1 Dago abagi dede o, te da dage dali bidibadi dago dagebolo dago Genuai Bidi asobo po wai. Tama tibaso, agai asobo sogode dago dagebolo po me asęgobeo. 2 Menio. Duga digi koneai dao, Genuai Bidi asabo sogo te nai wi sabo bidi hulide geme polo asobo tiwai yaibao. *Mat 24:43; Luk 12:39; 2 Pi 3:10 3 Tama te Godigo po wali pisiąwai we bidi augwaligo te po waibao, “Megi te da bugagia bidabo sogo dao, te da dolabo nai pąba asogobeo,” te po waibao. Tiali goli, augwaligo te tobage po obadi, sisi isiąwai, te sogo digi tama augwali dolabo nai polo augwaliba pedalaibao, augwali noma mu saibao. Te wede ebo sę tiwai, we mego wai ame nainogo tigide ebo dene tiwai ebo si pedelaibao, tama te we te dene wi pabo tų menio, wi sana pogobeo. Tama te tiwai te Genuai Bidi asobo sogode te Godigo po wali pisiąwai bage augwali wi pabo tų menio.

4 Tiali ma, abagi dede, dage hulide bidibo menio, te Genuai Bidi asabo sogo te nai wi sabo bidi tiwai geme eyu, polo aselama, dage noma sogobe. Menio. Dage te hulide bidibeo. 5 Te menio. Dage tigidali we bidi giligade ula dali bidibo dao. Da be hulia sai digi huli tomode me bidibo menio. 6 Tama tibaso, da sisi eyu, godege piabuo, te gasa sisi isiąma godege pibo we bidi tiwai. Tama dago gedu pedaluyu, bugagia tonaluyu, tama dago homu kolesaga wiegi yai mu elama, bidao. 7 Dago koneai, godege pibo bidi augwali hulide pibo dao. Tama bomo yai ąį tulama aiyoge ebo bidi, te bidi dabe augwali te hulide naga te sę ebo dao. 8 Tiali ma, da ulade bidibo bidi dao. Tama tibaso, dago homu kolesaga wiegi yai mu elama bidinao. Te hwįbo bidi aga hagawiade te boi bidigo elidali weyu mubo nai tiwai, tama dago Godide konealubo po bugagia selama, we bidi dali dwagi yai homu ebo kolesaga eyu, bugagia bidinao. Tebo sę si te dago hagawiade muabo dila pai nai tiwai dao. Tama Godigo da ma sabo homu bomo eyu, agai te sogo da somainogo dago tonaluinao. Tama te homu kolesaga tiwai, te dago tobolude muabo dila pai kapa madi tiwai dao, te hwįbo sogo da tau somainogo. *Ais 59:17; Ef 6:13-17 9-10 Magi baso menio. God agai da bodolu mani te dago agai homu sębę ebo dago somainogo ebo menio. Woo, agai da sa muyu, te homu yai, augwaligo Genuai Bidi Jisas Krais agai augwali tobade isilama, tama augwali ma saibao, God agai te homu elama, da sa muani. Tama Genuai Bidi aga ma asobo sogo da bidiyu da, ma da isali da, te sogo da aga dali hodobo bidada peyu, mu bidada pomainogo, Godigo da sa muani. 11 Tama tibaso, duga hasi te pogo duga abagi dabe augwali homu kolesaga dąų waliyu, tau siyu, te po augwalibolo ola mao, tama megi dagego te ebo sę tiwai tama naga yao.

12 Dago abagi dabe, dago dagebolo te po obao, dage tomode Godigo sę ebo bidi dabe dologode dage bidao. Genuai Bidi agai te bidi dabe augwali dagego tobolu bidi nigilama bidai, tama te bidi dabe augwaligo Godigo po dagebolo ola mayu, dagego homu kolesaga dodolobo dao. 13 Dagego homugo augwaligo sę ebo kone palao, augwaligo te sę eyu, dage tau sabo sę dao. Tama dagego augwali dali dwagi yai homu mu elama, augwali godolo mu yao. Tama dagego duga abagi dabe augwali dali deli homu elama bidao.

14 Dago abagi dage tuni bidi dabebolo dago po bomo elama dage dali obao. Dagego te sę hagela ebo bidi dabe augwalibolo po bomo elama, augwali homu kolesaga dagego bugagia ma dodolao. Tama te wi ebo bidi dabe augwaligo homu kolesaga dąų walao. Tama te bomo meni yai bidi dabe augwali dali dagego dwagi yai kolesaga naga eyu bidao, sębę egimio. 15 Gasa bidi dabe augwaligo dage dali dwai sę ebaso da, dagego augwali dali te dwai sę ebo wei ponogio. Dagego te tiwai idali weyu, bugagia tonaluao. Tigidali sogo dagego bomo elama, duga hasi augwali dali dwagi yai sę naga yao. Tama te sę tiwai tigidali bidi dali me yao. 16 Tama tiyu, sesemane sogo dage dwagi yai homu elama bidao, 17 te dagego sesemane sogo gedu haluasa po bidada peyu me, God dali po wao. 18 Te dage dali magi sę me ebaso da, dagego God dali buba hwi po wao. Te dage Krais Jisasde wadolama, tama God agai homugo dagego tama kolesaga emainogo tebo dao.

19 Dagego te Godigo Dwagi Yai Mobo Bidigo sę ebo paligio. 20 Bidi dabe augwaligo ‘Te God agai enabolo wali po eno dagebolo pusaibao’ obaso da, teda dagego te po olo sela sągio. 21 Tialima dagego te tobage po wabo tigidali bugagia osola suao. Tama dwagi yai po naga dagego dąų ola siyu, 22 tama dwai sę tigidali tagalama, sela sąyao.

23 Te God aga te dwagi yai homu nagame ebo kolesaga page bidi mu dao. Tama eno homugo te God aga digi dage doloba pai mu ilaibao, aga tiwai bidimainogo yaibao. Tama eno homugo agai dagego homu kolesaga tomode sę ebo mobo bidi me, te dagego noma bidi me, te dagego tigi me God agai bugagia tonaluaibao, tama dage dwagi yai mu bidimainogo. Tama dago Genuai Bidi Jisas Krais ma asobo sogo te dage magi dwai sę isiąwai we bidi tiwai bidaibao. 24 Tama te dage i wali God agai te sę dage dali mu tiwaibao. Magi baso meni. God agai te tigidali sę yaibao wali, te sę tigidali agai ebo dao.

25 Dago abagi dabeo, dagego God agai da tau somainogo gedu haluasa po wao. 26 Dagego tede bidibo Godigo we bidi dali dwagi yai homu eyu, tama augwalibolo nogo maiąo. 27 Ena da te Genuai Bidigo po sela pabo bidi dao. Tama tibaso, eno dage dali e po obao, eno te asęani po te tigidali abagi dabe augwali dali nedao. 28 Eno homugo te dago Genuai Bidi Jisas Krais agai olo tau sabo kolesaga dage dali bidaibao. Ena Pol dao.