Godigo Aga We Bidi Dabe Boi Bidi Nogode Ma Dobola Sali
Hasia nedebo tau sabo po
Te e bukude elalubo po da, te Godigo aga hani Israel dali yali sę po da dali pusubo dao. Tama dago te buku Tigidali Nai Gagalama Nigali Side nedeyu da, te nago e bukude po gegebo bugagia koneaibao. Tialima, nago hasia te buku Tigidali Nai Gagalama Nigali Side tede yali sę po te nago homugo koneao. Te buku, agai pęwadage nogi Page Gagalali, tego po page e buku aga pęwadage nogi Ma Dobola Sali, tede asęai dao.
Te Israel augwali menibadi, Godigo Abraham aga wali asomainogo i wai, tama Godigo Abraham dali bomo yai po dąų wai, tama te Abrahamgo hani nosali pedaliyu, augwali genuai bomo yai hani bidaibao wai. Te buku Page Gagalalide Abraham dali te sęgę me aga usu sela suyu, aga ogwa Aisak, te Jekop aga wąį dali yali po wai. Hauwa sogo te bidi selago Godigo te augwali dali te bomo yai po Abraham dali dąų wali te mu po waliwe ma tibo po waliwe, te homu yai.
Godigo gasa bomo yai po me Abraham dali wai. Agai te po wai, “Te Kenan tǫ nago wąį dabe nosali pedalobo hani augwalibolo te tǫ mawaiba,” wai. Tama nosali Jekop te tǫba bidigi pelama, tama agai wai hauwa mu ame nai. Tialima, te Page Gagalali buku silabo sogo te Kenan bulude nasi te sogo genuai mu yai. Tibaso, Jekop aga hani ogomani dali te Kenan tǫ tagalama, Isip buluba bidigi pai. Tama augwali te Isip tǫba pesiąbadi, Kenan tǫde bidali, te sogo bidi meba augwaligo Josep te Jekopgo ogwa odasa pelama, Isip tǫba bidigi pai. Josep te Isip bulude genuai bidi bidibadi, te sogo aga aya, me aga ama dede sęgę sobadi, agai augwali bugagia tonaluyu, tama te sęgęgo augwali dolobeo.
Josep isai digi, tama te sogo kibu be hauwa te 400 bidai. Tama tialima, te nosali, e buku Ma Dobola Sali tede wali te po mu pedelai. Tama te sogo Jekopgo wąį dabe te hani Isip bulude me bidai. Tama te hanigo gesi nogi te Israel wai. Polobadu Godigo te nogi Israel Jekopbolo mawai, tama augwaligo augwa ayago wąį te nogi sai. Tama meba bidi hani augwaligo Israel hani nogi weyu te po wai, augwali te Hibru hani dao wai.
Tama augwali te Isip bulude bidali sogo augwali te we bidi hauwa bidai, tama augwali bomo meni yai hani bidai, tama te sogo augwa bulu tali me elaluai menio. Augwali dwai mu bidiyu, tama augwali te Isip hanigo sę ebo olo we bidi bidai.
Tialima, God agai te Abraham dali dąų wali bomo yai po te agai gegeda palobeo. Menio. Te po agai me konealuai, tama agai te Moses dąį muyu, te Israel we bidi Isip bulu tagalama odasa pomainogo yai. Tialima, hasia God agai gasagi yai bomo yai sę hauwa Isip hani dali elama, tama augwali Israel Isip hanigo bomode bidali tagalama, odasa painogo yai. Te buku Ma Dobola Sali nogi page e tiwai, Godigo aga we bidi hani ma selama, bulu me deli tagalama pai. Tama te nogi te Israel hanigo Isip bulu tagalama, gasa buluba pali te po wai.
Israel hanigo Isip bulu taga pai, augwali te masigi sane ąį nogolama, tama augwali Sainai bulu duba sabolai. Augwali te Sainai bulu dude bidibadi, Godigo te po augwali dali weyu, “Dage eno we bidi hani mu dao, te eno dage sa mubao,” te po wai. Tama agai bomo yai po hauwa augwalibolo mawai, te Godigo dwagi yai kolesaga augwaligo te kolesaga wali pelama konemainogo yai. Tama Godigo Mosesbolo te po me wai, “Nago te genuai ugwa be me sę yao, tama tede augwaligo Godibolo lotu po weyu, agabolo te dwai sę ebo sela sąyu, nai ula maiabo be sę yao,” wai. Tama augwaligo te Godigo po wali pelama, te ugwa be sę yai. Augwaligo te sę silai, tama Godigo genuai ula te ugwa bede pągąnaluai.
Tama augwali te bulude bidibadi, Godigo augwali dali bomo yai po wai, te po wali aga polasa peyu, augwali te Kenan tǫ menama, tama augwali te tǫde tigidali sogo mu bidabo tǫ agai augwali mawaibao wai. Tama Israel hani augwali te masigi sane yai buludu pai. Tama augwali pelama, te be sili nigibo digi augwaligo te Godigo ugwa be sę ebo te koneai, tama sesemane sogo God augwali dali bidai. Nago te Josua dali, te tobolu bidi hani meba augwaligo po nago nedeyu da, te nago augwaligo te Kenan tǫ sigi bilama, bidainogo yali, te po koneaibao. Te bukugo nogi tama wai, Godigo we bidi augwaligo sę yali usu mu yai.
Tama nosali, Israel hani augwa bulude bidibadi, me gasa tǫde bidibadi, te sogo, augwaligo te polobadu Godigo augwali Isip tǫde bidibadi augwa tǫ Kenan te buluba odasa aselama, augwali te Godigo we bidi bidai, tama augwaligo homugo te tiali ma konebo dao. Tama Godigo te buku me badu tede God agai te genuai sę Israel hani dali yali po elalubo dao.
Ma Dobola Sali te bukude asęani po e tama elalubo dao. Dąį 1 tede gagalama, te Dąį 18 teba siligi pai, te po wai, Godigo Israel hani Isip bulude bidibadi, Sainai bulu duba odasa soali po wai. Dąį 19-24 tede Godigo Israel hani dali bomo yai po weyu, po wai agai po hauwa augwalibolo mawai. Tama God agai nogo si bomo yai po habu po te Dąį 20, te po asęai elalubo. Tama Dąį te 25-40, tede Israel hanigo sę haniani augwaligo te Godigo ugwa be sę eyu yali po asęai elalubo dao.
1
Isip hani augwaligo Israel hani dali dwai sę yai
1-2 Te Jekop aga ogomani dali augwali hodobo Isip buluba pai. Tama te sogo augwa we wai dabe dali hodobo pai. Jekopgo ogomani nogi tama wai: Ruben, me Simeon, me Livai, me Juda, me Isakar, me Sebulun, me Benjamin, me Dan, me Naptali, me Gat, me Aser. * Gag 46:8-27 Tama agai ogwa me te Josep polasa pelama, Isip buluba polobadu bidigi pai dao. Te sogo te Israel hani, te Jekop aga hani mu, augwali te bidi sese sela olama, nogo si we bidi 70 augwali Isip buluba bidigi pai. Tama nosali Josep aga ama dede aga hani tigidali augwali te sogo te Isip bulude bidibadi, augwali tigidali isai. Tiali goli, augwaligo ame nani wai te Israel hani augwaligo wai hauwa ame nai, tama augwali hani hauwa mu te bomai bidi hani pedelai, tama augwaligo te Isip tǫ pedai badu Gosen te pągąna sai. * Tpi 7:17 Tama nosali gesi tuni bidi me deli pedelama, agai te Isip bidi hani tonaluai. Tama te gesi tuni bidi agai te Josepgo nogi konesiąwai. * Tpi 7:18 Tama te tuni bidigo aga Isip we bidi hani dali te po wai, “Suiąo, te Israel we bidi hani augwali hauwa mu yai, tama augwaligo bomogo dago bomo aiyaba elaluaibao. 10 Tama wąbi hwįbaso da, te augwaligo dago boi bidi dali taluama, da dali hwįyu, tama dago bulu tagalama, augwali wi paibao. Tama dago augwali hani hauwa pedalidali weyu, dąų wabo tų gegegaibao,” te Isip gavman polasa tuni bidi agai te po wai. * Tpi 7:19
11 Tama te po olama, te Isip hanigo te Israel hanigo bomo kimi isilainogo eyu, tama augwaligo te sę tonalubo bidi dabebolo te sę mawai, tama te bidi dabe augwaligo te Israel hani sę emainogo selai, tama augwali sę dene mu yai. Tama augwaligo te Israel hanibolo genuai hanu me si niga po wai, te hanu me nogi Pitom, me Rameses. Te hanu side te Isip tuni bidigo nai sisinabo madigi te hanu nigai. 12 Tama te Isip hani augwaligo Israel hani dali dwai sę dene menama, tama augwali mu dolobo sę yai goli, tialima te Israel hani bidi hauwa mu pedaliyu, tama tedela peyu, tama te Isip bulu tǫ pągąna sai. Tama Isip hani augwali te Israel bidi hani sulama, tama dwai homu eyu, augwali wi mu yai. 13-14 Tama Isip hanigo Israel bidi hanibolo sę dene mawai. Tama Israel hani augwali dodolama mu bidai. Tama te Isip hanigo Israel bidi hanibolo te masigigo be sę ebo, te sę me te gi sę me ya wai, tama augwali sę dene mu yai. Tama augwaligo Israel bidi hani hobede me ebeo. Mu menio.
15 Tama we si bidali, te we me nogi Sifra, me we nogi Pua, tama te we augwali sigo te Israel te Hibru we dabego wai ame nabo tau sabo sę yai. Tama te Isip tuni bidi agai te we sibolo te po wai, 16 “Dage sigo te Hibru we me deligo wai ame nobadi tau sabo sogo, tama te wego wai te ogwa ame nobaso da, te wai dage sigo ela muao. Tama te wego wegi ame nobaso da, te wai dage sigo elisiąma tagalao,” wali.
17 Tama te we si God dali wi elama, tama augwali sigo te tuni bidigo wali po wali pabeo. Tama te we sigo te Israel we dabego ogwa ame nabo elisiąma tagalama elaluai, te we sigo te ogwa ame nabo elebeo. 18 Tama te Isip tuni bidigo te we si i olama, augwali sibolo te po hanaluyu, te po wai, “Magi baso dage sigo tama tebo dawe? Magi baso dage sigo te Israel wego te ogwa ame nabo sula tagalama elalubo dawe?” wali.
19 Tama augwali sigo po wei ponoyu, te po wai, “Hibru we augwali te da Isip we dabe tiwai menio. Augwali te bomo yai we dabe weyu, tama augwaligo wai polo mu ame nabo dao. Tama da augwali pąba pedalisiąbadi, augwaligo wai polo ame nai digi da pabo dao,” wali.
20-21 Tama Godigo te we si dali dwagi yai sę yali. Augwali sigo God dali wi yai, tama agai te we augwali sigo me wai ame nomainogo yai. Tama Israel hani augwali hauwa mu pedaliyu, tama augwali bomo yai bidi hani pedelai. 22 Tama nosali tuni bidigo Isip we bidibolo te po wai, “Dagego te Hibru hanigo ame nabo wai te ogwa tigidali selama, te moni pabo ąį Nail te ąįba sąya,” wai, “tama te wegi yai baso da, tagalama bidimainao,” wai. * Tpi 7:19

*1:4: Gag 46:8-27

*1:7: Tpi 7:17

*1:8: Tpi 7:18

*1:10: Tpi 7:19

*1:22: Tpi 7:19