24
Merere ni king zaanaŋana ta iur koroŋ ta boozomen
Mboe ki Dabit
1 Toono ramaki koroŋ boozomen ta timbotmbot pa na, katuunu ta Yooba.
Lele ta boozomen mi kan tomtom bizin, ina ni kini men. ✡Mbo 50:12, 89:11; 1Kor 10:26
2 Pa ni ta iur toono ma imbot se yok ŋwaana.
Mi iparaama toono mbule tuunu ma tuŋ sula kat ta tai leleene a. ✡Un 1:6; 2Pe 3:5
3 Asiŋ ta irao be isala pa abal ki Yooba mi isuŋ pini?
Mi tomtom pareiŋana ta irao be ilela urum kini potomŋana mi imender su kereene uunu? Ina tomtom ta kembei: ✡Mbo 15:1
4 Ni ikam ŋoobo mbulu sa som. Mi leleene ma ŋgar kini na, iŋgeeze men.
Mi imbesmbeeze pa koroŋ pakaamŋan som,
mi ipombolmbol sua pakaamŋana som.
Tomtom ta kembei, ni ko irao be ilela. ✡Kam 20:16; Mbo 51:10; Mt 5:8
5 Mi Yooba ko ikampe i.
Anutu ta ulaaŋa kini na, ko ikamke i ma imbot ambai, mi ipaati be tomtom ndeeŋeŋana.
6 Tana zin wal ta kembena, ta tikam kinkiini be tiute Merere mi timbot kolouŋana pini.
Anutu ki Yakop, ina zin wal ta kembena ta timama kerem uunu.
7 O niom kataama ta boozomen, niyom ise mi kakaaga ma biibi.
Niom kataama aliŋgumoraŋoyom na, kakaaga ma itaanda kat.
Naso king zaanaŋana zalaana be imar ma iloondo piom. *Re 2 Samuel 6:1-19. Sua Mbukŋana Ka Koror ta muŋgu imbot lela beeze ki Merere mi zin Israel tiziŋziŋ pa lele bilimŋana na, zin tire kembei Anutu itunu imbotmbot raama. Tana indeeŋe ta tisiŋ koror tana ma tilela pa Yerusalem na, tikam ŋgar kembei Anutu itunu ilela kar Yerusalem. ✡Mt 21:5; 1Kor 2:8
8 Lak, king zaanaŋana, ni asiŋ?
Ni Yooba tau!
Ni mbura keskeezeŋana mi mbolkeŋkeŋŋana.
Mi ni irao kat pa malmal. Pa namaana alalalŋana tau. ✡Kam 15:3+
9 O niom kataama ta boozomen, niyom ise mi kakaaga ma biibi.
Niom kataama aliŋgumoraŋoyom na, kakaaga ma itaanda kat.
Naso king zaanaŋana zalaana be imar ma iloondo piom.
10 Lak, king zaanaŋana, ni asiŋ?
Ni Yooba tau.
Ni mbura keskeezeŋana mi king zaanaŋana!
✡24:1: Mbo 50:12, 89:11; 1Kor 10:26
✡24:4: Kam 20:16; Mbo 51:10; Mt 5:8
*24:7: Re 2 Samuel 6:1-19. Sua Mbukŋana Ka Koror ta muŋgu imbot lela beeze ki Merere mi zin Israel tiziŋziŋ pa lele bilimŋana na, zin tire kembei Anutu itunu imbotmbot raama. Tana indeeŋe ta tisiŋ koror tana ma tilela pa Yerusalem na, tikam ŋgar kembei Anutu itunu ilela kar Yerusalem.