Polgo Hasia Pas Deli Korin Dabeba Asęani
Hasia nedebo tau sabo po
Polobadu te bidi Pol bidali sogo, aga digi te bulu Korin genuai taun me deli te provins tǫ pedai Akaia bulude te Grik dabego moni tǫ pedai tomoba pelama, tama te moni genuai hanu Korin teba sabolama, tama Krais Jisasgo po te Korin we bidi dabebolo pusali. Te Korin hanu dwai nogi elaluali, te dwai dwai penani sę ebo hanu wai, tama tibo god hauwa tede elaluali. Te Korin we bidi mebago te Godigo po bugagia odali. Tama nosali Pol aga te gasa hanu nogi Efesus tede bidibadi, agai e pas te Korin bagebolo asęna tolali. Agai odali, te hani augwa hasi tomode pebeda pali. Tama bidi me deligo dwai penani sę yali. Tama te Korin bage augwaligo pas te Polba asęna toloyu, tama haniani kolesaga ebode te augwaligo aga po hanalu wali. Tama Pol agai te hanalu wali po wei ponoyu, tama aga homu me Godigo homu dali si augwalibolo pusa mani.
Polgo moni homu te Jisasgo po wali pabo te Korinde bidalubo we bidide yali, tiyu augwaligo konealubo homu dąų wabo te bomo kimi meni dali weyu yali. Tama augwaligo wiegi yai kolesaga yali te dolidali homu yai. Agai te we de bidi si deliba dagana selama bidu ebo te doloba pai kolesagade po weyu, tama te sęgę dabe pedalubo si te Godigo Tedali Mobo Bidigo te augwali bilibo dodolomainu yabo po weyu yai. Agai te lotu wabo wiegi yai kolesaga ebo po me te haniani gasagi yai homu kolesaga te Tedali Mobo Bidigo te Jisas wali pabo bagede ebo po wali. Tama me te isali bidi dabe ma hodalueibao po wai dao.
Te tama tigidali sę dabego te Korin dabeba sęgę mobaso, te bidi Polgo te wiegi yai mu pogo te augwali tau somainu eyu te Godigo ebo homu kolesaga konemainu yali. Te e bukude dąį me badude te Genuai Bidi wali pabo bagego homu godolo ebo po te buku Dąį 13 tede te po elalubao. Te dąįde te tiwai po te gasa bidi hasi homu godolo ebo po wali elalubao, te hasia mu Godigo aga we bidi dabeba mani homu kolesaga te dao. Dago te tama kolesaga wali pabo usu dao.
Te Genuai Bidigo po wali pabo bagego augwa digi augwa nogi ugaba sabo konila po me olamuo po wai
1
(Dąį 1–4)
1-2 Ena Pol da, tama Godigo digi aga homugo konea pelama tama agai ena i olama, te Krais Jisasgo tagala palali bidi sęba muani. Ena dali dago ama Sostenes dadi sigo e pas te dage Korin moni hanude bidalubo Godigo we bidi hanibolo asęna tolobao. Dage te Godigo dwai sę me isąbo wiegi yai we bidi pedalomainu eyu agai dage i wai dao. Tama dage Krais Jisas dali wadolama, tama dage dali te tigidali bulude bidalubo we bidi augwaligo te dago Genuai Bidi Jisas Kraisbolo lotu po wabo bage dali, te da tigidali Krais Jisas dali wadoloyu tama Godigo we bidi hani bidibo dao. Aga da, te augwaligo me te dago me Genuai Bidi dao. * Tpi 18:1 3 Eno homugo dago Aya God dali, te Genuai Bidi Jisas Krais dali, augwali sigo te augwa olo tau sabo kolesaga me, te bidi homu dua digi nagame ilibo kolesaga dali si te dagebolo mao.
Polgo Godiba puba hwi po wali
4 Eno gedu haluasa po weyu, tama tigidali sogo eno te ena Godibolo dagede puba hwi po wabo dao. Magi baso meni, dage Krais Jisas dali wadolobaso Godigo dage olo tau siduai dao. 5 Dage Krais dali wadoloyu tama Godigo bomo dagebolo mayu, dage te tigidali dwagi yai kolesaga ebode te dage usu mu dao, sǫą pabeo. Tama tiyu, dagego te Godigo po kuna koneyu tama gasa we bidibolo pusubo sę te dage usu nubo dao. 6 Te Kraisde ola mani po te dagego bugagia mu odolama te sai dao. Tama selama, tama dagego ebo kolesaga hasegelebaso, te gasa we bidi dabe augwaligo sulama tama augwaligo koneai, dagego te Kraisde ola mani po mu odobo dao. Tama tibaso, 7 te Godigo dagebolo maiabo wiegi yai sę yabo bomo tigidali dagego sai dao, tede dage sǫą peyu habuge me ebeo. Tama dagego tama selama, dagego dago Genuai Bidi Jisas Krais hania pedalabo sogo asobo tonaluyu bidibo dao. 8 Tama agai te dagego agade konealubo po dąų weyu agaba homugo tialubo kolesaga, te agai bomo ilama, tama te tigidali nai silabo sogo usu nigi paibao. Agai tama tiyu, tama dago Genuai Bidi Jisas Krais aga ma asobo sogo te sogo dage sęgę meni yai we bidi pedalaibao. 9 Te God aga digi dage aga ogwa Jisas Krais dali wadolomainogo eyu tama dage i wali bidi, te tiwai God aga digi da te agai homugo dage dali kęą pai bidi mu dao, te dage agaba tią pabo te usu dao.
Te Korin dabe augwa hasi bugulama hani si sela pedalai
10 Ama dedeo, te dago Genuai Bidi Jisas Krais agai aga nogigo bomo enabolo mobaso, eno homu dene ebadi te nogi bomogo eno e po dagebolo megi obao, dage tigidaligo deli homu naga eyu tama po deli tama wao. Dage si sela pebeda pigimio. Te mu menio. Dage bidibo deli hani tama bidiyu, deli homu kolesaga naga dali, te deli sę yabo homu dali te sę yao. 11 Eno te po dagebolo magi baso obawe? Woo, eno ama dede, te dage tomode bidibo we nogi Kloe, aga bede bidibo bage meba augwaligo enabolo wali, duga hasi tomode wado ebo wali. 12 E tiwai dao: dage tigidali deli deligo gasagi gasagi yai po wabo. Me badugo te po wabo, “Ena Pol wali pabo dao.” Me badugo te po wabo, “Ena Apolos wali pabo dao.” Me badugo “Ena Pita wali pabo dao” wabo. Tama me badugo “Ena Krais wali pabo dao,” te po wabo. * Tpi 18:24 13 Tega! Magi yaliwe? Krais tomode pebeda pali elaluba agawe? Ena Pol, te ena dage tobade te ni pedaide isaliwe? Te dage baptais yalide, te ena Pol wali pomainogo eyu tama dage baptais yali dawe? Te mu meni.
14-15 Dage tomode eno baptais yali te Krispus dali Gaius dali te bidi sidigi da. Gasa bidi meni. Tama eno te we bidi hauwa te baptais masiąbaso, ena dwagi yai homu ebo dao. Magi baso meni. Te eno we bidi hauwa te baptais magi sogo da, teda augwaligo te “Da Pol wali peyu tama baptais salio,” te po augwaligo wagi da. 16 E, eno megi tama ma kone palali, te bidi Stefanas dali aga hani dali digi te me eno baptais mani da. Eno gasa me baptais maniwe ma meniwe, te eno konebeo, kegeda pai. 17 Tama Kraisgo ena tagala palali te we bidi baptais emainogo tagala palobeo. Menio. Agai ena tagala palali eno te Godigo wiegi yai gesi po te we bidi augwalibolo pusumainogo tagala palali. Tama tiyu agai homugo eno te tǫde koneai bidi dabego wabo pogo agai gesi po page ola menamuo te homu yai. Te Krais aga te ni pedaide isibogo bomo eno dolidali weyu tama eno te tǫde koneai bidigo po pusubo kolesaga wali pabo meni.
Godigo wiegi yai homu kolesaga dali agai genuai bomo dali si po
18 Eno koneani, te augwali digi dolobo sę ebo tųdu pabo we bidi augwaligo homu te Krais ni pedaide isali po te homu kolesaga meni yai bidigo wabo po naga dao. Tiali goli te da Godigo ma dobola sabo we bidi, te dago homu te po da te Godigo genuai bomo hania ola mabo po dao. 19 Tama tede te Godigo po asęani bukude Godigo wali po me deli e tiwai elalubao:
“Te eno te tǫde koneani bidi dabego homu
kolesaga dolaibao, te haniani sęde polo konea pabo
bidi dabego homu kolesaga ena sela sąwaibao,”* Ais 29:14
Godigo te po wai. 20 Tama Godigo te po polobadu obaso, te tǫde koneai bidi dabe augwali magi yaibawe? Te buku hauwa elalubo po page konebo bage, augwali me magi yaibawe? Ma, te gasa bidigo homu bega sabo po bugagia wabo bage, augwali me mena sę me elalubawe? Menio. Godigo dabolo hanilama hania ola mawai dao, te e tǫde elalubo wiegi yai homu kolesaga te olo nai tiwai dao, te homu kolesaga meni yai bidigo olo po naga dao. * Jop 12:17; Ais 19:12; 33:18; 44:25
21 Magi baso meni, God aga homu kolesaga te wiegi yai mu, aga tigidali naide kuna konebo kolesaga sia pai elalubo dao. Tama agai te tiwai ilama tama we bidi augwaligo augwa homu kolesagago naga aga konesiąbo sę ilali. Tialima Godigo homugo te dago Kraisde pusubo pogo agai te po augwa homugo konealubo we bidi agai ma dobola saibao. Tǫde we bidi augwaligo te pode te homu kolesaga meni yai bidigo olo po naga dao homu yali, tiali goli Godigo homugo te pogo agai we bidi ma saibao. 22-23 Te Juda bage augwaligo te po wabo dao, “Te ola mabo pode, te dago gedugo te nago te bidigo isąbo genuai bomai sę ebo subaso da, teda dago te nago ola mabo po te mu po dao homu yaibao.” Tiali goli eno “Te Krais aga te ni pedaide isali kolesaga te genuai sę dao,” te po eno te Juda dabebolo obaso, augwaligo te po hagela eyu oda tagalobo dao. Me ma, te Juda hani isąwai bage augwaligo homugo bidi mego aga digi homu kolesagago naga augwalibolo augwa e tǫde bidibo kolesaga page hania ola mao, te homu augwaligo ebo dao. Tama tiali goli dago te Krais ni pedaide isali po augwalibolo ola mobaso, hagela homu eyu te pode augwaligo me te homu kolesaga meni yai olo po naga dao, te homu ebo dao. 24 Tiali goli te da Godigo i olama dią sali we bidi, da me badu Juda bage, me badu te Juda hani isąwai bage, dago homu te Kraisde pusubo pogo te Godigo genuai bomo dali aga wiegi yai homu kolesaga me te hania ola mabo dao. 25 Magi baso meni, bidigo gedude te Godigo yali homu kolesaga te page meni yai homu kolesaga dao. Tiali goli agai homu kolesaga wiegi yai mu dao, tego te tǫde bidigo homu kolesaga tigidali aiyaba elalubo dao. Tama bidigo gedude Godigo yali sę, te bomo meni yai sę dao. Tiali goli te mu meni, agai genuai bomogo te tǫde we bidigo bomo tigidali aiyaba elalubo dao.
26 Eno ama dede, kone palao. Te Godigo dage i wali sogo te dage magi we bidi dabe bidaliwe? Te tǫde bidigo gedude dage tomode te haniani naide bugagia koneani bidi hauwa meni, te gasa we bidi tonalubo bomo elalubo bidi hauwa meni, te genuai nogi yai bidi dage tomode hauwa menio. 27 Te meni. God agai homugo eyu tama te tǫde haniani naide kuna koneani we bidi hale emainogo eyu, agai te augwaligo gedude te homu kolesaga meni yai bage dią sali. Tama me te tǫde genuai bomo elalubo bage hale emainogo eyu, agai te tǫde we bidigo gedude bomo meni yai we bidi dią sali. 28 Te tǫde we bidi augwaligo gasa we bidi me badude e homu ebo dao, “Woo, augwali te nogi meni yai bage naga dao, dwai bage dao, augwali olo nai naga dao,” te homu ebo dao. Tiali goli agai te tǫde we bidigo gedude genuai wiegi yai nai dolomainogo eyu, Godigo te tobage olo we bidi dią sai dao. 29 Tama tibaso, dago hania koneani, te bidi me deligo aga digi nogi Godigo gedude ugwaba me sogobeo. 30 Tiali goli Godigo dage Krais Jisas dali wadolali, te agai tilama tama Kraisgo da wiegi yai homu kolesaga elalubo we bidi nigali. Te Kraisde God agai da agai wiegi yai we bidi hani mu ilali, tama dago dwai sęde sali sęgę sela sąnama tama da olo bugagia bidibao. 31 Tama tibaso, te dago te Godigo po bukude elalubo po me deli tiwai inao. Tede e tiwai po wai dao, “Bidi me deligo te nogi ugwaba sabo po wabo homu eyu da, teda agai dago Genuai Bidigo nogi naga ugwaba sao,” te po asęani. * Jer 9:24