11
Ngic yaeckang yeki yowa miboc yegengkewec
1 Aime monicti kpetele maa monic yogo kumicnang muc ingucne nelelu yanguc edocnuwec, “Ga fangkelu Wapongte Ibu-mac nga alatale maa balu ngic-ngigac yogowa Wapong afeecaigaing, yengele dzalengineng momoc badamec.Esek 40:3; Sek 2:1-2 2 Ailu Ibu-macte sobeng odaineholec fagac, yogo Israel yengele alingkacni miyac yenge yeleicne. Ilec ailu ga sobeng yogolec maaine mi badamec. Yengi tamacne 42le kwelina taon gbagbacne*Ibu-mac Yerusalem iwa domawecte taon gbagbacne wackeibong. yogo edesockelu basowaledaingte.Luk 21:24; Miye 13:5 3 Dameng iwahac na wideckecne tapili yetebe yeki kwele-sowacte ngakpi holelu hadeng 1 taosen 260le†Hadeng 1 taosen 260 yogo tamacne 42 aigac. Nga tamacne 42 yogo hifa habackang nga nebocine aigac. kwelina nale siduc-yowa midabiyecte.” 4 Yeke oliwa yoc yaeckang, nga Sugucne himongtowa bafuwawec, yele haicka hifa higeineholec yaeckang ingucne domagabiyec.Sek 4:2-3,11-14; Miye 1:20; Yef 19:15 5 Ngic gocne yengi yeke basowalecepanogale ngagedaingtewa, dacti yekele mickacni ofelu ngabafocnginec lobecebame homadaingte. Ailu hatacmac mibe, monicti yeke basowalecepanogale ngagedaictewa, ye inguc hocne homadaic.2Sm 22:9; Mige 97:3 6 Wideckecne yeke yowa-siduc milu gaboc sawawa wileng hedickeme mac monic mi kwedaicte, yeke bole-yowa yogo tapiliineholec balu gagaic. Ailu yeke yekuhuctihac miboc misadi hefaliyelu sac ainale bole-yowa tapiliineholec balu gagaic. Ailu yeke yekilec angacte doic haicine monic-monic himongka loyelenicte bole-yowa tapiliineholec ingucnehac balu gagaic.1Ngt 17:1; Wah 7:17-20; 1Sm 4:8
7 Aime yeke fungine miboc yegengkeme edocebayackeboc motome, hudu-baba-sicti long sugucnebenang, yogolec kwelinacni ofelu yekeholec wenagulu yeke huduwa ewalicepalu wehomacepadaicte.Dan 7:7,21; Miye 12:17; 13:7; 17:8 8 Wehomacepalu kponggbongnginec yogo taon yefeina locepame fadabiyecte. Taon sugucne yogolec wacine nangeng yowa holelu Sodom nga Isip micaigaing. Aime mac iwa hocne Sugucnenonggeng malicpongka webong homawec.Luk 13:34 9 Aime hadeng habackang nga hadeng monic nebocine yogowa ngic-ngigac soc haicine monic-monic, nga himong fengnginang fengnginangsoc ngic-ngigac. Ailu yowane yowane nga himongne himongne ngic-ngigac yenge yekele kponggbong nganilu longepadaingkale, kpatalayeledaingte.Mige 79:2-3 10 Kpatalayelebong ngic-ngigac himongte wiyacka wetackelu gagaing, yenge sasawadi angac nga kwele-madic ngagelu kwele-madicte woc-wiyac gocne lanagudaingte. Siduc-mimi ngic yaeckang yeke ngic-ngigac yogo doicka locebaibocte inguc aiyetedaingte.
11 Aime hadeng habackang nga hadeng monic nebocine motome, gagale asudi Wapongtacni kwesilu yekela haume yeke hatacmac fangkelu domaiboc. Domaboc nganicepalu yenge damuebame hangoc sugucnehac aiibong.Esek 37:5,10 12 Aime honocmengkacni yowa-malac monic yanguc edocepame ngageiboc, “Ngeke yawa ofenic!” Inguc mime ngabafocnginec yenge yeke nganicepabong kaguwa kwelina honocmengka feiboc.2Ngt 2:11
13 Feiboc dameng iwahac memeya sugucnehac bame taon yogolec nebocine 10 iwacni nebocine moniyang siyeckewec. Memeya sugucne bawec, yogolec kwelinacni ngic-ngigac dzalengineng 7 taosen yenge homaibong. Homabong ngic-ngigac nebocine yenge hangocebame Wapong honocmengka gagac, yele wac bafeibong.Esek 38:19; Miye 6:12; 16:18; Dan 4:34 14 Mee, yowale umac alecine yaeckang yogo motogac. Yanguc ngagedaing, yogolec lobeina, yowale umac moniyangti sugu fagac, yogo biyac fikedaicte.Miye 9:12
Angelo 7 yedi kpengine fitowec
15 Aime angelo 7 yedi kpeng fitome honocmengkacni yowa-malac sugucne yanguc miibong,
“Yakumac Sugucnenonggeng nga Kristo bawosaeicne, yeki himongtowale ngani-damong yogo balu damongkelu gagaic.
Ailu Sugucnenonggengti ngictau gagac ailu gaginowagac.”Wah 15:18; Mige 10:16; Dan 2:44; 7:14
16 Inguc mibong damong 24 Wapongte emewa ngictaule ngiye-ngiyenginang ngiyecaigaing, yenge ketadi holecnolu haicngineng heluluckelu Wapong afeeibong. 17 Afeelu yanguc miibong,
“Sugucne Wapong Tapilitowa Fileine, nonge kwele-madic edocgugabeleng.
Ga biyachac gaing, ailu ga yakumac gagichac.
Gageicne tapilitowa balu yakumac ngictau bole balu gagic.
18 Ngic-ngigac himongne himongne gagaing, yenge aalic ngagebong, gale aalicte ameinele damengtibac yanguctihac kwesilu gagac.
Gagi ngic-ngigac homaibong yenge wosaecebalu mimoctocebadamecte.
Ailu kwelec kwekwefocgone yenge gale siduc-mimi ngic, gageicne bingec ngic-ngigacfocgone, sugucne nga kpisicnedi gale wacgone alang bagelecaigaing, yenge aibabanginengte ameine yeledamecte.
Aime ngic-ngigac gocne yengi himongtowale ngic-ngigac nga wiyac sasawa basowalecaigaing, gagi yenge basowalecebadamecte.”Mige 110:5; Rom 2:5; Miye 20:11-13; Mige 115:13
19 Aime honocmengka Wapongte Ibu-mac nuine laliyeibong. Ailu yele dodoficte katapa dongenginengti nganiibong. Nganibong pilatac bame gbululung nga uc sugucnehac holeibong. Aime memeya bame mac hucine sanangkeicne yogo sugucnehac waibong.‡Himong mogungna mac hucine sawawa mogungkelu posa ingucne sanangkelu wacaigaing.Hib 9:4; Miye 8:5; 15:5; 16:21
11:1: Esek 40:3; Sek 2:1-2
*11:2: Ibu-mac Yerusalem iwa domawecte taon gbagbacne wackeibong.
†11:3: Hadeng 1 taosen 260 yogo tamacne 42 aigac. Nga tamacne 42 yogo hifa habackang nga nebocine aigac.
11:4: Sek 4:2-3,11-14; Miye 1:20; Yef 19:15
11:5: 2Sm 22:9; Mige 97:3
11:6: 1Ngt 17:1; Wah 7:17-20; 1Sm 4:8
11:7: Dan 7:7,21; Miye 12:17; 13:7; 17:8
11:9: Mige 79:2-3
11:11: Esek 37:5,10
11:12: 2Ngt 2:11
11:13: Esek 38:19; Miye 6:12; 16:18; Dan 4:34
11:15: Wah 15:18; Mige 10:16; Dan 2:44; 7:14
11:18: Mige 110:5; Rom 2:5; Miye 20:11-13; Mige 115:13
‡11:19: Himong mogungna mac hucine sawawa mogungkelu posa ingucne sanangkelu wacaigaing.
11:19: Hib 9:4; Miye 8:5; 15:5; 16:21