Migabac Bible Portions Salecebaicne 13

Banabas nga Sol yeke Wapongte bolele hikeiboc

1 Yesule habu Antiok gaibong, yengele hewacka Wapongte siduc-mimi ngic nga wewedu momoc yangucti gaibong.

Banabas nga

Simeon, wacine monic Niger, ailu

Lukius, ye Sairini mackacni. Nga

Sol ailu

Manain. Manain ye Herodeholec momoc galu suguleiboc.*

2 Aime yenge dameng monicka kpaduckelu nosing-sawe galu Sugucne afeelu kwelec kwecnolu gaibong. Gabong Tili Asudi yowa yanguc edocebawec, “Banabas nga Sol yeke nale bole banicte wacepalu bole-yowa yeteiba, yeke bole yogo banicte mimoctocepadaing.” 3 Inguc mime yenge nosing-sawe galu molengineng socnginac lolu milockelu locepalu salecepabong hikeiboc.

Kpanggec ngic monic Elimas

4 Tili Asudi inguc milu salecepame yeke Selusia taonka hauiboc. Iwa haulu lac-wagewa felu hikegacgu Saiparus nucka feiboc. 5 Felu Salamis taon iwa hikelu Yuda ngic-ngigac yengele kpakpaduc macngineng ngiyegacsoc, iwa felu Wapongte yowa miboc yegengkewec. Ailu hikeboc Yoane yekeholec momoc hikelu baficepawec.

6 Aime nuc yogowa higedi falocke hikegacgu Pafos macka hikeibong. Iwa hike sulumelu Yuda ngic monic kpanggec bole balu gawec, ailu siduc-mimi ngic kwesacine gawec, wacine Bara-Yesu, ye bafuwaiboc. 7 Ngic yele agoine kiya monic wacine Segius Polus. Kiya yogo ye ngage-ngage-motockolec ailu Wapongte yowa ngagenogale aicnome Banabas nga Sol wacepawec. 8 Wacepame kpanggec ngic, Grik yowawa Elimas wackelu gaibong, yedi kiya ye Sugucne ngagesingkedaickale ailu, Elimasdi yekele yowa kpatalayetewec.

9 Inguc aime Tili Asudi Sol, wacine monic Pol, yele kwelewa wakeme Elimas dongeinedi ngani-lilickelu yanguc edowec, 10 “Aleng Sugucnenginengte madec, ga Sugucnele yefe dondonne fagac, yogolec ngaba sanangne ailu gaengka kwelegona kwesac nga sowacnedi wakeyackeicne. Ga Sugucnele yefe dondonne faemewa basowalecaigic, dameng dalicne inguc gacaigac. Aibaba yogo mi hegiledamecte, me? 11 Ilec yakumac Sugucnele tapili gala fikeme nganidamec. Dongegone kundung kweme dameng hewac yago wenac angocine mi nganilu gadamecte.”

Inguc mime iwahac wiyac kundung nga kaguwa ingucnedi dongeine ebeckeme dongeine kundung kweme moledi bangang-tangang ailu moleina babong lec-welec ainale miwec. 12 Aime kiya ye pasi yogo fikeme nganilu Sugucnele Siduc Madicne weducnobong ngagelu mimedec ailu ngagesingkewec.

Pisidia nga Antiok taonka Poldi Yesule siduc mime yegengkeyelewec

13 Pol nga ngicfocine yenge Pafos taon hegilelu lac-wagewa hatacmac felu hikegacgu Pamfilia himongka Pega taon iwa hike sulumeibong. Sulumelu Yoanedi yeke iwa hegilecepalu Yerusalem iwa hefaliye hikewec. 14 Aime yeke Pega hegilelu hikegacgu Pisidia himongka Antiok taon waseine, iwa hikeiboc. Iwa gaboc Sabat dameng aime yeke Yuda ngic-ngigac yengele kpakpaduc macka felu ngiyeiboc. 15 Ngiyeboc kpakpaduc macte damong yenge Wapongte yefe-yowa nga Wapongte siduc-mimi ngic yengele hibi nebocine gocne wafeibong. Wafebong motome yanguc edocepaibong, “Ngic hae-gbakecnonggeng, ngeke mibasanang yowa monic ngagegabiyecka yowa yogo miboc ngagening.”

16 Inguc mibong Pol ye fangke domalu moledihac waicke ngiyeningte aiyelelu yanguc edocebawec, “Israel ngic-ngigac, ngenge nga habu gocne Wapong alang bacnocaigaing, ngenge edocngebabe ngagening! 17 Israel ngic-ngigac nongileng Wapongti ngambofocnonggeng bawosaecebame yenge Isip himongka kwilic gacgubong Wapongti baficebame saweibong. Ailu ye tapilitowaineholecti yogowacni mengocebalu kwesilu 18 himong kisiwa misaine mikac dingong suguwa locebalu ngani-damong aiyelewec. Ailu babibiyecebalu gacgume hifa 40 motowec. 19 Motome ye Kenan himongka mac-himong 7te ngic-ngigac wendongebalu ngambofocnonggeng himong yogo yeleme filesoc ailu gaibong. Yenge inguc lolicke gabong hifangineng 450 motowec.

20 “Motome Kenan himongka gacgubong yeuc mimocto-mimocto ngic bafuwacebame damongebame galu ofecgubong Wapongte siduc-mimi ngic Samuel fikewec. 21 Ngictaunonggeng monic fikena mibong, Wapongti Benyaminte alingkacni Kis madecine, wacine Sol, ye bafuwayeleme hifa 40 ngictaungineng ailu gawec. 22 Gacgume ye baickelu ngictaungineng Dawidi lowec. Ailu yele fungine yanguc mime yegengkewec, ‘Na Dawidi, Yesile madec, ye nganilu kwelene madickeme ye bawosaebac. Yedi hocne nale yowa sasawa badaicte.’

23 “Aime yowa yanguc miwec fagac, ‘Israel ngic-ngigac nongileng Asa-baba ngic monic yogo Dawidile aling yengelacni fikedaicte.’ Wapongti yogo mipangkenolewec, yogolec noine yogo Yesu hocne fikewec. 24 Aime mi fikeemewa Yoane ye Israel ngic-ngigac sasawa kwelengineng hefaliyeme misa-lowac ainingte mime yegengkeme edocebawec. 25 Edocebalu boleine bamoctome motonogale aiyemewa yanguc edocebawec, ‘Ngenge ngic ngagegaing yogo, na ye miyac. Ngagegaing, nale lobewa kwesigac, na waweweine ingucnedi yele hige-ebecte mucine lukebe nalic mi madickedaicte.’

26 “Israel ngic hae-gbafocne, ngambononggeng Abraham ailu ngic-ngigac gocne Wapong alang bacnocaigaing, ngenge yowane mibe ngagening. Bikicte ame babale yefe fagac. Ailu wasecne ainogale, yowa yogo nongileng lowec fagac. 27 Nga Yerusalem ngic-ngigac gagaing, ailu damongfocngineng, yenge Yesu mi ngani-motolu ye weningte mimoctoibong. Sabat ngiyecaigaingka damengsoc Wapongte siduc-mimi ngic yengele siduc-yowa yanguc wafe-ngagec aicaigabeleng, yowawa lolu mimoctoibong, yogo noine fikewec. 28 Foinac, yenge Yesu bikicine basackebibiyelu moc osiyelu Pailatle molewa lobong, yedi mimoctome wehomaningte miibong. 29 Aime Wapongte hibiwa yowa-siducine kwelengkeicne fagac, yenge yogo sasawa aicnolu malicpongkacni bamoctolu dongesiwa bahikeibong. Bahikelu henebe ngicti baicne iwa felu lobong fawec. 30 Aime Wapongti homackacni bagboliyeme fangkewec. 31 Fangkeme ngic-ngigac yeholec Galili prowinswacni Yerusalem taonka hikeibong, yenge momoc hadeng homacne fikeyelewec. Fikeme nganiibong, yenge hocne ye wideckelu Israel ngic-ngigac edocebaibong gagaing.

32-33 “Aime Wapongti ngambofocnonggeng molickelu wiyac yelenale mipangkeyelewec, yogo yakumac mimipang yogo adu-madecfocngineng nongilang noine fikewec. I yangucte, Yesu bagboliyewec, yogolec mimipangte Siduc Madicne edocngebagabeleng. Yogolec hocne Miti Gee fengngine yaeckang iwa yowa yanguc kwelengkeicne fagac,

‘Na yakumac mibe yegengkeme edocgugabac, ga nale Madec, nga na gale Mamac.’ (Mige 2:7)

34 Ye Yesu bagboliyeme fangkewec. Aime ye lobewa homalu kpelec-kpelec yogo yela hatacmac mi fikedaicte. Yowa yogolec Wapongti yanguc miwec,

‘Na Dawidila mimipang sanangne miiba, yogolec noine mimi-madic gbagbacne milu geledacte.’ (Yes 55:3)

35 Ailu Miti Gee monicka yowa yanguc fagac,

‘Ga ngicgone gbagbacne ye hegileengka mi kpeleckelu howacine aidaicte.’ (Mige 16:10)

36 “Dawidile yanguc ngagegabeleng, Wapongti ye bole micnowec, yogo ngicfocine yengela bamoctolu homawec. Homame ngambofocine locebaibong, iwa longkebong howacine ailu miyac aiwec. 37 Aime Wapongti ngic bagboliyewec, yedibac howacine mikac.

38 “Ngic hae-gbafocne yanguc edocngebabe ngagening, Yesu ngagesingkebong Wapongti bikicnginengte ameine hegiledaicte, yowa yogodi ngengela kwesiwec. 39 Aime Wapongte yefe-yowa Mosesdi kwelengkewec, yogodi bikicnginengte ameine baickeme nalic mi miyac aidaicte. Yesu ngagesingkebong bikicnginengte ameine baickeme miyac aidaicte, yogo sugu fagac. 40 Wapongte siduc-mimi ngic yengi yowa yanguc miibong, yogo ngengela sanangkenale ung-yowa edocngebagabac.

41 ‘Ngic-ngigac Wapongte yowa midelec aicaigaing, ngenge nganidaing. Na dameng iwa pasi fulune babe, ngenge yogo nganilu kwatackelu homadaingte. Monicti edocngebame pasi yogo nalic mi ngagesingkedaingte.’ ” (Hab 1:5)

42 Inguc milu Pol nga Banabas yeke kpakpaduc mackacni wanogale aiiboc. Aime ngic-ngigac yenge Sabat dameng monicka yeke yowa yogohac edocebanicte sanangne milu edocepaibong. 43 Tutumang motome walu Yuda ngic-ngigac nga Israel yengele alingkacni miyac homacnedi Yuda ngic-ngigac yengeholec taockelu Wapong afeelu gaibong, yenge momochac Pol nga Banabas balaibecepaibong. Aime yeki Wapongte kwele-madicka ganingte mibasanang aiyeleiboc.

44 Aime Sabat dameng hatacmac aime taon yogolec ngic-ngigac yenge Sugucnele yowa ngageningte homacnedi kwesiibong. 45 Aime Yuda ngic yenge yogo nganicebalu Pol nga Banabas hasowac aiyetebong Poldi yowa mime yenge yeholec yowangineng fec-wac aime yowaine hegilelu misulec aicnoibong.

Poldi Yuda ngic-ngigac hegilecebawec

46 Inguc aibong Pol nga Banabas yeke yowa sanangnehac hangoc mikac yanguc edocebaiboc, “Molickelu Yuda ngic-ngigac ngengela Wapongte yowa mibec yegengkengelewec. Aime yakumacbac ngenge ngengung hegilelu gaga-sanang mi banogale ngagesigaingte noke hegilecngebalu Israel yengele alingkacni miyac, yengela hikedabelecte. 47 Sugucnedi bole-yowa yanguc milu notewec,

‘Israel yengele alingkacni miyac, yengele angoc ingucne nani locgube bole balu himong sasawa bahikelu yanguc milu gadamec, bikicte ameine babe wasecne aidaingte.’ ” (Yes 49:6)

48 Inguc mibong Israel yengele alingkacni miyac, yenge yogo ngagelu beliyelu Sugucnele yowa bafelu ngage-angac aiibong. Ailu aling gaga-sanang baningte Wapongti bawosaecebawec, yogo yenge Sugucne ngagesingkeibong.

49 Aime mac-himong iwa Sugucnele yowadi sawelu hikewec. 50 Taon yogolec ngigac sugucne gocne yenge Yuda ngic-ngigac yengela taockelu Wapong afeelu gaibong. Yuda ngic yengi mac-damong nga ngigac feicne gocne yogo hung-kwefang aiyelelu baceba hikeibong. Hikebong yengi Pol nga Banabas weyebic aiyetelu himongngineng sebilelu yebicepabong hikeiboc. 51 Hikenogale ailu higenginackocni lube weboc wawec. Yogo aibabangineng sowacne edalicebanogale ailu hegilecebalu Aikoniam taonka hikeiboc. 52 Aime mic-tengtengfocine yengele kwelewa Tili Asudi wakeme beliyeibong.

*13:1: Herode nenggac-mamackecine yeke mac-aling monicte damong. Yeki Manain hole-gumec aicnolu bagaboc sugulewec. Herode yogodi Yoane wehomawec. Siducine Luka 9:7-9 iwa fagac.

13:2: Sale 9:15

13:3: Sale 6:6

13:5: Sale 12:12; 15:39

13:11: Sale 9:8

13:13: Sale 15:38

13:17: Wah 1:7; 6:6; 12:51; Yef 1:31

13:18: Him 14:34

13:19: Yef 7:1; Yos 14:1

13:20: Mimo 2:16; 1Sm 3:20

13:21: 1Sm 8:5,19; 10:20-24

13:22: 1Sm 13:14; 16:12; Mige 89:20; Yes 13:14

13:23: 2Sm 7:12-16