1 Tama Genuai Bidigo Mosesbolo te po wai, 2 “Odao, te hasia nanobo polua, te dei deli wabode, te dagego eno ugwa be sę yao. 3 Tama dagego te bomo yai po nogo si elalubo te halobage selama, tama te ugwa be tomoba munama, tama te halobage dualiyu, te genuai name ugwa walao. 4 Tama te tebol tomoba sela pelama, tama te nai dabe ugwadu daiba manao. Tama te lam dabe tolalubo nai sela aselama, tama te lam dabe te aga nogoba muao. 5 Tama te denami ebo pauda ulubo alta gol te bomo yai po haluali ugwa te sesege e bulu badu pąde muao. Tama te ugwa be tųde ugwa walao. 6 Tama te ofa dabe yabo genuai alta te ugwa obo tų pąde muao, te mesalode. 7 Tama te wę pauabo genuai pou te mesalode muao, te ugwa be de te alta si tomode, te ąį pągąnama, muao. 8 Tama te ugwa be bagulubo obo te dodolobadi, tama te genuai ugwa te obo tųde walobadi yao.”

9 “Tialima, nosali te wel selama, te eno nai dabe sa muyu, tama te ugwa beba geliyu, te tomode munalubo nai dabe tigidaliba gelao. Te tiwai naga te dagego eno nai naga tigidali da sa muyu, tama tedali gasagi yai mu elalumainao. 10 Tama te bras altaba te wel geliyu, tama te sę yabo nai tigidaliba tiyu, tama te alta me te Genuai Bidigo nai naga dao homu eyu, tedali gasagi yai nai elalumainao. 11 Tama te tiwai naga te wę paubo genuai pouba me tiyu, tama aga te pageba me, tama te me te eno nai dao.”

12 “Nosali nago te Aron aga ogomani augwali dali te ugwa be tųba sela pelama, tama augwali tede wę paumainao. 13 Tama te tobolu bidi pris ugwa te Aron tigiba muyu, te wel agaba sa muyu gelibadi, tama agai te eno te pris sę tiwai emainogo tiwai yao. 14 Tama nosali nago aga ogomani augwali me te pąba sela aselama, tama te pris au dobage augwali tigiba muao. 15 Tama augwali te welgo mumuyu, te nago augwa aya sa muani gilama tiao, tama augwa enade te pris sę emainogo yao. Nago augwali te tiwai te welgo sa muao, tama nosali augwa digi, me te augwa hani dali, augwa te pris sę sesemane bidada pabo sogo te sę ela pomainao.” Genuai Bidigo te po wai dao. 16 Tialima, Mosesgo te po odama, tama Genuai Bidigo agabolo te po wali te tigidali sę yai dao.

17 Tama te hasia polua deli, te dei deli wabode, te kibu be side te augwaligo te Isip bulu taga soali, te bodolu nosali pedalobo sogo, augwaligo te Godigo ugwa be sę eyu yai dao. 18 Te augwaligo te ni name dabe bulabo te halobage dabe selama, te tǫba munama, tama te be daga ni name dabe te halobage tomoba bulai, tama te ni name te ni name tuabo bobobage ni dabe munama, tama te genuai ugwa walabo te pos dabe bulai. 19 Tama augwaligo te genuai ugwa te ugwa be pedu dili ugwadu munama, tama te halubo nai sela selago te ugwa be haluali, te Genuai Bidigo te Mosesbolo wali po gilama te tiwai sę yalio.

20 Tama augwaligo te Godigo bomai po asęai masigi pedai si selama, tama te masigi si te dąų wali bomai po muabo halobage tomoba muai. Tama augwaligo te ni dage si te halobage tolabo madi nigilali dedage me si me siba muani, tama te halobage po paliabo nai, te da te sęgę sela sąbo madi, te halobage daiba ugwadu muai dao. 21 Tama te halobage te ugwa be tomoba munama, tama te halobage aga digi be habu elalumainogo eyu, augwaligo te moni wiegi yai dąį ilibo name ugwa walama, te halobage te Tedali Gasagi Yai Mu Be Habu tama elaluali. Augwaligo te tiwai sę yali, te Genuai Bidigo Mosesbolo po wali gilama tama tiai dao.

22 Tama augwaligo te tebol te dąį ilibo ugwa e badu muyu, te Tedali Gasagi Yai Be Habu me badu tomoba muanio. 23 Tama augwaligo te bret selama, te Genuai Bidigo gedude te tebolba muai, te Genuai Bidigo Mosesbolo po wali gilama te tiwai sę yai.

24 Tama te lam dabe tolalubo wiegi yai nai te me badu te tebol dolo si muanio, te Tedali Gasagi Yai Be Habu tomode. 25 Tama augwaligo te lam dabe te lam dabe tolaluabo nai te nogo age yaliba muani, tama te lam dabe te Genuai Bidi gedude udulali. Augwaligo te tiwai sę yali, te Genuai Bidigo Mosesbolo po wali gilama te tiwai sę yai.

26 Tama augwaligo te alta gol te Tedali Gasagi Yai Be Habu tomoba muyu, te dąį ilibo wiegi yai name ugwa e badu muyu, tama muani. 27 Tama te altade augwaligo te denami ebo nai pauda ulali, te Genuai Bidigo po Mosesbolo wali gilama tama tiai. 28 Tama augwaligo te ugwa be tųde te genuai name ugwa walai dao.

29 Tama nosali augwaligo te ofa ebo moni alta te ugwa be tų pąde muani. Tama te altade augwaligo te siago domainu tigidali ulubo kibu bulmakau me, te wit me, augwaligo ofa yali, te Genuai Bidigo Moses dali po wali gilama tama tiai dao.

30 Tama augwaligo te wę pauabo genuai pou te alta de te ugwa be si tomode te ąį pągąnama muai dao. 31 Tialima, nosali Moses me, Aron me, te Aron aga ogomani me, augwali nogo sągą te ąįde telawai dao. 32 Te augwali te Godigo ugwa be tomoba me te altaba painogo, augwaligo hasia bolo nogo sągą ąįgo tedelama, pai. Augwaligo te Genuai Bidigo Mosesbolo po wali gilama tiai.

33 Tama augwaligo te ugwa be dali, te alta me, bagulabo obo dodolama, tama augwaligo te obo tųde me te ugwa walali. Tama Moses dali, te bidi dabe me, augwaligo te tigidali sę yali, tama te ugwa be sę yani te sę tigidali silai.

34 Tama te ugwa be sę silibo si, teda Genuai Bidigo pǫgo te ugwa be mesega sagaselama, tama aga genuai bomo yai ulago te be pągąna sai dao. *1 Kin 8:10-11; Ais 6:4; Ese 43:4-5; Ped 15:8 35 Tama tiyu, Moses te ugwa be tomoba pabo te usu me ebe, magi baso meni, te Genuai Bidigo pǫ me, te ula me, te ugwa bede elaluyu, tama te be pągąna sai dao.

36 Tama nosali te pǫgo te Godigo ugwa be taga pabo sogo da, teda te Israel dabe augwa tigidali doado bage selama, tama te pǫ pabo wali pai dao. 37 Tiali goli, te pǫ me te ugwa be ugwadu me bidibaso da, teda augwaligo te bulu me taga pabeo. Augwaligo suali, te pǫgo te ugwa be taga pabosi, teda augwali me hogodolama, tama te pǫ wali peyu yai dao. 38 Te Genuai Bidi bidibo pǫ te ugwa be ugwadu tigidali sogo bidai. Te siade augwaligo te pǫ suali, tama hulide te pǫde sia elalubo suai. Te ela asali sę tiwai tama me ela pidubadi, te Genuai Bidigo augwali mawainogo yali te tǫ pedaiba augwali sabolama bidigi pai dao.