1 Te Ismael dabego te Josep Isipba odasa pelama, tama te bidi me deli aga nogi Potifar, tego aga abelai. Potifar te Isip bidi me deli, tama te Isip tuni bidigo sę ebo ofisa bidi me deli da. Agai te ami bidi dabe te Isip tuni bidigo genuai bede tonaluali. 2 Yawe te Josep dali bidibaso, tama agai yali sę tigidali te wiegi yai naga pedelali. Josep te Potifargo bede sę eyu bidali. *Tpi 7:9 3 Tama Potifargo sulama, koneani, Yawe te Josep dali bidiyu, tama tigidali sę Josepgo yali te dwagi yai naga pedelali. 4 Tama agai te Josep dali wiegi yai homu pemene mu elama, tama agai te Josep te aga digi pąde bidibo tau sabo bidi nigilali. Tama tibaso, Potifargo Josep te agai bede tigidali doado bage tonalumainu muani. 5 Tama te sogo Yawego te Isip bidi Potifargo hani dabe dali dwagi yai sę ebo gagalali, magi baso meni, te Josep augwali dali bidali. Yawego te tigidali doado bage, me tigidali we bidi te Potifargo bede bidalubo, me te tigidali gide elalubo nai dabe, te hauwa mu pedalumainu te dwagi yai tau sabo sę yali. 6 Tialima, Potifargo te agai doado bage tigidali tonalumainu Josep te tonalubo bidi nigilali. Tama aga digi te magi nai me deli tede te agai homu me ebeo. Menio. Agai te aga tubo naide naga homu yali.

Tialima, Josepgo tigi te wiegi yai mu elama, tama gasagi yai sawi yai bidi mu pedelali. 7 Tama pąde digi tama Potifargo wego te Josep gedu eyu, tama pesą yalima, tama agabolo te po wai, “Nage ena dali pagela piagasao,” wali. 8 Tiali goli, Josepgo te hagela elama, tama agabolo te po wali, “Te ena tonalubo genuai bidigo ena te bede te tigidali doado bage tonalubo bidi nigilali, tama agai te magi nai me delide te homu me ebo menio. 9 Eno te bede te aga bomo tiwai digi te eno elalubao. Tama agai te magi nai me deli te enabolo me habu selibeo, nage deli naga, te nage agai we da. Magi baso eno te tiwai dwai kolesaga yaibawe? Te eno tama tiwai dwai sę ebaso da, teda eno God gedude dwai sęgę saibao,” wali. 10 Tama tigidali bidibo sogode te wego Josep te aga dali piagasa wabo po hanalubo sę iduali. Tiali goli, Josepgo te agai wabo po me odama, tama aga dali me pisąma, tama aga te aga pąba me pabeo.

11 Te me sogo deli Josep te be tomoba aga sę yainu pali, tama te sę ebo bidi me deli tede me bidisiąwai. 12 Tialima, Potifargo wego te Josepgo ugwa tola selama, tama agai te po wai, “Nage ena dali piagasao,” wai. Tiali goli, agai holobo ugwa te wego nogode tolalubadi taga peyu, tama aga wi soyu, te bedu buluba soali.

13 Te wego te Josepgo aga ugwa taga peyu, tama wi pabo suali, 14 tialima agai te bede sę ebo bidi dabeba i weyu, tama te po wai, “Dagego suiąo! Eno bidigo te Hibru bidi te dago beba odasa bidali bidigo tama megi agai dwai kolesaga te dabolo yainogo yali. Aga te ena pibo be habu badu asama, tama agai te ena nogo tulama, dwai sę yainu yali. Tiali goli, eno bomo elama, po daga walio. 15 Tialima, agai te eno hai wabo odama, tama agai ugwa te eno pagede taga peyu, tama aga te bedu buluba wi pai,” te wego te po wai.

16 Tama te sogo pio Potifargo wego te Josepgo ugwa tolalubadi, te aga tonalubo bidi te beba sabolali. 17 Nosali agai te po aga bidibolo pusuyu, te deli tobage po naga wali. Agai te po wai, “Te Hibru bidi, te olo sę ebo bidi, te nago dago beba odasa bidali bidi, agai te ena pibo be habuba asama, tama agai dwai sę ena dali yainogo yai. 18 Tiali goli, eno hai obaso, tama aga ugwa ena pagede taga peyu, tama buluba wi pai,” wali.

19 Te wego te po pusuyu, tama tiwai po wali, “Te nago sę bidigo ena dali tama tiali.” Tialima, Josep tonalubo bidigo odama, tama agai sębę dwai mu yali. 20 Agai po obaso, tama te ami bidi dabego Josep nogo dunama, tama aga kalabusiba muani. Augwaligo aga te gavman tuni bidigo te dwai sę yali bidi dabe kalabus ilama bidibo madi, te Josep teba kalabus ilama muani. Tama aga tede bidaluali. 21 Tiali goli, Yawe te Josep dali bidiyu, tama agai aga dali dwagi yai sę yali. Tama tiyu, Yawego te kalabus tonalubo bidigo Josep dali wiegi yai homu pemene emainogo yali. *Tpi 7:9 22 Tama tibaso, agai te Josep te tigidali kalabus bidi tonalubo bidi nigilali. Tama Josepgo te tigidali kalabus bidi dabego ebo sę tonalubo sę yali. 23 Yawe te Josep dali bidiyu, tama aga tau sobaso, tama agai tigidali sę yali te dwagi yai naga pedelali. Tama te kalabus tonalubo bidigo te Josepgo tonalubo sęde te agai homu si me ebeo.