1 Te king Rehoboam aga bomai king pedelama, te kantri Juda bugagia tonalubo sogo da, teda aga dali aga we bidi dabe dali augwaligo Genuai Bidigo bomai poba tudi ola mani. 2 Tama te Rehoboam aga king bidibadi kibu be nogo a naga wabode, Sisak, te Isip king bidi, aga ami bidi dabe dali augwali aselama, Jerusalemba hwįagasali. Te sę pedelali da, magi baso meni, Juda dabe augwaligo Genuai Bidigo po sela sąnama hagoma ebaso tiai dao. 3 King Sisak aga geninama ami bidi dabe dali mu asali, te bidigo nedabo usu meni yai. Tama me agai 1,200 hwįbo karis elaluali, me 60,000 ami te hosde dualama hwįabo ami dao. Te ami bidi dabe te kantri Isip bidi, meba te kantri Libia, me kantri Suki bidi, meba te kantri Sudan ami bidi dabe dao. 4 Te ami bidi dabe augwaligo hwįnama, augwali bomai obo yai hanu dabe sesa pali, te kantri Judade. Tama augwali Jerusalem pąba sabolagasali.

5 Te Juda dabego tobolu bidi dabe augwali Sisakde wi elama, wi solama, Jerusalemba Rehoboam dali bidagasali. Tama tialima, Godigo profet bidi aga nogi Semaia agai augwali sugi pelama, e tama po augwalibolo walali. “Genuai Bidigo e tama po wali, ‘Dagego ena tudi ola mani, tama tibaso megi eno dage tudi ola mani dao, tama eno Sisakgo dage aiyaba elalumainogo yali dao,’ Genuai Bidigo te po wali,” te Semaiago te po wai. 6 King dali aga tobolu bidi dabe dali, augwaligo te po odama, augwaligo e tama po wali, “Mu tama dao. Dago genuai sęgę mu elalubao, tama Genuai Bidigo ebo kolesaga te dolo mu dao,” te po wali.

7 Te Genuai Bidigo augwaligo augwa digi augwa aiyaba mubo suali, tama agai gasa po me te profet Semaiabolo e tama po mani, “Eno augwaligo augwa digi augwa aiyaba ma elalubo sualio. Tama tialima, eno augwali dologobeo. Te Sisakgo te Jerusalemba hwįagasobaso da, teda eno augwali mu dolomainogo egobeo. Mu tama, eno augwali dali sębę mu yai goli, eno Sisakgo te hanu Jerusalem mu dolomainu eno agai nogoba mugobeo. Menio. 8 Eno Sisakgo augwali aiyaba elaluama, tama augwali agai sę bidi dabe pedalomainu yaibao. Tama te ebo kolesagago augwaligo koneaibao, augwali eno sę bidi bidibo kolesaga te wiegi yai dao waibao, tiali goli tǫde king bidi dabego sę bidi bidibo te kolesaga te dwai dao, te homu yaibao,” Genuai Bidigo te po wai. 9 Tialima te king Sisak aga ami bidi dabe dali augwali te Jerusalemba hwįagasali. Tama augwaligo augwali aiyaba elaluama, tama augwaligo te Genuai Bidigo tempel bede me kingo bede wiegi wiegi yai nai dabe tigidali sali. Tama me augwaligo te Solomongo nigali sabele te golgo mesegelali te sabele dabe me sali. Tama augwaligo te nai dabe te Isip buluba selasa pali. *1 Kin 10:16-17; 2 Sto 9:15-16 10 Tiali goli te sę yai nosali badu, te king Rehoboamgo aga sę bidi dabebolo olama, augwaligo te bras me ni name dabe selama, te hwįabo sabele dabe nigali, te Isip dabego te sela pali te sabele ni dage dabe hasegelama nigali. Tama ami ofisa bidi dabego te kingo be sunumi tonalubo bidi dabebolo mani, tama augwaligo te sabele ni dage dabe tonalubo sę yali. 11 Tama te king aga Genuai Bidigo tempel beba painogo ebo sogo da, teda te tonalubo bidigo te sabele ni dabe selama, aga dali peyu ebo dao. Tama te king aga aga beba ma pabo sogo da, te tonalubo bidi dabego te sabele ni dage te wasman dabego be habuba ma sela peyu ebo dao. 12 Genuai Bidigo king Rehoboamgo aga digi aga aiyaba elaluama tama aga dologode bidibo suali. Tama me agai meba wiegi yai kolesaga te kantri Judade elalubo suali. Tama tibaso, augwali dali aga sębę me ebeo, te Rehoboam dali, tama agai aga mu dolama tagalobeo.

13 Rehoboam aga Jerusalemde bidiyu, aga bomai king mu pedelali. Aga te king pedelali sogo aga te kibu be 41 elaluali, tama aga king te 17 kibu be bidali. Aga Jerusalemde bidali, Genuai Bidigo te hanu te kantri Israel tomode mu sa muani. Te da te tigidali Israel dabe aga pąba sisinama lotu wagasiyu yabo pesage. Rehoboam aga ida te kantri Amon bulu we dao, te aga nogi te Nama dao. 14 Rehoboamgo dwai kolesaga Genuai Bidigo gedude yali. Magi baso meni, agai Genuai Bidigo homu kolesaga wali pabo homu ebeo.

15 Te king Rehoboamgo po dabe aga te king pedelali tedu gagalasa yali sę dabe te buku me augwaligo te profet Semaia me profet Ido sigo po bukude elalubao, te aga king pedelalidu isaliba sabolali po sese asęai te elalubao. Tama te bukude te kingo hani wąįgo nogi lista nigai te elalubao. Te king Rehoboam me king Jeroboam Israel bidi si king bidali side da, augwali si sesemane sogo hwįyu yai dao. 16 Tama nosali Rehoboam isali, tama augwaligo aga te Devitgo hanude pubulali. Tama aga ogwa Abiyago agai pesage selama king pedelali.