Jisasgo genuai nogigo Mosesgo genuai nogi aiyaba elaluali
3
(Dąį 3:1–4:13)
Jisasgo genuai nogigo Mosesgo genuai nogi aiyaba elaluai
1 Te Godigo po odolama wali pabo ama dede dabe, te dagalude bidibo Godigo dage me te Jisasgo sę ebogo i wai dao. Tama tibaso, dagego homugo Jisas bugagia kone paliąo. Agai te dago agade konealubo homu dąų weyu tama agade po te we bidi gesabide pusubo tau siyu, tama dago pris tobolu bidi bidimainogo eyu, Godigo aga e tǫba tagala palali. 2 Godigo aga te sęba muani, tama agai Godide homu kęą pai bidi bidai. Agai te bidi Mosesgo polobadu te Godigo we bidi tau sabo sę tiwai yai. Te we bidi augwali Godigo be tiwai bidai. *Nam 12:7 3 Tama dago koneani, be sę yai bidigo genuai nogigo te aga sę yai bego genuai nogi digi aiyaba elalubo dao. Tama te tiwai me Godigo homugo Jisas koneani, agai te genuai nogi me deli sabogo te Mosesgo genuai nogi te aiyaba elaluabo homu yai. 4 Te tigidali be te bidigo aga sęnama elalubao. Tama te tigidali nai nigali bidi da, te God dao. 5 Te bidi Moses aga te Godigo sę bidi, tama te Godigo we bidi tigidali tomode yali sęde agai Godide homu kęą pai bidi bidai. Tama agai te Godigo nosali wabo po pusubo sę te Mosesgo bugagia yai. 6 Tiali goli Krais aga da te Godigo Ogwa, tama agai da te Godigo hani augwali tonaluyu tama te tobolu bidi bidibo sę elaluyu, tama agai me te sęde Godide homu kęą pai bidi bidibao. Tama tibaso, agai nogigo te Mosesgo nogi aiyaba elalubo dao. Tama sesemane sogo dago konealubo po dąų weyu tama wi isąyu tama dago wiegi yai homu pemene elama tama Genuai Bidi naga tonaluyu da, teda da me te Godigo hani mu bidaibao, te da agai be tiwai elaluaibao.
Te Godigo po sela sąbo bidi dabe augwali toma munu me tugobeo
7 Te dago Kraisde konealubo po bugagia dąų obaso da, teda da te Godigo we bidi hani mu bidaibao wali. Tama tialigo da, dago te Godigo dabolo wabo po mu odao, te Godigo Mobo Bidigo polobadu wali po tiwai. Agai po te bukude asęani, te po e dao:
“Megi e sogo tama dagego Godigo pedauwalide po
odali da, 8 teda dagego duga olo palia sigio,
te tiwai dagego wąį dabe augwaligo polobadu
Godigo po sela sąyu hagoma yali sogo tiwai.
Augwali te bidi meni yai madi bidiyu tama augwaligo
God usu sai. Te sogo augwaligo augwa olo palia
sali.
9 Tama Godigo te po wai, ‘Tede dagego wąį nǫų
dabe augwaligo eno yali bomai sę tigidali te kibu be
bidi sese si tede usu nama augwaligo suai.
Tiali goli te sula tagaliyu, augwaligo ena usu mu
sai.
10 Tama tibaso, te we bidi hani dali eno sębę
mu elama,
tama eno te homu yai, “Tigidali sogo augwali
te enade homu kęą pisąwai we bidi bidai dao.
Tigidali sogo augwaligo te eno kolesagadu me
bilai menio.”
11 Tama eno sębę eyu, tama eno po hasegelidali
weyu eno mu po olama dąų wali, te po wai,
“Augwali eno te toma nabo pesageba munu me
asogobeo. Munu me asogobeo. Mu menio.” te po
wai dao.’ ” *Tib 95:7-11
Te Godigo Mobo Bidigo te po tigidali polobadu olama tama bukude asęnama elalubao.
Dago te Godigo po te Israel dabego sela sąwani tiwai yabuo
12 Ama dede dabe, dage bugagia bidao. Tiyu dage tomode ama me deli aga homude dwai sę ebo homu elaluyu, tama aga Godide konealubo po tagaliyu, tama te bidibo ula elalubo God gegeda peyu tudiba muidali weyu, dagego dua dao. 13 Tama tiwai pedalidali weyu, megi e sogo Godigo nogi yali “te megi” te me elalubadi, tigidali sogo deli deli dagego wiegi yai po te ama dedebolo mayu, tama augwali homu hodoloyu tau sao. Duga hasi tama tiluao. Tiyu te sęgę sabo kolesagago dage tomode bidi me deli ili po ola mayu, tama te sęgo aga olo palia selamuo. 14 Magi baso meni. Polobadu dago Godide konealubo po dąų wali, teda te konealubo po megi me dago bugagia dąų weyu, teda da isiboba usu nigi paibao. Dago tama tiyu da, teda da te Krais dali wadolama, tama sę deli naga aga dali hodobo eyu tama bidaibao.
15 Dago koneani, te Godigo po bukude te po me elalubao,
“Megi e sogo tama dagego Godigo pedauwalide
po odali da, teda dagego duga olo munu me palia
sigio,
te tiwai dagego wąį dabe augwaligo polobadu
Godigo po sela sąyu hagoma yali sogo tiwai.”*Tib 95:7-8
16 Polobadu niwai we bidi augwaligo Godigo po odali goli, augwaligo hagoma eyu, te Godigo po sela sąwai dawe? Te bidi Mosesgo te Isip tǫ tagalama odasa asali we bidi tigidali augwaligo te sę yai. Augwaligo naga tama te kolesaga yai dao. 17 Te kibu be bidi sese si usu nama te Godigo sębę de dali yaliwe? Agai te dwai sęgę sabo we bidi augwali dali sębę yali, tama te we bidi augwali isai, tama augwaligo tigi te bidi meni yai bulude elaluai. Godigo te dwai sę yali we bidi augwali dali naga sębę yai. 18 Godigo debolo po olama, tama mu da olama agai po dąų weyu, te augwali agai toma nabo pesage tomoba munu me asogobeo waliwe? Te agai po sela sąwani we bidi augwalibolo te po wai. Agai te po augwalibolo naga wai dao. *Nam 14:1-35 19 Tama tibaso, dago hania koneani, te augwaligo augwa homugo Godiba tiąlusiąbaso, tama te tebogo naga te augwali Godigo te toma tumainogo ebo digi te pesage tomoba painogo ebo te usu me ebeo.