1 Nosali Genuai Bidigo Samuelbolo te tiwai po wali, “Nago sesemane sogo te Solde haliga sęgę elaluai. Nisu sogo nago te haliga sęgę elalubo silaibawe? Eno aga sela sąwanio, tama eno gedude aga te Israel king munu ma bidibeo. Tialima, eno homugo megi nago te sipsip gąų me deli selama, tama tede te king bidi sa muabo oliv wel tabilao, tama nage pelama, Jesi sugi pao, te Betlehem bidi me deli, magi baso meni, eno te agai ogwa dabede te ogwa me deli te king pedalumainu nigilai dao,” wali.

2 Tiali goli, Samuelgo Genuai Bidiba te tiwai po wai, “Eno te sę mena tama egowe? Te Solgo eno tama tiali po odobaso da, teda agai ena ela muaibao.” Tialima, Genuai Bidigo agabolo te po wali, “Menio. Te bulmakau so kibu me deli te Betlehemba sela pelama, tama te taunde bidibo we bidibolo te tiwai po weyu, ‘Ena te Genuai Bidiba ofa yainu asai dao,’ po wao. 3 Tama nago Jesibolo hanalu, te ofa eboba asao olama, tama eno nagebolo te mena sę nago te Jesi dali yabo sę po waibao. Tama eno nagebolo te mena bidi nago te welgo te king nigilabo po waibao,” wali.

4 Tialima, Samuelgo te Genuai Bidigo po odama, tama hogodama, te Betlehemba pai. Aga sabaligi pabode, te taunde bidali tobolu bidi dabego te aga dali deliba gesabidi ununani. Augwali wi elama, dwai noma siyu, tama agabolo te po wali, “Haniani po page konebo bidi, magi yaliwe? Nage asali, te da wiegi yai bugagia ilagasu asaliwe, ma meniwe?” wali.

5 Tama Samuelgo te po wali, “Ena te Genuai Bidiba naga ofa ilagasu asali. Dage te duga digi te God gedude wiegi yai bolo ilama da, tama nosali dage ena dali asama, te ofa yagasao,” wali. Tama aga te Jesiba pelama, tama te Jesi dali aga ogomani me te Genuai Bidi gedude dwagi yai ilama, tama augwaliba hanalu te ofa yaboba asao wai. 6 Augwali sabola silama, tama te Genuai Bidi geduba dolagasali, tialima Samuelgo te Eliap, te Jesigo gomunai ogwa, sulama, te tiwai homu yali, ‘Te bidi tama, te Genuai Bidigo aga te king pedalumainu nigilali,’ te homu yalio.

7 Tiali goli, Genuai Bidigo agabolo te po wai, “Nago homugo aga te dili bobage bidi, ma aga te sawia pai suyu, tama eno aga nigilabo homu me egobeo. Menio, eno homugo te bidi king pedalumainu homu ebo hagela homu ebao. Magi baso meni, eno bidi dagalubo sę ebo te e tǫde bidigo bidi dagalubo tiwai gilama me tegobeo. Menio. Te bidi dabego te bidi tigiba tonono ebao. Tiali goli, eno te homu kolesaga me te bidigo kolesagade si sulama, tama eno augwali dagalaibao,” wali. *1 Sml 21:11; 29:5 8 Tama Jesigo te tomo ogwa Abinadap i wali, tama aga te Samuelba odasa asai. Tiali goli, Samuelgo te po wai, “Menio, Genuai Bidigo aga sa mubeo.” 9 Tama Jesigo te ogwa me te Sama te Samuelba odasa asali, tiali goli Samuelgo te po wai, “Menio. Aga me, te Genuai Bidigo sa me mubeo.” 10 Tialima, Jesigo aga gasa ogomani me si me si te Samuelba odasa asali, tama Samuelgo agabolo te po wai, “Genuai Bidigo te bidi dabe augwalide me deli te sa me mubeo.” 11 Tama Samuelgo Jesibolo te tiwai po wali, “Nago ogomani te tigidali tama naga dawe?” Tama Jesigo te po wali, “Menio. Te ogwa bidi ogwa me deli digi elalubao. Te augwa ama sabi bidi tama. Tiali goli, aga te sipsip dabe tonalubo sę ebao,” wali. Tialima, Samuelgo agabolo te po wali, “Tagalao. Te bidi me deli tagala palama, te aga odasa asao. Aga bolo asobo si da, te dago ofa yaibao,” wali.

12 Tialima, Jesigo te bidi me deli tagala palama, aga te ogwa sela asomainu yali. Jesigo te ogwa te gesi ogwa bidi, tama aga gesabidi te sawia pai mu elama, tama aga gedu te ula mu elama, tama aga tigi te wiegi yai mu yai. Tialima, Genuai Bidigo te tiwai po Samuelbolo wai, “Aga te bidi tama dao. Te king sa mubo wel selama, tama agaba muao,” wali.

13 Tialima, Samuelgo agai te selasa pali oliv wel selama, tama agai te wel te Devit toboluba te aga ama dede gedude gelali. Tama te sogode te Genuai Bidigo Mobo Bidi te agaba bomo elama bidagaselama, tama te Mobo Bidi agade nosali sesemane sogo bidada pali. Samuelgo wel te Devit toboluba munama da, teda Samuel te Ramaba ma pai.

14 Te sogo te Genuai Bidigo Mobo Bidigo te Sol tagalu, tama Genuai Bidigo te dwai haubo mobo me deli te Sol agaba tagala palama, tama aga homu kolesaga dolama, tama aga wi dwai ilali. 15 Tama Sol aga sę ebo bidi dabego agaba te tiwai po wai, “King o, dago koneani, Godigo te dwai haubo mobo me deli nageba tagala palama, tama nage dwai ilibao. 16 Tama nago homu usu da wida, teda da pelama, te string elalubo musik elibo bugagia mu koneai bidi me deli gegi paibao. Tama Godigo nageba te dwai haubo mobo tagala palubo sogo da, teda te bidigo te musik elibo si, tama nago homu kolesaga te wiegi yai ma pedaligi soaibao,” wali.

17 Tialima, Solgo aga sę bidi dabeba te tiwai po wai, “Te tama dao. Dage pelama, te musik bugagia elibo koneai bidi me deli gegegi pelama, tama aga enaba odasa asao,” wali.

18 Tama sę bidi me deligo Solbolo te po wali, “Eno te Betlehem bidi Jesigo ogwa me deli suai dao. Te gesi ogwa bidigo agai te musik elibo mu koneai. Tama aga te wiegi yai hwįbo bomai bidi da. Tama aga te wiegi yai po weyu, tama tonobo sawi yai bidi mu. Tama Genuai Bidi me aga dali bidibo dao,” wali.

19 Solgo te po odama, tama agai te bidi dabe tagala palu, te tiwai po Jesibolo wagi pali, “Nago te ogwa Devit, te sipsip dabe tonalubo bidi, eno homu nago aga te ena pageba tagala palao homu ebao,” te po wagi pali. 20 Tialima, Jesigo odama, tama Devit te Solba tagala palali. Agai Devitbolo te donki me deli mobadi, tama te bret meba te basket side pągąnama, tama te donki tudi badu daide kęnani. Tama me agai te Devitba te meme wali me deli augwaligo te wain buai te mani, tama gesi meme me deli me, tama agai Devitbolo weyu, te nai dabe te Solba wiegi yai homu tiwai ilama mao wai. 21 Tama Devit te Sol pageba sabolama, tama aga sę bidi pedelali. Tama Solgo te Devit godolo mu yali. Tama tiyu, agai Devitbolo te aga hwįbo sesemone sabilibo sę mawai dao. 22 Tama Solgo Jesiba po ola toliyu, te tiwai po wai, “Eno Devit godolo homu ebao. Tama tiyu, eno homugo nago aga te eno sę bidi bidimainu ilao,” wali. 23 Tialima, Devit Sol dali bidali. Tama Godigo te dwai haubo mobo te Solba tagala palobo sogo da, teda Devitgo te musik eliyu yai. Tama Solgo te musik elibo odobo sogo, teda te dwai haubo mobogo te Sol tagalubaso, tama aga homu kolesaga wiegi yai ma pedaliyu, tama aga usu ma eyu yai dao.