1 Genuai Bidigo Mosesbolo te po wai, “Eno homugo nage dali, te Aron, me Nadap, me Abihu, me te Israel dabe genuai bidi, te bidi sese sela olama nogo si bidi dabe, dage ena bidibo te bulu duba ugwa holomainogo yaibao. Tama dage digibulu gana dolaluyu, tama tǫba basi gulama, tama enaba lotu wagameo. 2 Tama Moses, nage deli naga ena pąba asagameo. Tama gasa te Israel genuai bidi dabe augwali te pąba me asisąma, tama te olo we bidi augwali me te nage dali aselamo dao,” wali.

3 Tama Moses pelama, te Genuai Bidigo bomai po tigidali te we bidi augwalibolo pusigi pai. Tama tigidaligo te po odolama, tama augwaligo pedauwali deliba munama, tama te po wai, “Dago te Genuai Bidigo po wali te sę tigidali yaibao.” 4 Tama Mosesgo Genuai Bidigo bomai po tigidali asęai. Tama nosali side aga kigamu mu hodaluama, tama alta me deli te bulu du sesegede nigilama, tama te alta pąde agai te masigi nogo si olama sągągo si dodaluali, te Israel hani nogo si olama sągągo si te dąį ilai. 5 Tama nosali agai gesi bidi meba tagala palama, tama augwaligo te ofa dabe te Genuai Bidibolo igi pomainogo tagala palai. Augwaligo te siago tigidali dabo ofa eyu, tama te bulmakau dabe elama, tama God dali deli homu elama bidabo ofa dabe yai. 6 Tama augwaligo te ofa ebadi, tama Mosesgo te ofa yai bulmakau dabego kaneme selama, tama dobolama, meba te pouba muyu, tama te kaneme meba munalubo te agai selama, te altaba sąwai. 7 Tama agai te bomo yai po dąų wai elalubo buku selama, te Genuai Bidigo po te bukude elalubo te we bidi augwalibolo nedai. Augwaligo odolama, tama augwaligo te po wai, “Dago te Genuai Bidigo po tigidali odoyu, dolo wali paibao,” wali.

8 Tama Mosesgo te poude muani kaneme selama, te we bidi dabeba te kaneme segeni sąsąga pali. Tama agai te po wai, “Te kanemego Genuai Bidi agai dage dali dąų wali bomo yai po dąų walai dao. Tama te bomo yai po dabe te dąų wali po page dao.” *Mat 26:28; Mak 14:24; Luk 22:20; 1 Ko 11:25; Hib 9:19-20; 10:29

9 Tama nosali Moses, me Aron, me Nadap, me Abihu, me te Israel dabe genuai bidi, te bidi sese sela olama nogo si tama, augwali te bulu duba holai. 10 Tama augwaligo Israel dabego God suai. Tama agai sągą dologode genuai sisi yai nai me deli, te be sai tiwai nai elaluai, tama te dagalu ula tiwai mu elaluai. 11 Mu tama, augwaligo God suai, tiali goli agai augwali dolobeo. Tama nosali augwaligo nai te bulude tuai.

12 Nosali Genuai Bidigo Mosesbolo te po wai, “Nage bulu duba ma holama, tama ena pąba bidagasao. Eno bomo yai po meba te masigi sawali side asęaibao. Tama eno te masigi si nagebolo menama, tama nago te bomo yai po te we bidibolo ola magameo,” wali.

13 Tama tibaso, Moses aga sę bidi Josua dali, augwali si sisi elama, te Godigo bulu duba holainogo yai. 14 Tama hasia sogo Mosesgo te Israel dabe genuai bidi augwalibolo te po wai, “Dage te be sęnama, bidibo pesagede bidiyu, tama da si ma asobo tonaluyu bidao. Aron de Hur si dage dali bidaibao. Tama bidi mebago po gasa bidi dali wabo elalubaso da, teda augwali te bidi si pageba pelama, tama te bidi sigo te po dodolomainao.” Te po wai.

15 Mosesgo te po ola silama, tama aga te Sainai bulu duba holali, tama pǫgo te bulu du halua sai. 16-17 Tama Godigo genuai ula te bulu duba dulai. Tama Israel dabe augwaligo te Genuai Bidigo te ula te bulu dude te genuai sia ula ebo tiwai suai. Tama pǫgo te bulu du halualubadi, te nogo a naga olama me badu nogo deli sogo yai. Tama te a naga olama me badu si wali, te me deli sogo te Genuai Bidi te pǫ tomode bidiyu, Moses asomainogo i wai. 18 Tama Moses te pǫ tomoba pelama, tama te bulu du ugwaba mu holai. Tama aga te bulu dude te bidi sese si 40 te tama sogo bidai. *Bom 9:9