1 Yooba, ni king biibi ŋonoono ta ikamam peeze pa koroŋ ta munŋaana men.

Tana niom tomtom ta karao pa toono ta boozomen na, leleyom ambai.

Mi niom mutumutu ta munŋaana men ta karao pa tai na, menmeen yom. ✡Kam 15:18; Mbo 93:1

2 Yooba isombe iswe itunu, na imbotmbot lela miiri tieene gabgapŋana mi imar.

Peeze kini, ina imender se mbulu kini ndeeŋeŋana.

Pa ni imendernder pizin tomtom mi iurpewe pataŋana kizin. ✡Kam 19:16+

3 You kini imuŋmuuŋgu pini,

mi ikanan ka koi bizin ma timap lup.

4 Ni ikamam ma lele ikimitmit, mi lolo kini iwenweene.

Tabe toono ire, to itortoori kembei moori ta ikamam be ipeebe i.

5 Yooba, ni biibi ta imborro toono ta boozomen.

Sombe imar igarau na, you kini inenne zin abal ma tirereere kembei ta yok ma tila len. ✡Mbo 46:2,6

6 Koroŋ ta timbotmbot sala maŋaanaŋana na, tizzoyaryaara mbulu kini ndeeŋeŋana.

Mi karkari ta boozomen tire mburaana mi mbulu kini ndabokbokŋan ta zaana biibi pa i.

7 Tana zin wal ta so timbesmbeeze pa merere pakaamŋan mi nin zze pa ke teeteŋan ta koroŋ ŋonoono som na, Yooba ikam zin ma kan miaŋ.

Pa mburaana ilip pa merere ta boozomen.

Tana wal tana merere kizin tilek kumbun pini tomini.

8 O Yooba, nu mendernder pizin tomtom mi uluulu zin pa pataŋana kizin.

Tana zin wal ki Sion tileŋ urum na, lelen ambai kat.

Mi kar ta boozomen ki Yudea menmeen zin.

9 Pa Yooba, nu ta Anutu kor kana kat. Nu mborro toono ta boozomen,

mi lip kat pa merere ta munŋaana men.

10 Niom wal ta kuur leleyom pa Yooba na, kuur koi pa mbulu sananŋana.

Pa wal kini ta tiurur lelen pini mi titoto mbulu kini na, ni iporoukalkaala zin, mi itatkewe zin la wal sananŋan naman.

11 Mi iurur mat pizin wal ndeeŋeŋan.

Mi zin wal ta lelen ŋgeezeŋan na, ni ikamam zin ma menmeen zin biibi.

12 O niom wal ndeeŋeŋoyom, menmeen yom pa Yooba!

Leleyom ambai pini mi kapakur zaana potomŋana! ✡Pil 4:21