31
Godigo te po wali, Asiria king bidi te wiegi yai ni sida tiwai dao po wali
1 Te namba 11 wabo kibu bede da kalabuside bidali kibu bede, te sela wabo poluago deli wabo deide, Genuai Bidigo enabolo te po walali, 2 “Tǫde bidio, eno homugo nago eno po te Isip king bidi dali, aga we bidi dabe dali, augwalibolo eno po pusumainu ebao. Te po da, e dao,
‘Dage Isip dabe, dage bomai bidi hani mu dao.
De mu dagego elalubo bomai bomo tiwai elalubowe?
3 Te Asiria dabede homu kone palao.
Augwali te kantri Lebanonde elalubo
te bobobage ni bǫ o sida tiwai
bomonama mu dolaluai dao.
Te nigo te wiegi yai bobobage
nologo dabe elaluyu, me agai dologode
wiegi yai kedau elaluyu yai dao.
Te ni bǫ te bobobage mu elama,
tama meba ni dabe aiyaba elaluai elaluali.
4 Tama tǫ tomode elaluali węgo
te ni sida genuai mu holomainu ilali.
Te wę te tǫ daide ugwadu pedaliyu,
tama te ni page pąde te ąį biliyu yali,
tama tilama nosali te ąį te gasa meba ni dabeba pali.
5 Te wę hauwa mu elaluyu,
tama te ni genuai mu holali,
tama gasa meba ni dabe aiyaba elaluali.
Tama agai nologo dabe genuai mu elama,
tama bobobage mu yali.
6 Tama te haniani ba dabe augwaligo
augwa be te ni nologoba sę yagasai dao.
Tama me te bulu hasa dabe augwali
te ni nologo dologoba bidagaselama,
tama augwaligo augwa gǫų
te ni nologo dologode sai da.
Tama tigidali kantri we bidi augwali
te ni dologoba duayagasiyu yai dao.
7 Te mu tama dao, te ni da,
te polalubo sawi yai mu dao.
Agai te bobobage nologo mu elalubao,
tama agai pedali te tǫ dologode
elalubo węba dulubo dao.
8 Te eno gi Idende te ni tiwai wiegi yai ni me elalubeo.
Agai te tigidali te gide sida ni tiwai me edelai elalubeo.
Tama te ni sidago nologogo te ni paingo nologo
aiyaba elaluai elalubao,
me te eno gide meba gasa ni dabe
aiyaba elaluai elalubao. *Gag 2:9
9 Ena digi te ni nologo hauwa holomainu ilama,
tama aga wiegi yai ni holomainu ilai dao.
Tama tialima, eno te gi Idende
tigidali ni dabe augwaligo te ni pęsą yalio,’
te po pusao,” wali.
10 “ ‘Te bobobage ni sida bǫ, te Asiria tǫ kantri da, agai hagoma dogia pelama, tama aga tobolu gagea pabo sę ebo genuai mu yai dao. Magi baso meni, aga ugwanu bobobage mu holama, meba ni dabe aiyaba elaluai baso. Tialima, megi God Genuai Bidi, eno agade pedelali nai dabe po pusaibao. 11 Eno aga tudi ola mawai dao. Tama eno aga gasa bomai king mego nogoba mani. Tama te kingo te ni agai yali dwai kolesaga wei ponoyu, dene mawai dao. 12 Tama homu dene isąbo bidi hani dwai mu dabe mu aselama, tama te ni bǫ gelama, tǫba degelama, tama olo tǫde elalumainu yali. Tama agai nologo dabe da, te bulu du dabeba, me malu buluba, me bulu bubiabi togoaluai madi totogaluai dao. Tama te we bidi hani augwali polobadu te ni nologode polobadu duala sagasiyu yali, te bage augwaligo tagalama, subigila pepelawai dao. 13 Te ni tǫde pila mubadi, te ba dabe aselama, tama agaba ma duayagasai dao. Tama te bulu hasa dabe auwali me aselama, tama te ni nologo page te ni tigiba teba bidagasai dao. 14 Tama tibaso, nosali da, eno te ni tiwai bobobage me holomainu sula tagalogobeo. Te augwaligo wę hauwa sobadi me tagalao, augwali ugwanu bobobage me hologobeo. Menio. Augwali sese isimainu yaibao. Te bidi dabe yali gilama tama augwali te isai bidi dabego buluba aiyaba dulaibao,’ te po te Isip bageba pusao,” Genuai Bidigo enabolo te po wali.
15 “ ‘Ena God Genuai Bidi, eno te po obao. Tama te ni isilama, tama te isai bidigo buluba polo pai digi da, te da eno te tǫ dologode wę dabego aga hobede emainu ilama, tama aga mesega somainu yaibao, tama eno te wę dabe paliama, tama augwali ugwaba tǫba ma holomainu egobeo. Tama tiyu, te ąį dabe hauwa sula siyu yai dao. Tama eno te Lebanon bulu du dabede be hulia siyu emainu yali. Tama meba gasa ni dabego te nide hobede elama, tama augwali me sasia pai dao. 16 Te eno te ni te isai bidi dabego buluba polo sąwai madi da, aga moni busugu wabo odama, teda tigidali kantri tǫ mobodo yai dao. Tama te me gasa wiegi wiegi yai ni dabe te isai bidigo bulude polo bidali ni dabe, augwaligo te ni dolai sulama, tama augwali me wiegi yai homu dwasianu yai dao. Te augwali te ąį hauwa sali ni dabe, augwali Iden gi ni dabe dao, me augwali te kantri Lebanonde wiegi wiegi yai ni dabe me dao. 17 Te ni bǫ o sida nologo dologode dualalu yali bidi dabe augwali me, te ni tau siyu yali te bidi dabe dali, augwali te ni dali te isai bidi dabego buluba pai. Tama augwali te boi bidi dabego bainat hwągo elai bidi dabe dali bidaibao,’ te po pusao,” wali.
18 “ ‘Te Isip king, aga we bidi umabo mu dali, augwali te ni bǫ sida tiwai dao. Te Iden gide te ni bobobage wiegi yai te ni tiwai me holai menio. Tiali goli, megi da, te ni aga te Iden gide ni tiwai pedelama, tama aga te isibo bidigo buluba aiyaba dulaibao. Tama aga te wiegi yai kolesaga wali pisąbo bidi dabego bidi hani dali bidaibao, me te boi bidi dabego boide elali bidi dabe dali bidaibao, te gų pagede.’ Ena God Genuai Bidi, eno po polo wali dao,” wali.