Polgo Efesus Dabeba Pas Asęani
Hasia nedebo tau sabo po
Te boi bidi dabe augwaligo Pol dali dwai homu eyu, tama aga kalabus beba muani, te moni hanu Romde. Tama agai te Kraisgo po wali pabo we bidi hani meba tau somainogo eyu, tama Polgo augwalibolo pas dabe asęna tolali. Tama tiyu agai pas me deli te bidi Filemon agabolo asęna tolali. Te pas me deli me te Kolosi hanuba tolali. Tama te tudi badu Polgo e pas asęnama, tama te bidi Tikikus aga nogoba muyu, tama Tikikusgo e pas te Efesus moni hanuba sela pali. Te Efesus moni tǫ tomode bidali Kraisgo po wali pali hani bage augwaligo me e pas nosali selama tama nedali.
E pas tomode Polgo genuai po sela ola mani. Hasia agai te Kraisde wali, aga da te tǫde bidibo we bidi ma dobola sabo wiegi yai bidi mu dao. Tama gasa po te Krais wali pabo we bidi augwalide wali. Augwali haniani gasagi gasagi yai we bidi dao, tiali goli augwali me te dedeli hani naga elalubao, augwali te Kraisgo tigi dao. Tama te tudi badu Polgo te Efesus bagebolo te doloba pai kolesaga eyu bugagia bidabo tau sabo po ola mayu asęani.
Te pas asęani homu kolesagago page e tiwai dao, Godigo homude te tigidali elalubo nai te bidi Kraisba sisinabo homu yali, te tigidali dagalude nai me tǫde nai me, tama Kraid aga te tigidali naigo polalubo tobolu bidi bidaibao. Te Dąį 1:10 tede te tama po elalubao. Tama Godigo digi agade homu kęą pabo we bidi homu hodolabo homu yali, te augwali Krais dali mu usu selama, tama augwali haliga delide bidimainu yaibao.
1
Godigo Kraisde te da te gesi noma we bidi dabe ilibo sę yai dao
(Dąį 1–3)
Ena Pol da, ena Krais Jisasgo po pusigi pabo bidi dao. Tama God aga homugo ena te po wagi pabo sę emainogo eyu, agai ena te sęba muai dao. Tama eno e pas Godigo we bidi dagebolo eno asęna tolobao, dage Efesus bulu bidi hani, dage Krais Jisas wali pabo we bidi hani mu dao. Tama eno homugo dago Aya God dali, dago Genuai Bidi Jisas Krais dali te augwali sigo dagebolo olo tau siyu, dage haliga nagame eyu bidao.
Godigo Kraisde wiegi yai homu ilibo sę da dali yai dao
Dago Godibolo usu da po weyu, agai nogi ugwaba sao. Aga dago Genuai Bidi Jisas Kraisgo Aya dao, agai God dao. Tama da te Krais dali wadolama, tama te da we bidigo gedugo susiąbo bomo elalubo naide, te tobage naide Godigo wiegi yai homu ilibo sę tigidali da dali yai dao. Agai te dago homu noma bidi tau somainogo eyu te wiegi yai homu ilibo sę yai dao. Tama Godigo tǫ nigisiąbadi, agai da Krais dali wadolainu, da sa muai dao. Te sę page e dao: Godigo homugo da aga gedude dwai sę isiąwai we bidi, agai gedude doloba pai we bidi bidimainogo eyu agai da sa muai dao. Tama God agai da dali wiegi yai homu eyu, da godolo mu ebaso, tama agai polobadu digi te agai da sa muyu, da te Jisas Kraisgo yali sęgo da ma selama, tama da God aga wai puluba bidimainogo yai dao. Tama te sę God aga homugo digi da godolo eyu tiwai dao. Tama Godigo aga ogwa Jisasde dwagi yai homu eyu, tama da aga ogwade wadolo baso, tama agai da dali wiegi yai homu ilibo sę yai dao. Tama God agai da olo mu tau siyu agai te genuai sę ebaso, te dago God aga ula yai bomo elalubo nogi ugwaba sao. Te Krais aga ni pedaide isilama, tama agai kanemego te da dąų wali nai pisigina sąwai, tama megi da olo mu bidibo dao. Te po page e dao, te Jisasgo kanemede te God agai dago yali dwai dwai sęgę tigidali te mu sela sąwai dao. Godigo da dali yali olo tau sabo kolesaga te dwasianu menio, agai te kolesaga umabo mu da dali yai. * Kol 1:14 8-9 Tama tiyu, God agai te dwagi yai homu kolesaga eyu, tama agai te tigidali naide mu konea silibaso, tama agai polobadu mu yali homu aga wali peyu, agai dabolo te bidibolo polobadu ola masiąwai po ola mawai. Tama te po dabolo ola masiąbadi, God aga homu te Krais agai eno homu wali peyu, te agai te sę yaibao, Godigo polobadu mu te homu yai. 10 Tama te sę e tama dao, God agai tigidali nai dodolo piduainu, agai bodolu mani sogo asobo si, te tigidali dagalude elalubo nai me, te tigidali tǫde elalubo nai me, te Kraisba tigidali nai deliba sisinaibao. Tama te sogo Krais aga tigidali naigo tobolu bidi bidaibao. 11 Ao, te God agaduba agai te nosali pedalabo sęde homu bugagia konea pelama, tama agai homugo magi sę yainogo ebo sę, te sę tigidali mu pedalobo dao. Tama agai te homu kolesaga wali peyu, tama polobadu agai da Juda dabe sa muai. Tama aga homugo da Juda dabe da aga hani we bidi mu bidimainogo agai da Krais dali wadolali. God agai te sęde hasia mu konea pelama, tama tiwai dao. 12 Tama hasia te gasa we bidi augwaligo te kolesaga isiąbadi da Juda we bidi dena homu tigidali te Godigo sa muani nosali asaibao wali bidi Krais te bidiba dena homu muani. Tama dena homu tigidali agaba munama, tama dwagi yai homu eyu, da aga ma asobo bugagia tonaluai dao. Tama da te tobage sę hasia ebo bidi dabe dago Godigo ula yai bomo elalubo nogi ugwaba sao. 13 Te dage me, dage Juda hani isiąwai we bidi, te mu po pusubo dagego odai, te Godigo wiegi yai pogo dage ma sabo po dao. Tama dagego te po odama, tama dagego konealubo po Kraisde dąų wai dao. Tama dage Krais dali wadolama bidibaso, tama God agai dage hagea siyu, sa mumainogo tama aga Mobo Bidi dagebolo mawai. Polobadu agai po weyu, te Mobo Bidi dabolo mawaibao po aga homugo wai dao. 14 Polobadu Godigo aga we bidi dali wiegi yai kolesaga yabo po wai dao. Tama megi agai dabolo aga Mobo Bidi manigo da, teda agai tebogo dago konebo dao, te agai da sa muani, te agai polobadu wali po tiwai nosali mu pedalaibao. Agai aga Mobo Bidi dabolo mobaso, te nosali te Godigo aga sa muani we bidi mu selama, tama augwali aga dali hodobo mu olo bidaibao, te me dago hania konebao, tede dago homu si ebo menio. Tama tibaso, dago Godigo ula yai bomo elalubo nogi ugwaba sao.
Godigo Efesus hanibolo koneabo kolesaga momainogo Polgo hanalubo po wai
15 Te Godigo te tobage wiegi yai sę dabolo ebaso, eno agabolo usu da po wabo dao. Eno odali, dagego konealubo po Genuai Bidi Jisasde dąų wali po me, tama dagego augwali dali wiegi yai homu eyu, te Kraisgo po odobo we bidi tigidali godolo ebo po me, te po si eno odali. 16 Tama tibaso, dagego tebo po eno odoyu, sesemane sogo eno Godibolo usu da po weyu agai dage tau somainogo po wabo dao. Dage eno homugo gegeda peyu me tagalobo menio. Tigidali sogo God dali eno po wabo si, dage tau somainogo eno dagego nogi me eno wabo dao. 17 Tama God da dago Genuai Bidi Jisas Krais aga God da, te dago genuai nogi mu elalubo Aya dao. Tama eno aga dali po weyu, eno homugo agai aga Mobo Bidi dagebolo mao. Tama menama, tama te Mobo Bidi agai dage wiegi yai homu kolesaga menama, tama agai God dagebolo waselaibao, te dagego God aga bugagia kuna konea silimainogo tiaibao. 18 Te eno homugo agai wiegi yai ula yai pogo dage homude ula momainogo yaibao. God agai dage i wali, te dagego agai te da mu ma sabo sogo tonalumainogo agai dage i wai dao. Tama Godigo Mobo Bidi agai dagego homude te wiegi yai ula yai po ola mayu, tama dagego te da mu ma sabo sogo tonalubo sę page gisiga koneyu, tama wiegi yai homu ebadi dagego te sogo asobo tonaluaibao. Tama God agai aga we bidi dali wiegi yai kolesaga nosali yaibao po weyu, te po dąų wai dao. Tama tibaso, dagego te kolesaga page wiegi yai mu dao konemainogo, eno God hanaludu gebo dao, agai te dagebolo te dage dali nosali yabo kolesaga page gisiga ola mao. 19-20 Tama eno God dali po weyu, eno po me deli dage tau somainogo wabo dao. Eno homugo te Godigo agai bomo dagebolo ola menama tama dagego te bomo bugagia koneaibao. Te bomo dwasianu meni. Tama agai bomo te bidigo usu nigo usu sobaso, te usu egobeo, te bomo genuai mu elalubo. Tialima God agai te bomogo da Kraisde konealubo po dąų wali we bidi da tomode tau siyu sę ebo dao. Tama te da tomode sę ebo bomo naga eyu, tama Godigo Krais te gų pagede ma hodoloyu, tama aga dolo nogo badu munama, tama megi aga God dali hodobo dagalude bidibao. * Tib 110:1 21 Tama megi Krais aga ugwadu mu bidalubao, tigidali tobolu bidi, tigidali polalubo bidi me, tigidali bomai bidi, tigidali nogi elalubo bidi me, tǫde me, dagalude me, Krais agai augwali tigidali aiyaba elaluama, aga ugwadu mu bidibo, te nosali me tama tiwaibao. 22 Tama Godigo tigidali nai mu Krais dologoba muai, tama Krais aga te nai dabe tonaluabo bidi nigilama, tama Godigo po wali pabo we bidi genuai tobolu bidi nigilai. * Tib 8:6 23 Tama aga te tobolu bidi bidiyu tama Godigo po wali pabo we bidi hani aga tigi tiwai bidiyu, tama te hani te Krais agai te sę yao obaso, te po wali pabo dao. Te tigidali bulude elalubo habuge yai nai tigidali te Krais aga da te nai tigidali simanobo page bidi dao. Tama te Kraisgo po wali pabo we bidi hani augwaligo Krais te tigi sese ilibo dao. * Kol 1:18

*1:7: Kol 1:14

*1:19-20: Tib 110:1

*1:22: Tib 8:6

*1:23: Kol 1:18