18
ʼAbaga Babiloni ena luveifa
1 ʼInega wese taha tovaleʼewa yaʼitea mahalega webuwebui mai. Tauna me ena luvine qiduana, ta wese ena simatalega bwaʼobwaʼo qabuna guvesimatalia. 2 *Ve 14:8; Ais 13:21; 34:11-14; Iel 50:39 Ta bonana qiduanega gaba vonaya,
“ʼAbaga qiduana Babiloni
niʼau luveifa otaqa!
Ta Seitani ena tofewayavo
be niboana luveifadi,
ta wese manu yubai ʼaliʼaligidi
adi toʼai niʼa iveʼabagea,
3 mana bwaʼobwaʼo ena diʼwe qabudi
ʼabaga nana ena ilivu luveifadi
be bwavubwavudi ana ʼoine ʼinega niʼa inuma.
Ta bwaʼobwaʼo ana toluvine qiduqiduadi
qabudi maega ivelamoʼeno kavokavovo,
mana ʼabaga nana kavona tokodada taha ʼidewani.
Ta ʼabaga nana ena vekaikaiwabu ʼinega
bwaʼobwaʼo ana tovegimwane qabudi
edi kaikaiwabu qiduadi niʼa ilobedi.”
4 *Ais 48:20; Iel 50:8; 51:6,45; 2Kol 6:17 ʼInega mahalega wese taha bona yanoqolia vonaya,
“Egu tomotauyavo,
omiʼa benaʼe ʼabaga nana ʼinega
ona ʼifoqe fole ena luveifana navaukamana ʼimia
be ana luvematasabu luveifa nana weaqina
wese omiʼa ona lobea.
5 *Nug 18:20-21; Iel 51:9 Mana ʼabaga nana ena luveifana veagovi vaneqa
kavona mahala ena vane ʼidewani,
ta ena ilivu luveifadi Yaubada ge danuafania.”
6 *Same 137:8; Iel 50:15,29; 2Te 1:6 Ta wese tovaleʼewa nana vonaya,
“ʼAbaga omoʼe tolaʼai niʼa viaqia ʼimia,
e omiʼa wese ʼedewana ona veʼia ʼaiqea,
ta ʼeguma tauna taha yani niʼa viaqia ʼimia,
e ʼinega ana veʼia magilafuna ona viaqia ʼinaya.
Tauna ena ʼoine luveifana ʼinega tomotau venumedi,
ta ʼeguma vedi ʼaidegana ʼinega venumedi,
e ʼinega omiʼa vedi magilafuna ʼinega ona venumea.
7 *Ais 47:7-9 Tauna ena kaikaiwabu agona
be wese ena qaiawa qiduana
niʼa lobea ena toa ʼinaya,
e ʼinega ena kaikaiwabu
ta ena qaiawa adi ʼetofwafwa ʼinega
ana veʼia ona neia visiqa be wese nuavita ʼidiega.
Mana taunega ena gagaha ʼinega vonaya,
‘Yaʼa kavona kwini yatoatoa,
ta ge wese ena vewadawadaʼe,
ta wese ge taha tuta ʼinaya
dou nage nuavita ena lobedi.’
8 *Ve 17:16 ʼInega taha ʼaubena ʼinaya vita taha taha
ina luveafei ina ʼifoqe ʼidewani dou be,
botana ta wese ʼaiwe ʼalaʼalaina naʼalaia.
Mana Kaiwabu Yaubada Tovewaiwai otaqa
vavine nana naluvinea ta ana veʼia naneia.”
9 *Isi 26:17; 27:30-35 “Ta bwaʼobwaʼo ana toluvine qiduqiduadi taudi vavine nana maega niʼa ivelamoʼeno kavokavovo ta wese iqaiawa kavokavovo ena kaikaiwabu weaqidi, e taudi ʼabaga nana weaqina ina duvoyavoya be ina dou mana niʼa ʼalaʼalaia ta ʼauna vanevane iʼitea. 10 Ta toluvine diavona me edi mwaniniva tufwana luluvaia ina tovolo ina ʼitea, ta ina vonaya,
‘Aioi! Aioi!
ʼAbaga qiduana ta waiwaina
Babiloni ana luvine lukwayavonega niʼa lobea!’
11 *Isi 27:36 “Ta wese bwaʼobwaʼo ana tovegimwaneavo ʼabaga nana weaqina ina nuavita ta ina dou, mana ge taha toga wese datoatoa be edi kulufa nagimwanedi, 12 *Isi 27:12-13,22 ʼedewani goula be, siliba be, dabo kaikaiwabudi be, bagi be, mwali be, kaleko sulu wadawadaeadi be, kaleko sulu kaikaiwabudi qimwaqimwalidi ta bweabweala otaqidi be, ʼaiwe meiladi aqiaqina be, dona qiduqiduadi be, dabo wadawadaeadi be, ʼaiwe adi maisa ʼenaʼina be, kainumu kofa ta ʼaeani be wese vaina kainumu namanamalidi. 13 Ta wese vane ʼidewani kemwata be, dedemusi be, keninitu be, kedimona be, dedeʼwa meiladi aqiaqina ʼidewani inisenisi be mulo be, ʼau meilana aqiaqina be, dedeʼwa ʼaiwe olibe vuaqina ʼinega be, ʼoine be, falawa witi be, bulumakau be, sifi be, osi be, waga lihilihi, ta wese edi tofewa kavovo ge taha toga nagimwanedi. Vonahaqiaqi, tovegimwane diavona tomotau ikafidi ta ʼabibodanaya ivegimwaneyedi tovekaikaiwabu ʼidia.
14 “ʼInega tovegimwane diavona ina gaba ʼabaga nana ʼinaya ina vonaya, Yani qabuna adi ʼita aqiaqi otaqidi eu ʼebenuaʼewa niʼa iawala. Ta kulufa kaikaiwabudi uawatubo aqiaqiedi ge wese una ʼita ʼeviviedi. 15 *Isi 27:31,36 Vonahaqiaqi, tovegimwane diavona edi kaikaiwabu qiduana ʼabaga nana ʼinega niʼa ilobedi, e taudi me edi mwaniniva ina tovolo luluvaiega ta ʼabaga nana ana luvematasabu waiwaina ina ʼitea. Ta me edi dou be wese me edi duvoyavoya ina vonaya,
16 *Ve 17:4 ‘Aioi! Aioi!
Oʼa ʼabaga qiduana lova iveʼivaliu
kaleko sulu adi maisa qiduana
wadawadaeadi be bweabweala otaqidi ʼidiega,
ta wese bagi viaviaqina goula
be dabo kaikaiwabudi ʼidiega,
17 *Ais 23:14; Isi 27:27-29 ta lukwayavonega eu kaikaiwabu diavona iawala.’
“Ta wese toniwaga be, waga ana tofewayavo be, togelu ta wese tomeqabu edi toa weaqina mane ilobelobedi edi fewa ʼinega mwadeʼwaya, e baʼe qabu diavona luluvaiega ina tovolo, 18 *Isi 27:32 ta ʼabaga nana ʼauna ina ʼitea ta ina ʼalabwau ina vonaya, ‘Lova ge taha ʼabaga ana ʼita aqiaqi otaqina omoʼe ʼabaga nana ʼidewani, ta baʼitagana maʼoda?’ 19 ʼInega edi nuavita ʼinega ʼunuʼunudi ʼinaya bwaʼobwaʼo fwayana ina aʼuya be ina dou qiduana ta ina vonaya,
‘Aioi! Aioi!
ʼAbaga qiduana veilaqe gegoyo niʼa lobea!
Omoʼe ʼabaga nana ʼinega
toniwaga qabudi edi kaikaiwabu ilobedi,
ta lukwayavonega edi kaikaiwabu diavona
iluveʼwaiva vataya.
20 *Ais 44:23; Luve 32:43; Iel 51:48 ʼInega totoa mahala ona qaiawa!
Omiʼa Yaubada ena tomotauyavo,
be ana tovesimasimanayavo
be ena tovaletuyanayavo qabumi ona qaiawa,
mana lova visiqa ʼabaga nana ʼinega olobea,
ta baʼitagana ena veilivu veifa ʼimia
weaqina Yaubada niʼa veʼiea.’ ”
21 *Iel 51:63-64; Isi 26:21 ʼInega Yaubada ena tovaleʼewa waiwaina taha dabo qidua vaʼinena silagaia inoqei webui mwadeʼwaya ta vonaya,
“ʼAbaga qiduana Babiloni una beʼu
baʼe dabo nana ʼedewana,
be ge wese taha toga naʼita ʼevivieu.
22 *Ais 24:8; Isi 26:13 ʼInega eu qaiawa nahawala,
mana ge taha wese ʼevosi nage ʼebelaha
ʼidewani afi be, loli be, sagali
ta wese bea ana muʼe naʼifoqe ʼiuyega.
Fewa taha taha adi toalamaniavo
ge wese ina toatoa ʼiuya,
ta wese witi ana ʼebememe
butuna ana noqola nahawala.
23 *Iel 7:34; 16:9; 25:10 Ta ge taha tuta wese odamu
edi simatala nasimatala ʼiuya.
Ta wese gebu tovaqi mevavinedi be meʼolotodi
bonadi qaiqaiawana naʼifoqe ʼiuyega.
Vonahaqiaqi, eu tovegimwaneavo bwaʼobwaʼo
ana tovegimwaneavo qabudi iveqidua vaʼinedi,
ta wese eu luʼafoʼa ʼinega diʼwe qabudi
ana totoayavo iuʼavedi.
24 *Iel 51:49; Ve 17:6 Ta wese Yaubada ena tovesimasimanayavo
taudi ena nuanua isimana ʼifoqeyedi uluveʼaligidi
ta sulalidi inoqa eu ʼedayavo ʼidia.
Vonahaqiaqi, oʼa eu nuanua ʼinega
Yaubada ena tomotauyavo iluveʼaligidi
bwaʼobwaʼo ena diʼwe qabudi ʼidia.”
*18:2: Ve 14:8; Ais 13:21; 34:11-14; Iel 50:39
*18:4: Ais 48:20; Iel 50:8; 51:6,45; 2Kol 6:17
*18:5: Nug 18:20-21; Iel 51:9
*18:6: Same 137:8; Iel 50:15,29; 2Te 1:6
*18:7: Ais 47:7-9
*18:9: Isi 26:17; 27:30-35
*18:11: Isi 27:36
*18:12: Isi 27:12-13,22
*18:15: Isi 27:31,36
*18:17: Ais 23:14; Isi 27:27-29
*18:18: Isi 27:32
*18:20: Ais 44:23; Luve 32:43; Iel 51:48
*18:21: Iel 51:63-64; Isi 26:21
*18:22: Ais 24:8; Isi 26:13
*18:23: Iel 7:34; 16:9; 25:10