1 Te 6 wabo kibu bede da te Babilon tǫ kantride kalabus bidali sogo, te polua 6 wabo, te dei namba 5 wabo side, ena te ena bede dugulalu bididubadi, te Juda tobolu bidi dabe ena dali dugayagaselama bidali. Te da bidaludubadi, te God Genuai Bidigo bomo enaba asalio. 2 Te nade subo tiwai nai me deli eno ugaba tonono ebadi, tama te bidi tiwai naigo te ula isi dabo ula tiwai suali. Te aga tigi aiya badu te isi ula ebo tiwai yali. Te tigi ugaba te bras pedai augwaligo te meda hola sąwai gegemane yai ula tiwai yalio. *Ese 1:27 3 Eno te aga nogo tiwai suali, agai te nogo debelama te ena tobulu nisi tola selama, ugwaba kegai dao. Tama te nade subo tiwai yali nai dabe, te Godigo Mobo Bidigo ena ugwaba mu sagoasa holama, ena te Jerusalemba sela palio. Tama agai ena te Godigo beba odasa pali, tama ena te be bagulali obo te not badu elalubo sunumi tomode doligi pali. Te pesagede te Israel augwaligo te tibo god piksa noma dodolai elaluai, tama Godigo haliga sębę dwai mu te naide yai dao.

4 Te da Israelgo Godigo genuai ula eno suali. Ena te wę Kebar pąde bidali sogo eno te suali tiwai tobage ula yalio. *Ese 1:28 5 Tama Godigo enabolo te tiwai po wali, “Tǫde bidio, nago te not badu pedaiba tonono bilao,” wali. Tialima, eno tonono bilibadi, tama eno te tibo god piksa noma suali, te sunumi pąde elalubo alta pąde dolalubo sualio. Tama Godigo haliga sębę dwai mu te dwai nai dali yai dao.

6 Godigo enabolo te tiwai po walio, “Tǫde bidio, nago te Israel we bidi augwaligo dwai kolesaga ebo suao. Te tebo kolesagade augwaligo ena te eno bede ela gudulama, te ena augwalide digibulu bidabo sę ilibao. Te nosali nago augwaligo te gasa dwai kolesaga mu ebo sueibao, te nago megi subo dwai kolesaga te aiyaba mu elalueibao,” te po wai dao.

7 Godigo po ola simanobo si da, teda agai ena selama, te Godigo be obo bagulali te bulu badu solama, tama agai ena te genuai sunumi oboba odasa pali. Tama agai enabolo te obode elaluali dedage me deli ola manio. 8 Godigo enabolo te tama po wali, “Tǫde bidio, nago te obo aluama, te dedage genuai pedalubo sę ilao.” Tialima, eno aluama suali, te sunumi me deli elalualio. 9 Godigo te tiwai po enabolo walio, “Nage te tomoba pelama, augwaligo te dwai kugumini yai kolesaga ebo suao,” te po wai. 10 Agai po ola siminibo si da, teda ena te be habu me deli tomoba pelama, te eno tonaludalio. Iya, eno te hasamani dabe piksa noma, me te God gedude meda yai gasa tobage hasa dabe augwali te obo tigidali habude pągąnalubo sualio. Tama te Israel dabego lotu wabo tibo god piksa noma dabe me elalubo suai dao. 11 Te Israel tobolu bidi dabe augwali te 70 bage te be habude bidibo suali, tama Jasania, te Safango ogwa, te augwali bidibo tomode aga deli bidali. Tigidaligo te wiegi yai denami ebo pauda ulubo plet pou tolalubadi, eno suali, te hano ugaba holali. Tama te bidi dabe augwaligo te piksa noma dabeba lotu udalio. 12 Te Godigo enabolo te tiwai po wali, “Suao,” wali. “Te Israel tobolu bidi dabe augwali geme dualalu, te dwai kolesaga ebao. Tigidali augwa te be daga habude te dwai piksa noma haniani elalubo madi aselama, augwa te lotu obao. Augwa po waibao, ‘Genuai Bidigo da me sugobeo. Menio. Agai dago tǫ kantri tagalalio, tama agai da homu kone me ebeo.’ Augwaligo tama po olama, tama augwa te dwai kolesaga yai dao,” wali.

13 Te Genuai Bidigo enabolo te tama po ma wali, “Te megi nago subo augwaligo gasa dwai kolesaga mu eyu, te megi nago suali dwai kolesaga aiyaba elalueibao,” te tama po wai dao. 14 Tialima, agai ena selama, te Godigo be bagulali obo sunumi elalubo te not badu pali. Tama te we mebago augwa tibo god agai enabolo ola mawai, aga nogi Tamus, te isali homu elama, te augwa agade homu dene ebo gela walio. 15 Godigo enabolo te tiwai po wali, “Tǫde bidio, nago te suali, agawe? Tialima, megi da, nago suali te gasa dwai kolesaga dabe mu ebogo te nago megi suali dwai kolesaga aiyaba mu elalueibao,” wali. 16 Tialima, agai ena te aga be sunumi dolo pąba sela palio. Te pesagede, te alta me sunumi si tomode, te 25 bidi bidali. Augwaligo te be tudiba ilama, te giliga pedaluboba tonalualio. Te augwa bogoli sugunama, te gesabidi tǫba pǫgulama, te giliga geba lotu wabo sę eyu tama yalio.

17 Tialima, Genuai Bidigo te tiwai po enabolo wali, “Tǫde bidio, nago te sę ebo suali da, agawe? Te Juda we bidi augwaligo te dwai kolesaga dabe mu eyu, te augwaligo te tigidali Israel habu badu gasa we bidi augwaliba boi ebo kolesaga ebao. Tibaso, eno augwaliba haliga sębę yali. Tiali goli, augwaligo te kolesaga olo nai da homu elama, te augwa dwai sę umabo sę elama mu ebao. Augwali eno be pąba aselama, te megi nago subo dwai kolesaga yali. Te bidi dabego ena te olo nai tiwai da homu elama, tama augwa te dwai kugumini yai kolesaga yalio. Tialima, odao. Augwaligo ebo dwai kolesagade eno haliga sębę dwai mu ebo dao. 18 Tibaso, eno augwaliba dwai dene umagia mabo sę eyu, te eno haliga sębę yaliba usu naibao. Te eno augwali bugagia bidimainu me sula tagalogobeo. Te eno olo mu tau sabo wiegi yai kolesaga te augwaliba me egobeo. Te eno augwali tau somainu i bomonama obadi goli, tialima eno te augwaligo gedu haluasa po wabo me odogobeo,” te po wai dao.