5
Tiyu odolali nago ugwadu homugo God dali po dąų wagio
1 Nago te Godigo beba pabo sogo, naga yali kolesaga bugagia homu kone palama pao. Tiyu nage odolali pabuo. Te nago kolesaga sainu pobaso, te wiegi yai da, tiali goli te odolali ofa ebo tagalao, te kolesaga sisąwai bidi dabego elalubo kolesaga tiwai igio. Te tobage bidi dabe augwaligo te mena sę te Godigo gedude dolo elalusiąbo da, te homu konebeo.
2 Homu kone bugagia bolo palama,
tama nosali nage hogodama, po pusao.
Te nago God dali po mibo sogo,
nago po hauwa odolali wagio.
Magi baso meni,
dagalude bidibo Godigo bomo genuai elalubao,
tama da olo bidi e tǫde naga bidibao.
Tibaso, nago po hauwa aga dali me olamo dao.
3 Te nai hauwade nago moni homu
hauwa dogia peyu da, te nago na hauwa yabuo.
Te nago po me hauwa obaso da,
teda nago po gani bole odolali weyu,
te wabo pabo bidigo po wabo tiwai igio wali.
4 Te nago Godiba po dąų wai digi, nago te dąų wali po polo usu nao. Godigo te dwagi yai homu kolesaga sabo hagela homu ebo bidi dali dwagi yai homu egobeo. Tama tibaso, nago te dąų walali po polo usu nao. *Tib 66:13-14 5 Ma, nago te dąų walobo po wasiąbaso da, teda te usu dao. Tiali goli, nago God dali bomai po me deli dąų walobo po wai digi, tama nago te dąų wali po wali pisąbaso da, teda te dwai mu dao. 6 Tiyu, nago po odolali dąų wali digi te nage sęgę sabuo. Te nago po me deli dąų waibaso da, teda nago nosali prisba te tama po ma waligio, nago bugagia homu kone palisąma, nago te po dąų wali. Magi baso te Godigo nage dali haliga sębę ilibaso, te agai nago sę dene elama sali nai dabe dolabuo. 7 Nago te na hauwa ebo bidi goli, ma nage te po hauwa wabo bidi, odao. Te tobage kolesaga ebo te page meni yai kolesaga naga dao. Nage te God dologode sesemane sogo bidao.
Te moni bidi pedelabo homu ebo tagalao
8 Gavman bidigo te magi nai meni yai bidi dabeba sęgę mabo nago subaso, te nage homu dwagila hogodigio. Ma, te po tų ebode augwaligo po bugagia dodolisąma, te olo bidi bugagia dugulaluabo sę isiąbaso da, teda tede noma sigio. Magi baso meni. Te kolesaga page e tiwai elalubao. Te ofisa dabego te tobage kolesaga ebao, augwali te augwa bos tonalubo bidigo osolama, te augwaliba sęgę muani. Tama te bos tonalubo bidi dabe augwali tobolu ugadu elalubo bidi dabe bidibaso, te augwaligo me te tobage deli tigi poai kolesaga ebo dao. 9 Te tama kolesagade te ofisa dabe augwaligo te we bidi dabe augwa tǫde sali mone te ugwadu gasa daganobo mone dali saibao. Tama te ofisa dabego te sali mone dabe augwa hasi tomode digi dobola sali. Tama king bidigo me te we bidi dabede sali mone te gasa ugadu daganama sabo dao.
10 Te bidigo haligade te mone hauwa sabo homu
hogodalobaso da,
teda sesemane sogo aga homude
aga mone sǫą pabo homu idueibao.
Te mone bidi pedelabo homu ebo bidi yaibaso da,
teda agai te sali nai sibi tigidaligo
aga usu nisąbo homu eyu ebao.
Tialima, te mone godolo ebo homu kolesaga iduali da,
te aga page meni yai elalubao.
11 Te bidigo sabo mone ugaba holobaso da, teda te abagi hauwa asudu gebo sę elama, aga dali bidagasaibao. Tialima, te bidigo aga mone dabe elalubo suali, tiali goli agai aga doado bage abela usu meni yaibao. 12 Te sę bidi dabe augwa bugagia hulide godege pibo dao, te augwaligo nai hauwa elaluali, ma te augwa nai sǫą paibaso me tagalao. Tialima, mone bidi da, te tiwai me egobeo. Agai aga te nai doado bage homu hauwa dogia pelama, tibaso aga godege bugagia me pigobeo.
13 Eno suali, e tǫde dwai kolesaga mu me deli elalubao. Te kolesaga e tiwai dao. Bidi me deligo aga mena nai godolo homu mu aiyaba elaluama, te nai dabe me abeligobeo. Menio. Agai aga mone bugagia mu sabodu tonalubo dao. 14 Tiali goli nosali, aga mone sabo sę yali bisnis tulaluama, tama aga mone tigidali te hagawaibao. Tialima, agade te nai me deli elalusiąma, te aga isibo si, teda aga ogwago sabo nai meni yaibao.
15 Te idago da ame nani sogo,
dago nai me deli meni yai elaluali.
Dago tigi habu olo naga elaluali.
Te tiwai naga, da isibo sogo,
da olo naga mu paibao.
Mu tama, dago te nai hauwa sabo sę dene yali,
tiali goli dago te nai deli me sela pogobeo.*Jop 1:21; Tib 49:17; 1 Ti 6:7
16 Te me te dwai kolesaga mu elalubao. Da te tǫdu nai meni yai bage naga pedelali. Te tiwai naga dago te dago te tǫ tagalobo te tobage deli kolesaga naga yaibao. Te da tǫde bidibo sogo, da te odolali sę dene ebao, te bidi udulama, te wali nogogo tola sainu ebo tiwai ebo dao. 17 Da e tǫde dugulalubo page te wiegi yai me elalubeo, te sesemane sogo dago haliga sęgę eyu, wado po weyu, gasi siyu, idubo dao. 18 Eno te sęde homu koneama, tama eno koneani, te kolesaga me deli uga ela holai elalubao. Te kolesaga e tiwai da. Dago nai tuyu, ąį tuyu eyu, te dago tigidali naide sę dene yali te wiegi yai pemene eyu, te pęwadage sogo Godigo dabolo e tǫde bidimainu bodolu mani side dago te tama sę emainao. Magi baso meni. Godigo dago te sę emainu dąį ilai dao.
19 Te Godigo bidi me deliba te mone hauwa menama, tama te bidi aga te nai dabede wiegi yai pemene emainu sula tagalali, te aga ebo sęde me, te sula tagalu, te bugagia dugulalubo me te bugai haliga ilibaso da, teda te wiegi yai da. Magi baso meni, te nai dabe te Godigo agabolo te wiegi yai homu pemene ilibo sę eyu, te bidibolo mabo dao. 20 Godigo aga te sesemane sogo dugulalu, wiegi yai pemene ebo sę sula tagalali, tialima te bidi aga e tǫde pęwadage sogo bidabo elalubo homu elama, te aga bidibo moni homu hauwa dogia pelama, me bidigobeo.