1 Te sę dabe elama nosali badu, te tigidali Israel hanigo te Devit Hebronba suagasali. Tama augwa te tama po Devitba wai, “Da tigidali te deli kaneme dao. 2 Polobadu, Sol te king bidali sogo, tialima naga digi te da Israel ami bidi dabe tonalu, tama augwali te hwįbo madiba odasa peyu yai. Tama Genuai Bidigo nageba weyu, te aga we bidi dabe da tonalubo bidi nage pedelama, tama nage dago king pedelaiba po wai dao,” augwaligo te po wai.

3 Tama nosali, te tigidali Israel polalubo tobolu bidi dabe aselama, te king Devit bidibo madi te Hebronba sisinagasali. Tama agai te God gedude te bomai po me deli augwali dali dąų wali. Tama augwaligo aga toboluba te wel gelama, te aga Israel king pedalumainu sa muyu nigilali. 4 Devitgo kibu be te bidi sese deli olama, nogo si, te 30 kibu be elalubadi, tama aga te king pedelali. Tama aga te king sęde bidibadi, te kibu be bidi sese si, te 40 kibu be bidai dao. 5 Devit te Hebronde king bidibadi, te kibu be 7 olama, te polua nogo a naga olama, me deli tede bidali. Tama aga te Jerusalemde king bidali kibu be te 33 kibu be tama te Israel me Juda dabe dali tonalubo king bidi bidai dao. *1 Kin 2:11; 1 Sto 3:4; 29:27

6 Me sogo deli sogo king Devit te aga ami bidi dali te Jerusalem taun sainu hwįgi pali. Jerusalem te Jebus dabego augwa page bulu da. Te Jebus dabego homugo Devitgo te augwaligo taun sabo usu egobe da homu yai, tama tiyu, augwa te tiwai posobo po Devitba wali, “Dage te dago taun tomoba asainu ebaso, te usu me egobeo. Te gedu widai bidigo me, te sągą dwai bidi dabego, te augwaligo dage asabo sunumi panibaso, te usu yaibao,” wali. *Jos 15:63; Tob 1:21 7 Tiali goli, augwaligo po te geda muani, magi baso meni, Devit dali, te aga ami bidi dabe dali, hwįgi pelama, tama te bomai masigigo bagulai obo elaluali taun salio. Te taun nogi Saion, te Jerusalem bulu me badu pedai dao. Tiali goli, nosali te we bidi dabego te tiwai nogi polali, Devitgo Taun da wali. 8 Tama Devitgo te taun me sisąbadi, hasia bolo agai te aga ami bidi dabebolo te tiwai po wai, “Dago te taun sainogo da, teda da te Jebus dabe augwa hanu tomoba asobo wę dedage nigalidu geme paibao,” wai. “Tama dago te dedage wali pidu genama, tama da te taun tomoba sabolaibao. Tama dago te u gedu widai bidi dabe dali, me te sągą dwai bidi dabe dali hwįaibao. Eno te tobage bidi wei eyu, godolo me ebeo,” wali. Megi da, Devitgo te wali po homude kone elaluama, tama augwa te tiwai po weyu yai, “Te gedu widai bidi me sągą dwai bidi dabe te genuai bidi kingo be tomoba munu me pelamu da,” po wabo dao.

9 Tama nosali, Devit te Saionba bidigi pelama, tama te taunba te tiwai nogi mawai, Te Devitgo Taun da wali. Tama Devitgo te po wali, tama te sę bidi dabego te taun bagulama, be dabe sę yao po wai. Augwaligo te be dabe sę ebo gagalu, te tǫgo pągąnani bulu me deli odogode te be dabe sę yani. 10 God, te Tigidali Bomo Elalubo Genuai Bidi, te Devit dali bidali, tama tibaso Devit te bomai king sesemane sogo pedalubo sę iduai dao.

11 Te king Hiram te Tair taun bidigo te polalubo bidi meba te Devitba tagala palali. Tama agai te wiegi yai ni bǫ tigi dabe me, te be sę ebo kamda bidi me, te masigide sę ebo koneai bidi dabe augwali tagala palama, te king Devitgo genuai be sę emainu yai. 12 Devitgo te nai dabe te doado bage te agaba sabalubo te tiwai aga sulama, tama koneani, te Genuai Bidigo aga te king mu pedalumainu yai. Tama agai te tama koneani, te Genuai Bidigo te aga we bidi tau sabo homu yali homu yai, tama tiyu, Genuai Bidigo te Israel bulu tǫ pedai te bugagia mu pedalumainu ilibo sę yai dao.

13 Te Devit Hebronde bidali tagalama, te Jerusalemba aselama, bidagasali sogo, agai te we meba ma siyu, tama agai te we hani si meba ma sai. Tama aga te we dabego te ogomani me wegi mani meba te Jerusalemde bidu ame nani. 14 Te ogwa dabego nogi te e tiwai elaluali, Samua, me Sobap, me Natan, me Solomon, 15 me Iphar, me Elisua, me Nefek, me Jafia, 16 me Elisama, me Eliada, me Elifelet. Te Devitgo ogwa dabego nogi dao.

17 Te Filistia dabego te tama po odoyu, te Israel dabego te Devit te augwa king bidi nigilali po odobaso, tama te Filistia dabe hogodama, te hwįgi pelama, aga sainu yai. Tiali goli, Devitgo augwaligo te sę yabo koneama, te geme duala sigi pabo bomai pesageba dulama, tede bididuai. 18 Tama te Filistia dabe aselama, augwali te bulu pesage Refaim odogoba sabolama, tama augwali tede bidaluai. 19 Tialima, Devitgo Genuai Bidiba te tama po hanalu wali, “Nago homugo eno te Filistia dabeba hwįgi pomainu homu ebawe? Tama ena pobaso da, teda nago ena tau siyu, te augwali aiyaba elalumainu yaibawe?” Tama Genuai Bidigo te tama po agaba wei ponani, “Awe, nage pao. Te augwali nage nogoba eno munama, tama te nago augwali aiyaba mu elalueibao,” wali.

20 Tialima, Devitgo te Filistia dabe augwaliba hwįgi pelama, tama augwali aiyaba elaluai. Tama agai te tama po wai, “Genuai Bidi te wę bomo asobo tiwai elama, tama eno boi bidi hani dabe pedelama togolali.” Tama tiyu, augwaligo te bulu nogi te tiwai nogi yali, Te Genuai Bidigo Te Hani Togolai Dao. 21 Te Filistia dabe wi peyu, te augwa tibo god dabe taga pali. Tama Devit dali te aga ami bidi dabego te doado bage selasa palio.

22 Tiali goli, nosali te Filistia dabe ma geasa aselama, te Refaim bulu odogode bidali. 23 Tama Devitgo Genuai Bidiba hanalu, te po wali, “Te eno magi yagawe?” Tama Genuai Bidigo te po wei ponoyu, te tiwai po wai, “Dagego augwaliba hwįgi pao, tiali goli dage augwali bidibo dolo si me pelamuo. Dage te augwali tudi badu pelama, tama te ni balsam sili dolalubo pesage badu pelama, te hwįabo sisi elaluiąo,” wali. 24 “Tama dagego te ni dabe ugwadu daide te hauwa bidi bilibo kilikili wabo tiwai odaibao. Tialima, dagego koneama, ena digi ena te dage Filistia dabe dali hwįgi pabodu te ena polasa paibao. Dagego te tiwai sę ebo po odobo si da, teda dage udayu, te augwaliba hwįgi piąo,” wali. 25 Tialima, Devitgo te Genuai Bidigo po odama, tama te Israel dabego te Filistia dabe pobeasa pelama, tama augwali dolali, te Geba taunde gagalasa pali, te Geser taunba usu nigi palio.