1 Te Nabot te taun Jesril bidi me deli da, tama agai wain gi te king Ahapgo genuai be pąde te Jesril taunde elaluali. Tama nosali te Siria dabego genuai boi hwįagasali side, 2 Ahapgo Nabotbolo te tiwai po wali, “Nago wain gi eno be pagede elalubao. Tama tialima, eno homugo nago ena menama, te eno te tǫde keba gi bulabo homu ebao. Te nago enaba mobaso da, teda eno nageba te gasa wain gi mayu, te wain gigo nago gi aiyaba elalubo tiwai yaibao. Ma, nago mone sabo homu wei ebaso da, eno te gi te genuai monego abelaibao,” wali. 3 Tialima, Nabotgo kingba te tiwai po wai, “Polobadu digi te tǫ pedai te eno wąį nǫų hani dabego tǫ elaluama, te megi me eno tonalubao. Tialima, te Genuai Bidigo nogide, eno nageba me magobeo,” wali.

4 Ahapgo Nabotgo te wali po odama, te aga wado homu elama, haliga sębę me dwai yali. Tama aga be elalubo madi Samariaba pelama, te betba pigi palima, te gesabidi be dagaba begaluai. Te aga nai tubo gisilai dao. 5 Nosali aga we Jesebelgo aga sugi pelama, agabolo te tiwai po hanalu wali, “Magi baso nago haliga sębę dwai elama, nai tubewe?” wali. 6 Tama agai Jesebelbolo te tama po wai, “Nabot, te Jesril bulu bidigo, eno po odisąwai. Eno agabolo po waliyu, te eno agai wain gi abelabo homu yai. Ma, agai te mone sabo homu wei isąbaso, eno agaba te gasa wain gi maiabo homu yai. Tiali goli, agai enabolo maiabo homu me ebeo,” wali. 7 Tama Jesebelgo agabolo te tiwai po wali, “De mu te Israel tǫ kantri king bidi da, nage, ma gasa bidi dawe? Moni homu igio, tagalao. Hogodama, nai tugulao. Eno te Nabotgo wain gi selama, nageba mawaibao,” wali.

8 Tialima, Jesebelgo te pas dabe asęnama, te Ahapgo nogi me dąį te ugwadu te pas daide muani. Tama agai te Jesril taun tobolu bidi dabeba, me te genuai bidi dabe augwaliba tolai dao. 9 Te pas dabede asęani po te tama tiwai elaluali, “Dagego te nai tusiąma, habu selabo sogo me dąį ilao. Te side, dagego te taun Jesril we bidi dabe sisinagasao olama, i wao. Tama te sisinibo side, Nabot te hasia te polali siade dugamainu ilao,” wali. 10 “Tama te dwai bidi si aga pąde dugamainu ilao, tama te bidi sigo agaba te tiwai po kisilama omainu ilao, ‘Nabot, nago dwai po te Godiba me kingba wali.’ Te tama po Nabotba kisilama po walama, Nabot te taun buluba sela solama, te agaba masigi sąnama, te aga ela muao,” te po te pasde wai dao.

11 Te Jesril taun tobolu bidi dabe, me genuai bidi dabe, augwaligo te pas sabo si da, teda augwaligo te Jesebelgo po wali pelama, 12 tama augwa te nai me sogo deli gisilabo sogo dąį ilai. Tama augwa te we bidi dabe i olama, sisinagasali. Tama augwaligo Nabot te polalubo sia saide dugamainu ilali. 13 Tialima, te dwai bidi si Nabot pąba dolo si dugayagasali, te we bidi dabego gedude augwali sigo tibo po kisilama, Nabotba te tiwai po wali, “Nabotgo te dwai posobo po te Godiba me kingba walio,” wali. Te we bidi augwaligo te wabo po odolama, tama augwaligo Nabot te bedu taun buluba sela solama, te augwaligo agaba masigi sąnama, aga ela muai dao. 14 Nosali augwaligo Jesebelba te tiwai po tagala palali, “Dago Nabot te masigigo ela munama isalio,” te po ola tolali.

15 Jesebelgo te po odama, te polo tama Ahapbolo te tiwai po wagi pali, “Nabot aga me bidibeo. Aga isai dao. Tialima, nage pelama, te agai te wain gi sigi pao, polobadu agai nageba mabo hagela homu yai dao,” wali. 16 Ahapgo te po odobo si da, teda aga hogodasa pelama, te wain gi sigi pai dao.

17 Tama te sogo Genuai Bidigo te profet bidi Elaijabolo te po wali, te taun Tisbe bidibolo te tama po wai, 18 “Nage hogodasa pelama, te Israel king Ahapbolo te tama po wagi pao. Megi aga te Samaria tagalama, te Nabotgo wain gide bidibao. Agai te gi sąį hagede ebo dao. 19 Nago agabolo te tama po walao, ‘Ena Genuai Bidi, eno te po obao, nago te bidi ela munama, megi da nago agai wain gi me sainogo eba, agawe? Tialima, eno te tiwai po dolo nageba obao, te yowigo Nabotgo kaneme tuali pesagede, te nago kaneme me augwaligo tede tueibao,’ te po agabolo pusao,” Genuai Bidigo te po wali.

20 Elaijago Genuai Bidigo po odama, aga te Ahap bidibo madiba pali. Tama Ahapgo te Elaija subo sogo, aga te tama po wali, “Eno boi bidi, nage enaba ma pedaluba, agawe?” Tama Elaijago te tama po wei ponani, “Awe, eno nage suagasali, magi baso meni, nago godolo ebo homu, me te homu kolesaga tigidali bomo elama, te Genuai Bidigo gedude dwai kolesaga nago ebo dao. 21 Tialima, Genuai Bidigo nagede te po elalubao, ‘Ena Genuai Bidi, te eno nage dolaibao. Te eno nage te Israel hanide pedalubo bidi tigidali silimainogo yaibao, te augwali gesi ogwa bidi yaibaso, ma te gegunai bidi dabe me, tagalao, te mu silaibao. 22 Nago te we bidi augwali dwai sę eboba kegebaso, tama nago te tebo kolesagago ena haliga sębę ilibao. Tama tialima, eno te deli tigi poai kolesaga te nago deli hani sibiba yaibao, eno te king Jeroboamgo deli hani sibiba yali sę tiwai yaibao, te Nebatgo ogwa da, te king Basago deli hani sibiba me te tiwai yali, te Ahiyago ogwa dao,’ wali. 23 Te Genuai Bidigo po te nago we Jesebelde me elaluali. Agai te tama po wai, ‘Te Jesebel isibo si da, te yowi dabego agai tigi te Jesril obo banis pąde tueibao,’ Genuai Bidigo te po wai dao. *2 Kin 9:36 24 Te Ahap, nago hani sibi bidi meba te taun tomode isibaso da, teda yowi dabego augwaligo tigi tueibao. Te me badu taun bulu badu isai baso da, teda te ba kemodagego augwa tigi tueibao,” Elaijago Ahapbolo te po pusali.

25 Mu tamao, te Ahap king bidali sogo, te agai homugo me koneani kolesaga tigidali te Genuai Bidigo gedude dwai sę yabo kolesaga bomo elaluali. Polobadu bidi me deligo te tiwai kolesaga me ebeo. Aga we Jesebelgo naga, te aga homu begelibo po obaso, te dwai kolesaga yali dao. 26 Ahapgo te tibo god dabeba lotu weyu, tama agai te Amor dabego kugumini yai kolesaga dabe wali pali, te augwali te tǫde polobadu bidali we bidi dabe da. Tialima, Genuai Bidigo augwali ela gudulama, tama te tǫ Israel dabe augwaliba mawai dao.

27 Ahapgo te Elaijago po odali sogo da, teda aga homu dwai dene mu yalio. Agai aga ugwa pisilama, te homu dene ola mabo ugwa gudalio. Tama aga nai tubo habu selali. Tama aga hulide me te homu dene ola mabo ugwa dali piali. Aga moni homu hauwa mu elama, te aga homu pemene dali sę me ebeo. 28 Tialima, Genuai Bidigo te profet Elaijabolo te tiwai po walali, 29 “Megi da, te Ahap aga digi eno gedude aiyaba elaluali. Nago agai te tebo kolesaga sualiwe, ma meniwe? Agai te tiwai kolesaga ebaso, tama eno agai hani sibi dabeba te dwai dene mabo sę te aga bidibo sogo me egobeo. Menio. Eno agai hani sibi dolabo sę te aga ogwa king bidibo sogode te tama sę yaibao,” te po wai.