1 Tigidali Israel we bidigo te wa pai bulu Sen tagalai. Genuai Bidigo te po obaso da, teda augwaligo te bidali bulu me tagalama, tama gasa buluba pelama, bidigi pidu geai. Tama nosali augwali te bulu Refidim teba pedelama, tede te bidabo pesage nigai, tiali goli te bulude te tuabo wę menio. 2 Tama tibaso, te we bidi augwaligo wado po Moses dali wai. Tama augwaligo te po wai, “Da wę mao. Da tuaibao.” Tama Mosesgo augwaligo po wei ponoyu, te po wai, “Magi baso dagego wado po ena dali obawe? Dagego homugo aga usu siyu, Genuai Bidigo bomo dagebolo ma ola momainogo ebawe?”

3 Tiali goli, te we bidi augwali te wę nogonego mu isabo ąǫ ebaso, tama augwaligo po hauwa Moses dali wai. Augwaligo te po wali, “Magi baso nago da Isipde selama, da odasa asai dawe? Nago homugo da dali, te dago wai dabe me, te dago kibu dabe me, da wę menia selama, tama da isimainogo ebawe?”

4 Tama tibaso, Mosesgo gedu haluasa po bomonama Genuai Bidiba te tiwai wai, “Te we bidi augwaligo masigi sąnama, tama ena ela muainogo ebao. Tama eno magi sę augwalibolo egowe?”

5 Tama Genuai Bidigo Mosesbolo te po wai, “Te Israel tobolu bidi dabe meba selama, tama dage polasa peyu, te we bidi augwali nosali asomainao. Tama dage pabo sogo, te dono polobadu nago te wę Nailba elali, te dono me sela pao. 6 Tama ena te moni genuai masigi me deli daide ugwadu te bulu du Horep, tede ena dolaluaibao. Tama nage pąba aselama, te donogo te masigiba elama, tama wę te masigide pedelama, tama te we bidi dabego tumainao,” te po wai. (Te bulu du nogi Horep te gasa nogi me elalubao, te Sainai bulu du dao.) Tama te Israel tobolu bidi dabe augwaligo Mosesgo te tiwai sę ebadi, tama te masigide wę pedelama asobo suai. 7 Tama te bulu nogi augwaligo Masa wai, te nogi page “Usu sai,” tama me nogi Meriba, te nogi page “Wado po wai.” Magi basowe, Israel augwaligo wado eyu, tama augwaligo te po wai, “Genuai Bidi da dali bidibowe, ma meniwe?” Tama te dwai kolesagade augwaligo te Genuai Bidigo bomogo ebo sę usu sai. *Nam 20:2-13

8 Tama nosali Amalek hani bidi dabe aselama, Israel dabe te Refidim bulude bidibadi hwįagasai. 9 Tama Mosesgo bidi me deli Josuabolo po weyu, te po wai, “Nago dago bidi meba usu selama, tama do dagego te Amalek dabe dali hwįgi pao. Tiali goli, ena da, te dwasianu bulu du bagede dolaluyu, tama Godigo enabolo te sela bilao wali dono te eno nogogo tolaluaibao,” wali.

10 Tama Josuago te bidi dabe meba selama, te Amalek hani bidi dabe dali hwįgi pali, te Mosesgo agabolo te po wali gilama tama tiwai. Tama Moses dali, te Aron, me te Hur, augwali sela te dwasianu bulu duba holai. 11 Tama Mosesgo nogo ugwaba sabo sogo, te Israel ami dabego te Amalek dabe aiyaba elaluai. Tiali goli, agai nogo aiyaba elalubo sogo, te Amalek dabego te Israel ami dabe aiyaba elaluyu yai. 12 Tama nosali Mosesgo nogo dene eyu, boma pobaso, tama agai nogo ugwaba ma sabo usugobeo. Tama Aron de Hur sigo masigi me deli selama, tǫba munama, tama Moses te masigide dulaluai. Tama augwali si Moses pąde u badu, me e badu dolaluyu, tama augwali sigo te Mosesgo nogo ugwaba selama, tolaluai. Augwali sigo tolalubadi, sia ge dega sigi pai. 13 Tama Josua dali Israel dabe augwaligo te Amalek dabe augwali aiyaba elaluama, tama augwali mu dolai.

14 Tama nosali Genuai Bidigo Mosesbolo te po wai, “Te po te buku me delide asęnama, te we bidi augwaligo homude konealumainao. Te po e tiwai, ‘Genuai Bidi eno te Amalek dabe mu silaibao silama, tama te we bidi dabego homugo augwali munu me ma konegobeo.’ Tama nago te po Josuabolo me mao,” te po wali. *Bom 25:17-19; 1 Sml 15:2-9

15 Genuai Bidigo po wai digi, tama Mosesgo te Genuai Bidibolo nai ula maiabo alta sai me deli nigilama, tama te alta sai yali nogi e tiwai wai, “Genuai Bidi aga eno te nide walama, ugwaba sabo plak ugwa tiwai dao.” 16 Tama Mosesgo te poali nogide te po wai, “Te ugwaba sagalobo plak ugwa tiwai eyu, tama eno ena nogo si ugwaba selama, tama Genuai Bidi aga bidibo digi teba gedu haluasa po te hwįbode wai dao. Magi basowe, Genuai Bidi agai sesemane sogo te Amalek hani bidi dabe dali hwįaibao,” Mosesgo te po wai.