Faulo ena leta nugweta me Tesalonaika ʼidia
Leta ana alamani weaqina
Taha ʼabaga agona ana wawa Tesalonaika diʼwe Masidonia ʼinaya. Ta Faulo ena luvivila ʼinaya mai ʼabaga nana ʼinaya ta Ieisu Valena lugaihiea ʼidia. ʼInega Ieisu ivetumaqanea ʼabo ʼekalesia iveʼalea. Faulo ena lugaihi weaqina me Diu ivevoalanea ʼinega dena tauya ʼabaga Belia ʼinaya. ʼAbibodanaya Faulo iana Timoti vetunea me Tesalonaika ʼidia sabi vayausidi, nuanuana nahalamani aqiaqiea maʼoda itoatoa ʼaiqa. Vayausidi gumwala ʼinega ʼevivi Faulo ʼinaya ta vematamagilafuyea taudi me Tesalonaika me edi vetumaqana aqiaqi itoatoa, ta wese veyoluba ʼavadi. ʼInega Faulo qaiawa weaqidi ta ena leta baʼe ʼwayavia nuanuana nagivewaiwaiedi, mana taudi wese vevoalana ilobea edi vetumaqana Ieisu ʼinaya weaqina. Ta wese nuanuana naveʼitedi Ieisu ena ʼevivi mai weaqina, mana vaidi toʼekalesia ivenuana magilafu tolaʼai naʼifoqe ʼaliʼaligidi be wese mayawaidi ʼidia mai nana ʼinaya.
Leta gamona
1:1 Vematamagilafu be venoqi
1:2–3:13 ʼAwahaqiaqi be awatubo
4:1-12 Vona waiwaina ilivu aqiaqi otaqina weaqina
4:13–5:11 Veʼita Ieisu Keliso ena ʼevivi mai weaqina
5:12-22 Faulo ena vebibina ʼebeluʼovoa ʼekalesia ʼinaya
5:23-28 Vona veyoluba be lukafoi
1
Vematamagilafu be lukaiwa
1 *Via 17:1 Leta baʼe yaʼa Faulo be Sailasa ta wese Timoti ʼimega waiwai omiʼa Tesalonaika ana toʼekalesiayavo ʼimia. Omiʼa Tamada Yaubada ta wese eda Kaiwabu Ieisu Keliso edi tomotauyavo. Avevenoqi weaqimi veyoluba ta wese nuadaumwala tuta qabuna naʼenoʼeno ʼimia.
Toʼekalesiayavo edi vetumaqana be edi ilivu weaqina
2 Tuta qabuna avevenoqi weaqimi Yaubada ʼinaya, ta ema venoqi nana ʼinaya ge ada luaʼu lukaiwa weaqimi. 3 *1Kol 13:13; Kol 1:4-6 Ta tuta nana avevenoqi weaqimi Yaubada matanaya ʼinega emi fewa emi vetumaqana vuaqina ʼinega be, emi viaqayavo veyolubega ta wese maʼoda emi luʼita vane Ieisu ena ʼevivi mai weaqina okafiʼiʼihia anuanua veʼavinia.
4 Emavo, niʼa ahalamania omiʼa Yaubada tawa veyolubemi ta wese venuaʼivinimi ena tomotauyavo ʼidewani. 5 *1Kol 2:4-5 Mana tuta nana Vale Aqiaqina amiea ʼimia ge ema vona namo ʼinega Vale nana oda ʼewei, ta ʼesi wese Niboana Gwalagwalana ena waiwaiega, e ʼinega Vale nana oʼawahaqiaqiea. Ta wese ema veilivu aqiaqi ʼimia niʼa oʼitedi, ta baʼe ilivu diavona ʼidiega niʼa oalamania vona diavona vonahaqiaqi. 6 *Via 17:5-9 Vonahaqiaqi, tuta nana Vale nana oʼewea ʼinega wese vaina vita maega olobedi, ta Vale nana Niboana Gwalagwalana ena qaiawa ʼinega oʼewea, e baʼe ʼinega imaʼa be wese eda Kaiwabu ovetutumema. 7 E baʼe ilivu nana ʼinega omiʼa oveʼebeʼita aqiaqi Keliso ana toʼabibodayavo itoatoa diʼwe Masidonia be Akaya ʼidia. 8 Vonahaqiaqi, eda Kaiwabu Valena tawa ʼimiega veqidua diʼwe Masidonia be Akaya ʼidia, ta wese omiʼa emi vetumaqana Yaubada ʼinaya Valena niʼa veʼenaʼi diʼwe qabuna ʼidia. ʼInegana todiʼwe ʼinaya atautauya ge wese taha tolaʼai tomotau ada vonedi emi vetumaqana weaqina, mana vale nana niʼa inoqolia. 9 Ta taudiega isimasimana maʼoda omiʼa lova oʼebeʼewa ʼaiqema, ta wese maʼoda onuagivila ʼaiqa emi tokwalui adi iwaʼodu ʼidiega, ta ʼesi Yaubada mayawaina ta aqiaqina ʼinaya oawafelemi ta ovetofewa weaqina. 10 Ta wese isimasimana emi lututa Yaubada Natuna Ieisu ena ʼevivi mai mahalega weaqina, tauna Yaubada giveyaʼitoto ʼeviviea ʼaligega. E baʼe Ieisu nana nawale naʼetoyavuida Yaubada ena gamohoqala ʼinega.