Jongo Si Sogo Pas Asęani
Hasia nedebo tau sabo po
E pas asęani bidigo aga digi nogi tiwai wabo “Ena monu dabe dao,” tama weyu, tama dago homu te aga Jon dao. Agai e pas hasia nedali we bidi tau somainogo eyu, tama te Kraisde polobadu ola mani po tagaluyu gasa po ola mabo bidi dabe augwalide dua dao wali. Te tobage tibo po ola mabo bage dali kisasa biligio wali.
Dago Godigo po mu dąų ola sai elalu tama te bidi dabego te tobage gasa po pusubo side dua dao
1
1 Ena monu dabe bidiyu, tama ena Jisasgo sę ebo tobolu bidi, te eno te Godigo dią sali we dali nago wai puluba dali, te dagebolo e po asęna tolobao. Eno homu mu eyu, dage dali dwagi yai homu eyu godolo mu ebao. Tama eno naga te kolesaga dage dali ebo menio. Tigidali Godigo mu po koneani we bidi augwaligo me dwagi yai homu dage dali ebo dao. 2 Magi baso meni, te Godigo mu po da dali bidibo dao, tama sesemane sogo da dali mu bidada peyu, bidada paibao, tama tiyu dago dwagi yai homu dage dali ebao.
3 Dago Aya God dali, te Aya aga Ogwa Jisas Krais dali, augwali sigo da dali olo tau sabo kolesaga dali, te homu dene eyu tau mabo kolesaga me, te bidi homu dwagi yai nagamea ilibo kolesaga me, te kolesaga sela da dali augwaligo yaibao. Tama dago Godigo mu po koneyu, tama dena hasi dwagi yai homu eyu godolo ebo kolesaga ebadi, augwaligo te kolesaga da dali yaibao.
Dago dena hasi dwagi yai homu eyu bidiąo
4 Eno odali, nago wai dabe meba augwaligo Ayago dabolo “Tama tiao” wali po odoyu, tama augwaligo te mu po wali peyu bidibo dao. Tama odolama, eno dwagi yai homu yai. 5 Nage we, megi eno nagebolo e po ma obao, da tigidaligo dena hasi abagi dali dwagi yai homu eyu godolo yao. Eno gesi bomo yai po nagebolo asęna mabeo. Menio. Te dago Godigo po odobo gagalali sogo dago te bomo yai po odai dao. *Jon 13:34; 15:12, 17 6 Te we bidi dali dwagi yai homu eyu godolo ebo kolesaga page e dao: dago Godigo bomo yai po dabe wali peyu bidao. Tama te Godigo po odobo gagalali sogo dąį elama, tama megi e sogoba usu nagaselama, dagego te bomo yai po e tiwai odai dao, dagego te dwagi yai homu eyu godolo ebo kolesaga eyu bidao.
7 Magi baso meni. Bidi hauwa augwaligo da dwai sę tomoba kegainogo eyu tibo po ola mabo bidi dabe, augwali haniani tǫba augwaligo po pusigi pai dao. Tama augwaligo “Te Jisas Krais e tǫba asama bidali te bidi mugo tigi sali, te da bidi dabego tigi tiwai sali,” te po wabo augwaligo hagela ebo dao, te po page hogwa sabo dao. Te tobage bidi aga te tibo po wabo bidi, tama agai Krais dali boi bidi ebo bidi dao. 8 Tama tibaso, dage dua dao. Dagego sę elama tama te Godigo dagebolo maiabo nai tagalabuo. Te menio. Dagego dwagi yai sabo nai mu sese somainogo dage dua dao.
9 Bidi mego Kraisgo ola mani po tagalama, tama agai gasa poba begegi pai, te tobage bidi God te bidi dali bidibo menio. Niwai bidi me deli agai Kraisgo po dali homu kęą pai bidi, te bidi te Aya dali aga Ogwa dali augwali si te bidi dali bidibo dao. 10 Tama tibaso, bidi me deli dage bidibo digi pedalama, tama agai Kraisgo ola mani po dagebolo sela asisąma olo asobaso da, dagego beba te bidi odasa pigio. Tama me dagego aga dali dwagi yai homu elama nage bugagia bidao po wagio. 11 Magi baso meni. Bidigo te tiwai bidi dali dwagi yai homu elama siade dao po wabo bidi, te agai te bidigo dwai sę ebo tau sabo bidi pedalaibao.
Po silagasu wabo po
12 Eno dagebolo pusubo po hauwa me elalubao. Tiali goli eno te po dagebolo asęna tolobo hagela homu ebo. Eno dage suagasobo homu ebao. Tama eyu, tama dagego gesabide eno te po dagebolo pusaibao, tama da tigidali te dwagi yai homu mu yaibao.
13 Godigo nago ama aga dią sali. Tama nago te amago wai dabe augwaligo nage dali dwagi yai homu elama, bugagia bidao po nagebolo tolobao. Te tama dao.