16
Faulo ena lukaiwa enavo ʼidia
1 Nuanuagu ena vematamagilafuyemi novuda Foebi weaqina. Ta ona alamania novuda nana vavine aqiaqina Yaubada ena fewa ʼinaya, ʼinega yaʼawahaqiaqiea. Tauna ʼekalesia taha ana wawa Senikila ana dikoni. 2 Ta nuanuagu ona ʼebeʼewea itaʼa tovetumaqana eda ilivu ʼinega, mana tauna wese eda Kaiwabu ena tomotau taha. Ta ʼeguma taha yani ʼinega nakusa, e ʼinega ona ʼabivitea, mana tauna ʼevisa tomotau niʼa iuledi edi nuanua taha taha ʼidia, ta yaʼa wese iula qiduana niʼa yalobea ʼinega.
3 *Via 18:2 Nuanuagu Filisila ma moqanedi Akwila egu lukaiwa ona simanayea ʼidia. Lova magilafudina maega afewa Ieisu Keliso weaqina. 4 Vonahaqiaqi, vaina tuta veilaqe yalobea ta taudi tuta diavona ʼidia ge ida nogegu, ta ʼesi magilafudina iʼaliʼaliga ʼwaqi weaqigu. Ta ge agu ʼaidega eda lulukaiwa ʼidia edi iula weaqina, ta ʼesi taudi mali qabu edi ʼekalesia qabuna ʼinega wese ilulukaiwa ʼidia iula nana weaqina.
5 Ta wese egu vekaiwa ona simanea tovetumaqana qabudi ʼidia ivavaʼauta Filisila ma moqanedi edi vanuea.
Ta wese ia otaqigu Efenetusi egu lukaiwa ona vonea. Tauna diʼwe Eisia ʼinega maduvetumaqana Ieisu ʼinaya, ta ʼabiboda vaidi tomotau.
6 Novuda Meli egu lukaiwa ona simanea ʼinaya. Tauna vetafeʼwa waiwai omiʼa sabi iulami.
7 Ta wese egu tomotauyavo Anidokosi be Iunia egu lukaiwa ʼidia. Lova taudi vanue ʼebeyoqona ʼinaya maega atoa. Taudi adi ʼawahaqiaqi be adi ʼamayaba ilobelobea Ieisu ena tovaletuyanayavo qabudi ʼidiega. Magilafudina Keliso imaduvetumaqanea, ta ʼabiboda yaʼa.
8-9 Iagu Amifilatusi wese egu lukaiwa ona simanea ʼinaya. Iagu nana yaveyoluba aqiaqiea mana tauna wese Kaiwabu ena tomotau yaʼa ʼidewani.
Ta wese Ebanosi ona vekaiwa ʼinaya, tauna lova maega afewa ʼaidega Keliso weaqina.
Ta wese egu veyoluba ona simanea ia aqiaqigu Sitakisi ʼinaya.
10 Ta wese Afelesi egu lukaiwa ona simanea ʼinaya. Tauna ʼoloto aqiaqina, ta vita taha taha niʼa vebaedi ta ena vetumaqana ge danogei, e ʼinega Keliso ʼoloto nana ʼawahaqiaqiea.
Ta wese egu lukaiwa qiduana ona simanea tovetumaqanayavo qabudi ʼidia Alisitobulusi maega itoatoa ena vanuea.
11 Ta wese Elodioni egu lukaiwa ona simanea ʼinaya, tauna wese Diu ʼolotona ʼidewani yaʼa.
Ta tovetumaqanayavo itoatoa iagu Nasiusi ena vanue ʼinaya egu lukaiwa ʼidia ona simanea.
12 Ta vivine magilafudi Tilifena be Tilifosa egu lukaiwa ona simanea ʼidia, baʼe vivine diavona nawale ivevetafeʼwa waiwai eda Kaiwabu weaqina.
Ta wese egu lukaiwa ona simanea Fesisi ʼinaya, tauna wese ena fewa waiwaina eda Kaiwabu weaqina.
13 *Mk 15:21 Ta wese Lufasi egu vekaiwa ona simanea ʼinaya, tauna toʼabiboda aqiaqina eda Kaiwabu ena fewa ʼinaya.
Ta inana wese egu lukaiwa ʼidia. Vonahaqiaqi, iveilivu aqiaqiegu kavonaya be yaʼa natu otaqidi.
14 Ta wese egu lukaiwa ona simanea Asinikilito be Filigoni be Elimesi be Fatalobasi be Elimasi ta wese Yaubada ena tomotauyavo qabudi maega itoatoa ʼidia.
15 Ta wese egu lukaiwa ona simanea Filologusi ma moqanena Iulia be Nelusi ma novuna be Olimifasi ta wese tovetumaqana qabudi maega itoatoa ʼidia.
16 *1Kol 16:20; 1Fit 5:14 Ta omiʼa toʼekalesia ma emiavo venima sibutuyega ona lukaiwa ʼidewani itaʼa tovetumaqana eda ilivu aqiaqina ʼinega.
Faulo ena vebibina ʼebeluʼovoa
17 *Md 7:15; Tai 3:10 Egwavo, wese taha yani weaqina nuanuagu qiduana ena vonemi. Onoqoli, ona ʼitamaki aqiaqiemi tomotau luveluveifadi weaqidi, mana taudi edi lugaihi be wese edi veʼita ʼinega ʼekalesia ana tovetumaqanayavo ivetoasiʼiedi. Taudi edi veʼita ʼinega tovetumaqana edi vetumaqana igiveluveifea, mana edi veʼita ge daveʼaidega veʼita tunutunuqina maega, ʼidewani veʼita nana lova niʼa oʼewea toveʼita aqiaqidi ʼidiega. ʼInega taudi maega ge ona veiaiana, ta ʼesi ona toasiʼi ʼidiega. 18 *Fil 3:19; 2Fit 2:3 Baʼe toveʼita diavona ge eda Kaiwabu Keliso weaqina ida fewafewa, ta ʼesi taudiega edi nuanua weaqina ifewafewa. Taudi edi vona yafayafa be wese vona adi noqola aqiaqina ʼidiega tomotau iuʼauʼavedi, mana tomotau diavona ge ida alamania vonigo toveʼita dina edi vona ge Yaubada ena nuanua ʼinega. 19 *Lom 1:8; 1Kol 14:20 Tomotau qabudi niʼa ialamani aqiaqiea omiʼa eda Kaiwabu ena vona ovematamatayagea, ta baʼe weaqina yaqaiawa ʼenaʼina. Nuanuagu qiduana nuami naʼeqaʼu aqiaqiei be yaqisa ami fata yani qabuna aqiaqina ona viaqidi, ta ilivu luveifana adi viaqayavo ge nuanuagu ona viaqidi.
20 *Nug 3:15 Ta ʼeguma toluveifa diavona ona nogedi, e ʼinega nuadaumwala ana Yaubada tuta goyona ena waiwaiega Seitani nahaʼuwebuiea ʼaqemi ʼayanaya ta navamemea.
Ta yavevenoqi weaqimi be eda Kaiwabu Ieisu Keliso ena veyoluba naʼenoʼeno omiʼa ʼimia.
21 *Via 16:1-2; 19:22; 20:4 Iagu Timoti maega afewafewa Keliso weaqina, ta tauna ena lukaiwa vetunei waiwai ʼimia. Ta wese egu tomotauyavo Lusiasi be Iasoni ta wese Sosifata inuaimi ʼinega edi vekaiwa ivetunei waiwai ʼimia.
22 Faulo ena leta baʼe yaʼa Tetiasi yaʼwayavia waiwai ʼimia. Ta nuanuagu wese ena lukaiwa ʼimia, mana yaʼa wese taimi taha Keliso ʼinega.
23-24 *Via 19:22; 1Kol 1:14 Yaʼa Faulo iagu Gaiasi ena vanuea yatoatoa, ta wese tovetumaqana qabudi baʼidia ivavaʼauta tafwalolo weaqina. Ta tauna wese ena lukaiwa vetunei waiwai ʼimia. Ta wese ʼabaga nana ana mane ana toʼitamaki ana wawa Ilasitasi lulukaiwa ʼimia, ta wese ʼidewani Kwatusi ena lukaiwa vetunei waiwai ʼimia.
25 *Efe 1:9; 3:5,9; Kol 1:26; Lom 1:5 Yaubada ana fata be nagivewaiwaiemi, ta baʼe waiwai nana weaqina yaveveluluʼuyayea tuta nana Ieisu Keliso Valena Aqiaqina yalulugaihiea tomotau ʼidia. Ta baʼe Vale nana Yaubada ena nuenuega ʼwaivea ʼimiega tuta ana ʼebeveʼale ʼinega. 26 Ta baʼitagana baʼe Vale nana ana alamani Yaubada niʼa giveʼifoqeyea taudi mali qabu koyadi ʼidia diʼwe taha taha ʼidia be yaqisa adi fata Keliso ina vetumaqanea ta ina matayagea. Ta baʼe yani diavona edi ʼifoqe weaqina lova tovesimasimanayavo imadusimanea Buki Nugwenugweina ʼinaya Yaubada Toatoa Vatayana ena luvine be wese ena nuanua ʼinega. 27 ʼInega luaqiaqieda be Yaubada kana awatuboya! Tauna ana ʼaidega otaqa Toalamani aqiaqi. Vonahaqiaqi, Ieisu Keliso ena viaqayavo ʼidaya weaqina eda awatubo vataya Yaubada ʼinaya naʼenoʼeno tuta qabuna ʼidia. Vonahaqiaqi, eda nuanua ʼidewani.