1 Te Amasia aga king pedelali sogo agai kibu be 25 elaluali, tama aga Jerusalemde king bidibadi 29 kibu be yali. Aga ida te Jehoadin dao, te taun Jerusalem we me deli dao. 2 Amasiago Genuai Bidigo gedude wiegi yai kolesaga yali. Tiali goli agai te kolesaga wali pabo bomo mu meni yai.

3 Tama Amasia agai te kantri Juda tonalubo bomo ebo sogo, agai pode augwaligo te agai aya king Joas ela muani ofisa bidi dabe ela muani. 4 Tiali goli agai te ofisa dabego wai dabe elebeo. Menio. Agai augwali bidimainu sula tagalali. Agai te Genuai Bidigo bomai po polobadu Mosesgo te Israel dabebolo mani po wali pali. Genuai Bidigo te po da e tama wai dao, “Te bidi mego waigo dwai sę elama tama bidi me ela muai baso da, teda dagego wei ponoyu aga ida aya ela munamo dao. Te tama tiwai naga, aga ida ayago dwai sę yai baso da, teda dagego augwa wai puluba elamo dao. Te bidigo te dwai sę yali da, te bidi deli naga dagego ela muiąo,” te bomai po te tama wali pali. *Bom 24:16

5 Te king Amasiago tigidali Juda hani dabe me tigidali Benjamin hani sisinagasiąo po wali. Te augwali sisina silagasabo si, agai te bidi dabe te kibu be 20 me 20 kibu be edelai bidi dabe aga selama sa muani, tama augwali agai ami haniba muani. Tama agai te ofisa bidi dabe sa muani, te augwali meba deli deligo te 1,000 bidi dabe tonaluyu, mebago 100 bidi dabe tonaluyu yabo sa muani. Tama agai deli deli ofisa dologode deli deli hani bidi dabe muyu muyu ela pali. Tama tigidali ami bidi dabe sesego namba te 300,000 usu nama elaluali. Tama te bage augwali bugagia hwįyu, me augwaligo enego me sabele ni name dage dabe dali bugagia mu hwįbo bage dao. 6 Tama me agai 100,000 wiegi yai ami bidi dabe te kantri Israelde sali. Agai augwali silvago abelali, te silvago sęgę te 3,000 kilogram edelai dao. 7 Tiali goli profet mego kingbolo te po wagi pali, “Nago te Israel dabego ami nage dali boiba odasa pigio. Magi baso meni, te kantri Israel bidi dabe augwali Genuai Bidi dologode bidibo menio, tama tibaso God augwali dali bidibo menio. 8 Tiali goli nago homugo augwali hwįabo bomai hani mu dao homu iyu da, teda nago augwali odasa pao. Tiali goli nago koneao. Godigo te boi bidi dabego nage elalumainu yaibao. Magi baso meni. God agaduba deligo naga bidi aiyaba elaluabo me ugwa ela holabo sę ilibo dao,” te profet bidigo te po wali.

9 Amasiago te po odama, tama agai te profetbolo te po hanalu wali, “Tiali goli, eno te Israel dabe ami bidi dabebolo mani, te silva dabe magi yaibawe?” Tama profetgo Amasiago po wei ponoyu, te po wali, “Nage moni homu igio. Genuai Bidigo nage silva hauwa mu mabo usu yaibao, nago augwali mani te silva edelama mu mabo usu yagameo,” wali. 10 Tama tialima Amasiago te ami bidi dabe augwali augwa buluba ma tagala palali. Tama augwaligo Juda dabe dali sębę genuai mu yali, magi baso meni, augwaligo te hwįboba pelama doado bage sabo tų megi paliali.

11 Tialima nosali Amasia aga homu dąų olama, tama agai aga ami dabe te bulu te Tamu Hauwa Elalubo buluba odasa pali, te Idom dabe dali hwįainogo. Tama augwaligo Idom dabego ami bidi 10,000 ela isilali. 12 Tama augwaligo gasa 10,000 Idom ami bidi kalabus elama bulu du meba odasa pali. Tama augwaligo te Idom dabe te sau pado dwai pesagedu aba sąyani, tama augwali isilama, tama augwaligo tigi dabe sese togoa pali.

13 Tama te Amasia aga ami bidi dabe dali augwali te Idomba hwįgi pali sogo, te Israel dabe ami bidi te Amasiago augwali ma tagala palali, te ami bidi dabe augwali ma aselama, Juda dabego taun dabeba hwįagasali. Te taun Samariadu gagalama, te taun Bethoronba usu nigi pali. Tama augwaligo 3,000 we bidi ela munama, tama augwaligo te taun dabede wiegi yai nai dabe hauwa mu sali, tama augwa sela pali.

14 Te Amasiago Idom dabe aiyaba elalubo si, agai te Idom dabego tibo god dabe agai Juda buluba ma sesali. Tama agai augwaliba lotu po weyu, me wiegi yai denami ebo pauda uluyu yali, te augwali ofa tiwai yali. 15 Genuai Bidigo king Amasiago ebo kolesaga sulama, agai aga dali sębę mu yali. Tama tialima Genuai Bidigo profet me deli tagala palama, te Amasiabolo te po waligi pali, “Magi baso naga gasa hanigo tibo godiba lotu po obawe? Te god dabego augwa we bidi tau selama, nago nogode dobola sabo suai menio, nago polo koneani. Tama tialima, nago magi baso augwaliba lotu obawe?” wali.

16 Profetgo po odubadi tama Amasiago agai po togoyu, te po wali, “Dego nage enabolo kolesaga mabo bidi nigilai dawe? Nage penane pania sao. Tiyu, eno ami bidi me delibolo nage elama isila po wai dalio,” wali. Profetgo te po odama, aga penane pania sainogo, hasia bolo agai kingbolo te po walali, “Megi da, eno koneanio, Godigo nage dolainogo yalio, magi baso meni, nago dwai kolesaga elama, tama megi nago eno po odobo hagela yalio,” wali.

17 Te king Amasia aga ofisa dabego homu hanaluama, tama agai ami bidi dabe Jehoas pageba tagala palali, te Israel dabego king pageba. King Jehoas aga te Joahasgo ogwa dao, te wąį Jehugo ogwago wai. Te bidi dabe augwali te Jehoas pageba saboligi pelama, augwaligo agabolo te po walali, “King Amasiago dage Israel dabe dali hwįaio po walio,” te po wali. 18 King Jehoasgo te king Amasiago po wei ponoyu, te po digi po begelama agabolo ola tolali, “Te kantri Lebanonde te nosai me sesane yai nosaigo te moni genuai bǫ ni me delibolo po ola toliyu te po wali, ‘Eno homugo nago eno ogwabolo nago wegi mao homu ebao, tama augwali si we de bidi si bidimainu,’ tama wali. Tiali goli nosaigo te po wai nosali badu, te bulu hasa genuai me tedu soayu te nosai agayali, tama te nosai doali.” 19 Jehoas agai te po begelama wali, tama agai Amasiabolo po wadolama weyu te po wali, “Eno koneani, nago te Idom dabe dali hwįnama tama nago augwali aiyaba elaluali. Tama tialima nage wiegi yai homu pemene elama, tama nage tobolu gagea pelama, tama naga nogi genina ugwaba mu te sabao. Tiali goli megi da, nage naga bulude bugagia bidao. Te da dali hwįainu ebo tagalao. Tiyu, nage dolabuo, tama nago Juda dabe me dolomainu ilabuo,” Jehoasgo te po ola tolali.

20 Tiali goli Amasiago Jehoasgo po odobo hagela yali. Te po page e dao. Godigo Juda dabe te boi bidi dabego nogoba muabo homu polo yai dao. Magi baso meni, augwaligo Idom dabego tibo godiba lotu wali pode. 21 Tama tialima, Jehoas te Israel dabe augwali te taun Betsemes te kantri Juda buluba pelama, tama augwaligo Amasia me aga ami bage dali augwaligo hwįgi pali. 22 Augwali hwį hwį pelama, Israel dabego Juda dabe aiyaba elaluali. Tama Juda dabego ami bidi dabe augwa buluba ma wi pali. 23 Tama Jehoasgo Amasia pagabi elama kalabus ilali. Tama nosali, Jehoas aga te Israel ami bidi dabe dali augwaligo te Amasia selama, tama augwaligo Betsemes tagalama, Jerusalemba pali. Tama augwaligo te taun obo meba hųgiali. Te Efraimgo Sunumidu gagalama pelama, te Konago Sunumiba usu nigi pali. Augwaligo te hųgiali te obo dąį da, te 200 mita tama usu nama ganama dao. 24 Tama Jehoas aga Jerusalem tomoba pelama, tama te taunde munaluali te gol me silva dabe tigidali tama sali. Agai te Godigo tempel bede dis o pou dabe me siyu, me plet dabe me siyu yali, te Obetidomgo hanigo tonalubo nai dabe. Tama me agai kingo mone mubo be habude munalubo nai dabe sali. Tama agai te Juda dabego tobolu bidi dabe me kalabus elama, augwaligo oda selama, te Samariaba ma sela pali. 25 Nosali Israel dabego king Jehoas aga isali, tama Juda dabego king Amasia aga 15 kibu be ma bidama, tama nosali augwaligo aga elama isilali. 26 Te king Amasiago yali sę po dabe te aga king pedelalidu yali sę dabedu tama gagalama, tama aga isaliba usu nagasali po, te buku augwaligo nogi ebo te Juda de Israel Hani Sigo King Dabego Buku wabo bukude te elalubao.

27 Te king Amasiago Genuai Bidiba tudi ola mabo si da, bidi mebago aga Jerusalemde ela muabo po pesela sali. Agai augwaligo te sę yaibao po wabo odali. Tama tibaso, aga taun Lakisba wi pali. Tiali goli aga te boi bidi dabego bidi meba aga wali te taun Lakisba pelama, tama aga tede ela muani. 28 Tama bidi mebago agai tigi te hosde munama, tama Jerusalemba sela pali. Tama augwaligo aga te aga wąį dabego gų pagede pubulali.