Esrago Po Elalubo Buku
Hasia nedebo po
Te buku Esrade te buku 2 Stori tomode wali po wadolama wai te elalubao. Te buku 2 Storide dago nedali, te Israel dabe augwalide te sęgę hauwa pedaliyu, me augwali hani hauwa te kantri Babilonba kalabus igi pali. Te Godigo tempel be te Jerusalemde me, te Jerusalem hanu me, te mu dolama elaluali. Tialima, te buku Esrade te Juda hani meba augwali Babilon tagalama, tama augwa tǫba ma asali, te augwa distrik Judaba. Tama augwaligo Godigo tempel be Jerusalemde gesi ma sę yani.
Buku Esrago pedai sela elalubao:
(1) King Sairus te Persia bidigo po obaso, te hasia polasa pabo Juda hani augwaligo Babilon tagalama, tama augwali augwa distrik Judaba ma pali (te Dąį 1 me 2). (2) Te Juda dabe augwaligo Godigo tempel be ma sę ebo gagalama, tama augwaligo lotu po wabo kolesaga ma gagalama wali pali (Dąį 3-6). (3) Te kibu be meba bidama, nosali te Juda hani meba te Jerusalemba ma asali. Esra aga te augwaligo tobolu bidi dao. Esra aga te Godigo bomai po konea pai bidi dao, tama agai augwali tonaluyu, tama me augwali Godigo bomai po dologode bugagia bidimainogo tau siyu, me te lotu wabo kolesaga dolo wali pomainogo yali.
Te Israel dabe augwali Juda tǫ me Jerusalem hanu siba ma asai dao
1
(Dąį 1–2)
King Sairusgo po weyu, te Juda dabe augwa page buluba ma piąo wali
(2 Sto 36:22-23)
Te hasia kibu be tede te bidi Sairus te Persia kantri tǫ pedaide king bidali sogo, God Genuai Bidigo aga homu hodolama, tama agai po me deli walio. Agai te po asęnama, tama agai te tonalubo tǫ pedai tigidaliba tolali. Tama te po sela pabo bidi dabe augwaligo te we bidi dabeba nedemainu yalio. Te sę pedelali, te Genuai Bidigo te polobadu bidali profet bidi Jeremaiabolo po menama, tama Jeremaiago te Israel dabeba pusali po me deli te poba usu nanio. * Jer 25:11; 29:10 Te king Sairusgo po te tiwai, “God, Genuai Bidi, te tigidali dagalude nai tonalubo bidi, tama agai ena Sairus sa munama nigilali, te tigidali tǫ pedai tonalubo bidi pedalumainu ilali. Megi da, te agai enabolo weyu, te agai be me deli te Jerusalem taun, te Juda tǫ pedaide sę yao po walio. * Ais 44:28 3-4 God te dage Israel we bidi dali bidibao, dage aga we bidi dao. Polobadu te boi bidi dabego dage te duga page bulude selama, tama dage te digibulu odasa pelama, tama megi dage eno bulu tǫ pedaide bidibao. Tiali goli, megi dage Israel te Jerusalemba ma piagameo, te duga Genuai Bidi Godigo taunba pelama, tama agai be ma sę igi pagameo,” wali. “Tama dage te Israel dabe megi bidalubo taunde bidibo te gasa we bidi dabe, dagego augwali tau selama, tama wiegi yai nai hauwa augwaliba mao,” wali. “Tama augwa te Jerusalemba sela pelama, te Godigo be ma sę igi pomainao. Dagego te Israel dabeba te silva me gol meba mayu, te nai dabe me maiąo,” wai. “Tama te nai dabe sela pabo kibu donki dabe meba augwaliba mao,” wai. “Tama te Israel dabeba te kibu hasa dabe te Godiba aga te bede ofa yabo nai dabe mao,” king bidi Sairusgo te po wai dao.
Tama tialima, Godigo te Judago tobolu bidi dabe hani me, te Benjamingo hani me te homu hodoliyu, tama te pris dabe me, Livai dabe me, tama te gasa bidi dabe me, te augwali homu hodolama, tama augwa te Jerusalemba pelama, te Genuai Bidigo be ma sę igi pabo doado bage dabe sisi yai dao. Tama gasa hani dabe te Israel pąde bidali bagego augwali tau siyu, tama augwaligo te silvago nigai dis genuai pou mayu, te gol me mayu, te nai me augwaliba mawai. Tama augwaligo gasa wiegi yai nai me mani, tama te Godigo bede ofa yabo hasa dabe me manio. Tama augwaligo te Israel dabeba te nai dabe sela pabo kibu donki dabe me manio. Tama te king Sairusgo te Godigo tempel bede mubo genuai pou dis dabe te Israel dabe augwaba ma manio. Polobadu king Nebukatnesargo te dis pou dabe te Godigo bede sali, te agai Israel dabe dali boi hwįnama, tama te Jerusalem aiyaba elaluali sogo te dis pou dabe sai dao. Tama selasa asama, tama agai te dis pou tigidali te aga god dabego be tomoba muai dao, polobadu. Tialima, king Sairusgo te nai dabe te Mitredatba mani, te kingo mone mubo be tonalubo bidibolo menama, tama Mitredatgo te augwali nedelama, tama te Sesbasarba mani, te Juda dabe augwa tonalubo polalubo tobolu bidi dao.
Te nai dabe e tama dao: 30 dis gol te ofa ebo nai, tama 1,000 dis silva te ofa yabo nai, tama te 29 gasa dis pou dabe, te tama mawai, 10 tama te 30 dwasianu dis gol, me te 410 dwasianu silva dis, me te gasa 1,000 dis te Godigo bede muabo nai dabe te mawai dao. 11 Te tigidali dis gol pou me, silva dali, te gasa nai dali deli taluyu, te namba e dao, 5,400 dao. Tama Sesbasargo te nai doado bage dabe sali, tama aga dali te gasa Israel bage dali augwaligo te bulu Babilon tagalama, te Jerusalemba soali sogo, tialima augwaligo te nai dabe selasa peyu pai dao.

*1:1: Jer 25:11; 29:10

*1:2: Ais 44:28