1 Te Godigo te da bidi hani si deliba wadolobaso, te ena Pol ena digi eno Godibolo hanalubo po wabo dao. Tama eno te dage Juda bidi hani isiąwai we bidi tau sainogo eno Krais Jisasgo po ola bilaluali. Tama eno te sę ebaso, te Juda dabe augwaligo tede dwai homu eyu tama te Rom gavman bidi dabe augwaligo ena nogo si dunama, kalabus beba muani. Tama megi ena tede bidiyu, te eno Godibolo hanalubo po wabo dao, te dage tau somainogo ebo dao.

2 Dagego polo odai, te Godigo wiegi yai homu elama, olo tau sabo te kolesaga agai enabolo mani, te eno te dage tau somainogo yai. Eno homu dagego agai ena dali te sę yali po odalio. 3 Te Godigo yabo kolesaga po te po polobadu geme dualaluali. Tama te po God agai enabolo ola mani, te agai yabo kolesaga page eno hania konemainogo yai. Tama Godigo tede ena hania ola mani kolesaga eno megi tama pęwadage asęani pogo dagebolo pusali. 4 Tama dagego eno te asęani po nedeyu da, teda dagego te bugagia koneaibao, te eno homu kolesaga te hania ula eyu, tama te Krais agai yabo sę po, te polobadu geme dualaluali po, te po page eno hania konea pai, te dagego koneaibao. 5 Tama te tigidali sogo polobadu Godigo te geme dualali po hania me haninai menio. Tiali goli megi Godigo Mobo Bidi agai te po page te God aga po wagi pabo bidi dabe dali, te Godigo po ola mabo bidi dali sibolo te geme dualaluali po haninama ola mawai. 6 Te dualaluali po page e dao: dage Juda hani isiąwai bidi hani dagego Godigo wiegi yai gesi po odama, dagego homu kolesaga tigidali te poba munama, tama dage te Juda hani dali wadolama tama da dali deli hani bidibao. Tama tibaso, da te megi e tiwai dao: polobadu Godigo agai te Kraisba augwa homu begi pabo Juda dabe dali dwagi yai sę hauwa yaibao po dąų walali. Tama megi Kraisgo yali sęde Godigo te tobage dwagi yai sę te Juda hani isiąwai bage dali me yaibao, te augwa homu agaba begi pali we bidi augwali dali agai te tiwai mu yaibao. *Kol 1:26-27 7 Te God agai wiegi yai po eno pusigi pomainogo ena te sęba muai dao. Tama agai te olo tau sabo wiegi yai sę enabolo eyu, tama agai bomo me enabolo mani, te ena dąų olama eno te sę emainogo tebo dao. 8 Tama Kraisgo we bidi tomode te eno nogi augwali tigidali dologode elaluali goli, God agai enabolo olo tau sabo kolesaga eyu, tama agai ena te wiegi yai po pusubo sę gasa we bidi, te Juda hani isiąwai we bidi augwalibolo te po pusumainogo ena te sęba muai. Tama te wiegi yai po page hagede eno augwalibolo te tobage po pusubo dao, te Krais agai da dali ebo olo tau sabo kolesaga te moni genuai mu, tama bidigo te kolesaga konemainogo eyu gegebo usu egobeo. 9 Tama te tigidali nai nigai God, te hasia mu agai homude aga nosali yabo kolesaga dualai. Tama te homu kolesaga tigidali sogo polobadu aga homude dualaluai. Tama megi agai homu kolesagade dualaluali yabo sę po page eno haninama te tigidali we bidibolo pusumainogo agai enabolo te wiegi yai po pusubo sę mawai. 10 Tama polobadu agai homude yabo sę dualaluai. Tiali goli megi agai te agai po wali pabo we bidibolo haninama ola mani. Te gasa we bidi me augwaligo te Godigo po wali pabo we bidigo pedauwalidu te po odama tama Krais wali peyu tama aga hani bage pedalomainogo eyu, agai aga po haninama ola mani. Tama tebogo augwaligo te Godigo wiegi yai sę ebo kolesaga te dagalude bidibo ensel mobo bidi tobolu bidi dali, te polalubo bidi dabe augwalibolo te wiegi yai ebo kolesaga page waselemainogo yai. Tama te wiegi yai kolesaga page te ensel mobo bidi dabebolo tama waselama, tama augwaligo Godigo haniani sę ebode wiegi yai homu kolesaga mu elalubo te augwaligo hania koneaibao. 11 Polobadu digi dago Genuai Bidi Krais Jisasgo sęde Godigo te wiegi yai homu kolesaga eyu tama tiaibao homu yai. Tama megi agai te yali homu kolesaga wali pelama te sę yali dao. 12 Tama dago Krais agai te wiegi yai sę ebo suyu, tama dago homu kolesaga tigidali agaba muyu, tama aga dali wadolobaso, tama wi esiąyu, homu si esiąyu, tama da God pąba olo pabo da. 13 Tama tiyu dago konebao, te dago hanalu wabo po te Godigo odaibao. Tama tibaso, megi eno te po dagebolo obao, tama dagego odao: tama eno dage tau siyu te dene sabode, te dagego homu kolesaga tede bomo kimi menia pigimio. Menio. Te eno e sę ebode dagebolo genuai nogi mawaibao.

14 Te Godigo agai homugo da Juda bidi hani dali te dage Juda hani isiąwai bidi hani dali te si deliba wadolama te hani deli tiwai elama bidimainu yali. Tama te hani si deliba wadolabo homu yali te homu Godigo polobadu osogo dualaluali. Tama polobadu Godigo dualaluali po page megi eno homude konebaso da, teda eno kidu sugunama God Ayabolo hanalobo dao. 15 Tama da tigidali dagalude me tǫde bidibo we bidi hani da wiegi yai bomo dali bidabo ula me te God Aya aga nogode sabo dao. 16 Tama tibaso eno gedu haluasa po e tama wabo dao: “Aya God, nago naga we bidi dali wiegi yai sę yabo homu umabo mu elalubo dao. Tama tiyu, eno homugo nago te Efesus hani we bidi dali dwagi yai sę eyu, tama nago Mobo Bidi agai nago bomo meba selama, tama agai augwalibolo te bomo mao, augwaligo homu bomo ilimainogo, te Mobo Bidigo bomogo augwali dąų mu walomainogo tama tiao,” eno God dali te tobage hanalu wabo po wabo dao. 17 Eno homugo dagego Kraisde konealubo po dąų obaso da, teda te Kraisgo dage tau siyu dage homude wiegi yai kolesaga ola mayu bidaibao. Tama dagego God dali we bidi dali wiegi yai homu eyu godolo ebo kolesaga bugagia emainogo eyu, tama agai dage te sęde tau somainogo eno God dali hanalu wabo po wabo dao. Tama eno homugo dagego te God dali we bidi dali godolo ebo kolesagade te dage dolaluao, te ni pedali tǫde dąų olama te ni dąų weyu dolalubo tiwai yaibao. 18 Tama tiyu da, te dage me, te Godigo we bidi tigidali me, te dage tigidaligo bomo selama, te Krais agai dage wiegi yai homu eyu godolo mu ebo kolesaga dagego bugagia mu koneaibao. Tama agai tebo kolesaga te genuai mu dao, te bidigo pobesa pabo usu egobeo. 19 Awe, Kraisgo te dage we bidi godolo mu ebo kolesaga tigidali te bidigo kuna bugagia kone palasiąbo kolesaga digi, te eno homugo dagego te kolesaga bugagia mu koneao. Tama dagego tama tiyu da, teda dagego ebo kolesaga tigidali te God agai ebo wiegi yai kolesaga naga tiwai pedalobao. Tama eno dagede te homu ebaso, tama eno God dali dage tau sabo po wabo dao. 20 Te dago Godigo nogi ugwaba mu sinao. Tama agai te wiegi yai kolesaga ebo bomogo da we bidi tomode genuai sę ebo dao. Te sę ebo bomogo te da Godibolo hanaluyu gedu haluasa po wabo me, te dago homude ebo kolesaga te tigidali agai aiyaba elaluyu, tama agai wiegi yai kolesagade sę ebo te genuai mu ebo dao. 21 Te dwasianu sę menio. Tama tibaso, da God agai po wali pabo we bidi, da Krais Jisasde wadolai we bidi hani dago Godigo genuai wiegi yai nogi ugwaba siyu, te tigidali bidada pabo sogode me, te tigidali sogo te tiwai wiegi yai kolesaga me mu ela pidubadi geao. Te tebo kolesaga me tagaligio. Te mu po dao.