53
Wal kankaanaŋan ta tizorzooro Anutu
Mboe ki Dabit
Wal kankaanaŋan ta tizorzooro Anutu na, tiso pa zitun ta kembei: “Anutu sa som.”
Wal ta kembei, ŋgar kizin isaana kek. Mi tiyo naman pa mbulu sananŋan boozomen. Tana Anutu leleene pizin risa som kat.
Pa kizin tasa ikam mbulu ambaiŋana sa som. Mbo 10:4, 14:1+
 
Anutu imbotmbot saamba, mi irre su pizin tomtom mi itirtiiri zin.
Ko kizin tasa le ŋgar ambaiŋana,
mi ikam kinkiini be iute Anutu mi imbot kolouŋana pini?
Mi som. Timap ma tizem zaala kini kek. Tisaana lup.
Kizin tasa ikam mbulu ambaiŋana sa som. Som kat. Ro 3:10+; Ep 2:3
 
Tana Anutu iso: “Wal tau tikamam mbulu sananŋana i, ŋiizi na ŋgar kizin ipet?
Gorgori tipasansaana zin wal tio. Pa tipakamkaam zin, mi timbotmbot se kizin.
Mi matan iŋgalŋgal yo som, mi tizuŋzuŋ pio som.”
 
Kere koyom koi bizin ta timaŋga mi tiso tikam malmal piom na!
Muŋgu timoto som.
Mi iŋga Anutu ipasaana zin, mi igibgiibi tirontiron ma timbot leŋaleŋa.
Tana motoŋana biibi ikam zin ma tisaana kat.
Mi niom kilip pizin mi kapamiaŋ zin. Pa Anutu, ni ipizil kat ndemeene pizin.
 
Mi nio na, leleŋ ilip kat be aŋre ulaaŋa ta imbot abal Sion a imar ma ikamke zin Israel!
Mi sombe Anutu iurpe wal kini ma timbot ndabok mini,
nako lelen ambai mi menmeen zin kat. Mt 1:21; Ro 11:26

53:1: Mbo 10:4, 14:1+

53:3: Ro 3:10+; Ep 2:3

53:6: Mt 1:21; Ro 11:26