1 Tama Hanago God dali te tiwai po wai, “Genuai Bidi, nago ena wiegi yai homu pemene umabo emainu ilali. Tama nago te genuai nogi enabolo mani, te eno homu wiegi yai pemene mu ebao. Tama eno te ena boi bidi dabede te gisugu dwai mu mobao. God, nago ena tau sali, tama eno haliga bugagia mu ebao. 2 Genuai Bidi, nago kolesaga te gasagi yai tedali mu ebo, tama nage wiegi yai gagawai, tama nage tiwai bidi tobage bidi me deli me elalubeo. Mu menio. Nago tigidali mu aiyaba elaluai. God, nage deligo te da tudi badu pogalu, tama da tau sobao. Te niwai bidi me deligo te nago ebo tiwai gilama me egobeo, te dago God nage naga dao,” wali.

3 “Da we bidigo bugagia koneao, Genuai Bidi aga God te dago ebo sę tigidali koneama, tama agai dago ebo kolesaga dagalubao. Tama tibaso, dage we bidigo duga digi duga nogi ugaba siyu, te po dagą wabo, dage pedauwali pania selama, tama te tobage po wabo tagaliąo. 4 Godigo te bomai ami boi bidi dabego enesigi togolama, tama augwaligo wąbi hwįabo bomo munu me egobeo. Tiali goli, te bomo meni yai bidi dabe, agai te augwali bomo ilibo dao. 5 Te polobadu nai hauwa elaluali bidi dabe, megi Godigo augwali nasi ilama, tama augwa sę emainu elama, tama augwa te nai naga siyu, te augwa mone sabo tiwai gilama emainao. Tama polobadu te nai menia siyu, nasi elama bidali we bidi, megi te Godigo nai hauwa augwaliba menama, tama augwali nasi me egobeo. Tama te polobadu wai ame nesiąwani we dabe, megi te Godigo augwali tau selama, tama augwaligo wai te a naga olama, nogo me si, te tama ame nabo usu yaibao. Tama te polobadu wai hauwa ame nani we, megi te wai dabe hagala silama, tama Godigo te we agaduba deli digi hobedagia bidimainu ilibo dao,” wali.

6 “Genuai Bidigo te bidi ela munama, tama te isai bidi dabe te bidibo ula mawaibao. Tama agai te we bidi dabe te isai bidi dabego pesageba tagala palama, tama agai te isai bidi dabe selama, tama augwali ma odasa aselama, tama augwa te bidibo ula ma selama, bidibo dao. 7 Tama Genuai Bidigo te we bidi meba te doado bage meni yai bidi pedalumainu ilama, tama agai te meba bidi dabe te doado bage mone hauwa elalumainu ilaibao. Agai te meba aiyaba elaluama, tama te mebabolo te genuai nogi mayu ebo dao. 8 Agai te magi doado bage meniama, te sǫą pabo we bidi dabe tau selama, tama augwali bugagia bidaibao. Tama agai augwali te augwa bulu tǫde te genuai pedelama, bidimainu ilama, tama te we bidigo augwaliba genuai nogi mawaibao. Agai te tama tebo, magi baso meni, te e tǫ tolalubo bomai nai dabe augwali te Genuai Bidigo digi nigilai nai dabe, tama aga digi te nai dabe daide ugwadu te tǫ sese nigilama elalubo dao,” wali.

9 “Genuai Bidigo te aga wali mu pabo we bidi dabe tonalueibao. Tiali goli, te dwai kolesaga ebo we bidi dabe agai augwali dolaibao, tama augwali te bulu dwai mu hulia sai madi hagawaibao. Te genuai bomo mu elalubo bidi me te tagalao, aga te aga bomode digi te bugagia me bidigobeo. 10 Genuai Bidigo te aga boi bidi dabe te dwai mu ilama, dolaibao. Aga te dagalude bidu, te agai augwaliba bomo elama, te dagalude be kulukulu wabo tiwai gilama yaibao. Tama Genuai Bidigo tigidali tǫde we bidi te agai po tųba sisinama, tama augwa yali kolesagade dagalaibao. Tama agai te sa muyu nigilali king bidiba bomo menama, tama te king bidigo genuai nogi te tigidali bidi hanide elalueibao,” wali. *Luk 1:46-55

11 Hanago te tama gedu haluasa po olama, tama aga ma pali. Tiali goli, te gesi ogwa bidi Samuel te Silo bulude bidama, tama te Genuai Bidigo sę yali, tama te pris Eligo aga tonalubadi te sę yai.

12 Hopni me Finias, te Eligo ogwa si, te bidi dwai si mu. Augwali si te pris bidai, tiali goli, augwali sigo te tiwai homu yai, Genuai Bidi te olo nai tobage tiwai da homu elama, tama augwali sigo subigila sę yali. 13 Tama augwali sigo te ofa ebo nai dage te pris dabego sela tumainu ebo, te bomai po wali me pabeo. Menio, te bidi me deligo te ofa ebo nai ulubo sę idubadi, teda te pris bidi sigo te augwa si sę ebo bidi tagala palama, te ulubo nai mi sagasai. Teda te ofa nai ula mabo sę bidigo te sipun ną age sela yai tego pusula selama, sela asiyu yai. 14 Tama te sę ebo bidigo te sene tomoba age yai sipun pok enama, tama mena tiwai kibu mi dage tede pusulasa holobaso da, teda agai te mi te pris si pageba selasa pali. Augwaligo te tobage dwai kolesaga te tigidali Israel we bidi dabe dali yali, te augwaligo ofa te Siloba igi pabo sogo tiali. 15 Tama me sogo te prisgo sę ebo bidigo te ofa yabo kibu ili sela sąsiama, te siaba ulusiąbadi, te bidi asai. Tama agai te ofa ebo bidibolo te po wai, “Te prisgo kibu mi meba enabolo mao, wai. Aga te siade ulainu, magi baso meni, agai dagego te sospen senede ulubo mi tubo te aga hagela homu ebo, wali. Dage aga te disąwai gesi mi mao, wai dao,” te po wai.

16 Tama te ofa yainu ebo bidigo agai te po obaso, “Te eno ofa ebo bomai po wali pelama, te ili te siade bolo ulama, tama nosali te nago mena tiwai mi godolo homu ebaso, sagameo,” po wali. Tiali goli, te prisgo sę ebo bidigo te po wai, “Woo, menio, megi tama nago ena mao,” po wai. “Te nago mabo hagela homu ebaso da, teda ena digi saibao,” wai. 17 Te Eligo ogwa sigo te tiwai dwai kolesaga dabe te we bidi dabego te Genuai Bidiba ofa yainu sesali nai dabede tama tiai, tama Genuai Bidigo suali, augwali sigo sęgę te dwai nai mu gagawai yai.

18 Augwali sigo te tobage dwai sę tama yali, tiali goli, te sogo me te gesi ogwa wai Samuelgo te Genuai Bidigo sę eyu, tama agai te prisgo sę ebo ugwa gudama, te sę yai. 19 Te tigidali kibu bede te aga idago te aga bulubo ugwa me deli nigiyu yai. Tama te tigidali kibu bede te aga ida de aya sigo te ofa yagasu asobo sogo, te idago te holobo ugwa sela aselama, te Samuelbolo magasu yai dao. 20 Tama aga aya de ida si te Eli bidiboba pelama, tama agai te Godiba hanalu, te Godigo augwali siba wiegi yai bugagia ilao po wai. Agai Elkanabolo te tiwai po weyu yai, “Te eno homugo te Genuai Bidigo nago te wego wai meba ma ame nomainu ilaibao, nago te Genuai Bidiba mani ogwa hasegelimainu yaibao.” Eligo te po ola silibo si, teda augwa si buluba ma soyu yai dao. 21 Tialima, Genuai Bidigo Hana bugagia wiegi yai ilama, tama nosali Hanago ogwa sela me wegi si tama ame nani. Tama Samuel te Godigo sę idubadi, tama genuai dwasianu yali.

22 Te sogo te Eli monu dabe mu yai bidali. Tama hauwa sogo Eligo odali, te aga ogwa sigo dwai sę tigidali te Israel dabe dali ebo po wai. Tama me agai te tiwai po odali, augwali sigo te Godigo ugwa be sunumi tonalu sę ebo we dabe dali pibo po wai. 23 Tama agai te po augwali sibolo wai, “Magi baso dage sigo te tobage dwai kolesaga ebo dawe? Tigidali we bidigo te dage sigo ebo kolesaga po te enabolo wagasobao. 24 Te dage si eno wai, tama dage sigo te tebo kolesaga tagaliąo. Te Genuai Bidigo hani bagego te dage sigo ebo kolesaga po mimi bilibao, tama te dwai sę mu dao. 25 Te bidi me deligo gasa bidi dali dwai sę me ebaso da, teda Godigo te po isimainu elama, tama te sę dodoloyu ebo dao. Tiali goli, bidigo te Godiba dwai sę yali da, te niwai bidi te tomode dolalu, tama te dwai sę dodolaibawe?” Eligo augwali sibolo te tiwai po wali, tiali goli, te Genuai Bidigo augwali si ela muabo homu elama, tama agai augwali sigo tobolu te dila palama, tama augwali sigo te augwa ayago po me odobeo.

26 Te sogo te Samuel te genuai bidi dwasianu pedalubo gana ebaso, tama God dali te bidi dabego me aga godolo homu yali, tama augwaligo homu me te bomai homu mu igulali.

27 Nosali Genuai Bidi agai po te profet bidi me delibolo menama, tama aga tagala palama, te Elibolo wagasali. Genuai Bidigo po te tiwai po wai, “Te nago wąį nǫų Aron, te aga we wai hani sibi dali, te Isip king bidigo olo sę ebo bidi bidibadi, tama ena augwaliba pedelama, tama augwaliba te eno homude elalubo kolesagade po walai dao. 28 Tama dage te Israel hani tigidali tomode, eno te Arongo hani deli selama, tama augwali eno pris bidi hani nigilali. Tama augwaligo te altade te denami ilibo pauda hano ilibo sę emainu yali, tama ena pąba asobo sogo te prisgo gudubo ugwa gudama, asu yao wali. Tama eno po weyu, augwa te Israel dabego te ofa yainu altaba selasa asobo nai dage te augwa tuao po wai dao. *Sai 28:1-4; Prs 7:35-36 29 Tama tiali, te magi baso te dagego te ofa dabe eno te Israel dabebolo yao wali sę te magi baso dolobawe? Te nago ogwa sigo te tigidali ofa ebo nai wiegi yai te eno hani bidi dabego enabolo magasobo nai, te augwali sigo tulama, tama augwali si tigi nisalio. Tama nago augwali sigo te tama temainu yali. Tama te kolesagago nago te augwali si nogi ugwaba siyu, tama eno nogi aiyaba elalubao. Magi baso nago te kolesaga ebo dawe? 30 Ena God, te dage Israel dabego Genuai Bidi, polobadu eno po nago wąį nǫų Aron dali po dąų walali, tama aga hani dali me, te augwali hani sesemane te pris sę iduaibao wai. Tiali goli, megi eno te dąų walali po hasegelaibao. Megi eno te tiwai po obao, te eno nogi ugwaba sabo bidi da, teda eno agaba genuai nogi mawaibao. Tama ena dali hagoma homu ebo bidi da, teda eno aga aiyaba mu elalueibao.”

31 “Bugagia odao. Nosali eno te tigidali gesi bidi hani pris bidi me, te nago hani nosali pedalubo me, te eno aiyaba elaluama, dolaibao, tama nago hanide te bidi me deli bomo elaluyu, te monu dabe yai me bidigobeo. 32 Tama dage dwai noma siyu, tama eno te wiegi yai nai dabe te gasa Israel dabebolo mobaso, pesa yaibao, tama dagego me sogobeo. Tama tigidali sogo nosali te nage hani bidi deli te monu dabe pedelama, me bidigobeo. Mu menio. 33 Tama nosali eno te boi bidi dabe asomainu elama, te nago hani bidi tigidali ela mumainu yaibao. Tama bidi deli naga bididu, te pris sę iduaibao. Tama te tebo sę dabego te nago homu kolesaga dolama, tama nago gedu halua saibao. 34 Tama nosali nago ogwa si, Hopni me Finias, te augwali si te deli sogo bubugade naga isaibao,” wali. “Tama augwali si isibo sogode nago koneaibao, eno te wali po tigidali mu po da homu yaibao. 35 Tiali goli, eno te pris bidi me deli nigilama, tama agai homu enaba mu munama, tama eno homugo emainu ebo sę tigidali te agai yaibao. Tama eno te agai hani dabe te sesemane sogo pris bidada pomainu ilama, tama augwali te eno nigilali king bidi dali sę emainu yaibao. 36 Tama nago hanide niwai bidi me deli bidali da, te pris pageba pelama, tama agabolo gonoyu, te dwasianu mone po me, nai po me hanalu waibao. Tama augwaligo te prisbolo te tiwai po waibao, ‘Te nago da meba te pris sę emainu eyu, te da nai meba somainu yaibawe?’ God Genuai Bidigo te po wai,” te profet bidigo Elibolo te po wali.