dinang tonga res teren. La nemi bok limixin dom Rom, ne Moroa gara ro xaka vam nimi ri ne Iesu Karisito.
* Kex 6:25-26; 1 Ko 1:2; 2 Ko 1:1; Ep 1:2Nia a malagan na levelinga rinemi axap mi nemen dom Rom. Moroa i balamu nimi la ga ro xaka nimi do nemi limixin axa ren.
Letaba nabalamu la lenmila rinimi boro at ne Moroa ne Temen nedik, la Leeme Silok ne Iesu Karisito.
Lisingising Ti Tong Loklox Avukat
* 1 Ts 1:8Avot be, nia a tong loklox avukat ti ne Moroa rak keneng at ne Iesu Karisito rinemi axap, atla limixin at lengkot axap at na lavatbung menemen di ronga levelinga mumu nom lununu atnemi. * Ep 1:16; Pl 1:8; 1 Ts 2:5,10Moroa nia a gugu rin mi lorooro axap tarak, la nia a vavang mi Lagale Lavavang at ne Nitna. Neni iklen i do na levelinga rak i ruturun aleng do nia am doma amisik nimi, 10  * Gu 19:21; Ro 15:23,32keneng at levesingising tarak at levenaleng axap. Nia a ngising ne Moroa dola lodoxoma ren kuren, neni naba suang langas tia xusu anaba vot saparap tinotno ba nimi dom.
11 Nia a vara aleng i do nia anaba ven nimi la ana raba nimi mi leveloklok tooro at Loroonan at ne Moroa ri lox alolos nimi. 12 Nia a doma i do dik atanaba elok tooro ela. Nemi minaba lox alolos ia mumu lununu atnemi la nenia anaba lox alolos nemi mumu lununu rak. 13  * Gu 19:21; Jo 15:16Luvutnetak mi luvurinuk. Nia a vara i do mina xasep nunuan. Buaang laxanaleng nia agam doma i do anat pot pasa nimi, ketla lentaba lempanga ga tupe ia. Nia a vara i xusu ana vavang dom atnemi xusu teventaba dinaba nunu bok, kerekngan ia aga lox i ro at lengkot petpes kantubu at limixin kopmen di me Judaia.
14 Nia a ruuna lugugu silok anaba lox i ri limixin axap, ti leme Grik la tinedi bok limixin petpes, ti limixin akleklen la tinedi bok kopmen takleklen solo atnedi. 15 Kuren la lodoxoma rak iplivi aleng, kusu ana vavang tinemi bok limixin mi nemen dom Rom.
Lolos At Lagale Lavavang
16  * Sam 119:46; Mk 8:38; 1 Ko 1:18-24; Gu 13:46Nia xopmen ana lok mamangan ti vavang mi Lagale Lavavang, atla ni lolos at ne Moroa ri lox arooro nedi axap di nunu, leme Judaia avot la melemu rinedi limixin kopmen di me Judaia. 17  * Ro 3:21-22Atla Lagale Lavavang i lox asuusu i do ne Moroa ik lox anmanton limixin mi legesa ngas mene nga, neni lununu la kopmen tangas petpes bok ba, kerekngan Lovoang Kaala i tong i xeretna,
“Laradi ip sep sogo at ne Moroa mi lununu ren, ni naba roo su.” Abk 2:4
Loklok Kakapmek At Limixin
18  * Ep 5:6; Kl 3:6; 2 Ts 2:12Moroa ira lox axasep pam i ri limixin axap dola neni ixot kis epen mi leveloklok kakapmek at limixin, atla nom loklok kakapmek atnedi i sasar angtang kaka di basinge luruturun at ne Moroa. Kuren la ni naba lox asi nom lebelemamao ren ti sev asongot di. 19  * Gu 14:15-17; 17:24-28Moroa i lox asongot di atla di xasep nunuan pam ap mo leveloklok teren ni i lox axasep di min. Moroa xa i lox axasep di min, 20  * Jop 12:7-9; Sam 19:1; Ib 11:3ga ru xaka i gano ne Moroa ga rudum li na lavatbung menemen, mo loklok eburu mi lolos lexen teren i nemen amisik. Limixin kopmen dina epovo na ven mo lolos eburu mi loklok teren, ketla di ven kakasep kaka i at levempanga ne Moroa ga rudum li i. Kuren la kopmen tevelinga atdi ri lox asepsu di basinge lebelemamao at ne Moroa.
21  * Ep 4:17-18Digaklen ne Moroa, ketla digoxo emi asu min kopla digita tong loklox avukat tin. Levendoxoma atnedi ga rebonot axap, la levendoxoma rangtangku atnedi ga umsu mi lubuxumin. 22  * Jer 10:14; 1 Ko 1:20Diga lok do nedi luvuttadi leklen. Ketla xopmen, nedi luvuttadi baulang mene. 23  * Lal 4:15-19; Sam 106:20Kopmen di goxo lotu saparap ne Moroa ruturun i rooro amisik. Ketla diga lotu saparap laxampoovo at luvuttadi mede xopok, la lavapixa eburu mi levempanga dit pas mi lavanuet kangkedek, kopla lempanga ngan laxangkavu.
24  * Gu 14:16Mo limixin digang tangku xerepmo, kuren la ne Moroa ga ke xepe di ri lok leveloklok kakapmek maxamang at lixitkis epot ngan diga vavara rin. La i lok ngan bok pam nedi eburu diga lok lengkot mamangan la diga lox abilinga labantuxu atdi. 25  * Jer 13:25; 16:19; Ro 9:5Diga lox ekun luruturun at ne Moroa mi laxaxarang. Diga lotu saparap levempanga ne Moroa ga rudum li i, la diga domampe laradi runtudum kusu dina lotu saparav i. Leemi asu amisik tin la kopmen tekavaxap teren. Tuturun.
26 Limixin diga lox asu i mo loklok, kuren la ne Moroa ga ke xepe di ri mo leveloklok i lox asuusu langsangan lainmangan. Lavakin bok diga velongka, na ixo epovo do dina lox i. 27  * Mas 18:22; 20:13; 1 Ko 6:9La lavatlok bok kuren di goxopara nak midi eburu mi lavakin, la levendoxoma atnedi ga ngaongao xa ridi. Lavatlok diga lok levempanga mun mamangan, kuren la livipisik teren do diga ruuna ka levesongsongot ga epovo mi nom loklok kakapmek atnedi.
28 La limixin di goxopara i do dinam tebeng lakleklen tuturun mumu ne Moroa. Kuren la ni ga ke xepe di ri mumu asu levendoxoma atdi xa i ekarakat, kerepmo la dik lok levempanga ixo epovo do dina lox i. 29 Di umsu mi laxanasen kakapmek axap, i ngan lodoxoma xapmek, loklok ti belegaao, la loklok kakapmek maxamang at lixitkis epot. Lorooro atdi i umsu mi loklok ngaongao ri lempanga at lentaba vetpes, di esev amet, di esep, di lok levenekarakat, di babala vukpuk, di doma xakapmek amisik ti leventaba vetpes, la di tere mumu.
30 Di lox asi limixin mi levelinga, di belengatngas ti ne Moroa, di ekilu, dim simi di la dit las di, la di doma xaka bok leventaangas petpes ti lok laxakapmek, kopmen dina ronga res at luvuttemen di mi luvutnen di. 31 Kopmen dina ruuna tevendoxoma avukat, kopmen dina doma xatling levelinga atnedi, la kopmen dina lox asuusu labalamu ela, la loxokok ti lemet atdi. 32 Diklen i do Laulis Linga at ne Moroa i tong i do limixin di mumu asu na leventaangas, dinaba seeve. Ketla move dik lok na leventaangas la di momo mun midi limixin petpes ua di lok mo langas.

*1:1: Gu 9:15; 13:2; Ga 1:15

*1:2: Ro 16:25-26; Ta 1:2

*1:3: Mt 22:42; Ro 9:5; 2 Ti 2:8

*1:4: Gu 13:33

*1:5: Gu 26:16-18; Ro 15:18; Ga 2:7-9

*1:7: Kex 6:25-26; 1 Ko 1:2; 2 Ko 1:1; Ep 1:2

*1:8: 1 Ts 1:8

*1:9: Ep 1:16; Pl 1:8; 1 Ts 2:5,10

*1:10: Gu 19:21; Ro 15:23,32

*1:13: Gu 19:21; Jo 15:16

*1:16: Sam 119:46; Mk 8:38; 1 Ko 1:18-24; Gu 13:46

*1:17: Ro 3:21-22

*1:18: Ep 5:6; Kl 3:6; 2 Ts 2:12

*1:19: Gu 14:15-17; 17:24-28

*1:20: Jop 12:7-9; Sam 19:1; Ib 11:3

*1:21: Ep 4:17-18

*1:22: Jer 10:14; 1 Ko 1:20

*1:23: Lal 4:15-19; Sam 106:20

*1:24: Gu 14:16

*1:25: Jer 13:25; 16:19; Ro 9:5

*1:27: Mas 18:22; 20:13; 1 Ko 6:9