2
1 “Megi dagego duga deli kaneme hani Israel dabe nogi eyu, e tama tiwai waiąo, ‘Dage te Godigo We Bidi Dao, tama Godigo Dage Godolo Mu Yai Dao,’ te po wao,” Genuai Bidigo Hoseabolo te po wai.
Te Gomergo Hosea tagalali tiwai, te Israel dabego God tagalali
2 Godigo te tiwai po begelama, te aga we bidiba wali,
“Eno wai dabeo, dagego ida te eno we
da homu me elalugobeo,
tama ena te agai bidi ma elalubeo.
Tiali goli, dagego aga dali konila po weyu,
agaba bomonama hanalu,
te penani ebo kolesaga tagalao po wao.
3 Te agai tagalisąbaso da,
teda eno aga gudali ugwa tigidali peda sąnama,
tama aga tigi olo gagolama,
te aga ame nani sogo tiwai tigi olo bidiyu,
tama aga hale dwai mu yaibao.
Tama eno aga te tǫ wa pai pedalubo tiwai elama,
te ni meni ebo tiwai ilaibao,
tama te tuabo wę me meni yaibao,
tama tebo kolesagago te eno aga dolaibao.
4 Te eno agai wai dabe homu dene me egobeo,
magi baso meni, augwali te hale meni isąwai penani
we me deligo wai dabe dao.
5 Te wego te tama po wali,
‘Te eno wei eyu, godolo homu ebo
bidi dabe wali paibao,’ wai.
‘Augwaligo ena te nai me wę mayu,
te gudabo ugwa dabe me mayu yali,
tama te oliv wel me wain mayu ebo dao,’ te po wai.
6 Tama te homu ebaso,
te eno ni sesane dabe selama,
te we bidibo pesage bagulama elalueibao.
Te eno aga soabo sunumide obogo togwa palama,
tama aga te bidi dabeba ma pobaso, te usu me egobeo.
7 Te agai godolo homu ebo bidi dabeba painogo pali goli,
tiali goli aga te augwaliba me pedalugobeo.
Te agai augwali gegegi paibao,
tiali goli, agai augwali me sugobeo.
Tama tibaso, agai te po waibao,
‘Polobadu ena eno bidi dali bugagia bidalio,
tiali goli, megi menio.
Tama tibaso, te ena bidi muba dolo ma paibao,’
te po waibao.”
8 “Agai te tiwai kone sabo homu isąwai,
eno digi eno aga tigidali nai mawai,
wain me wel mani,
tama te hauwa silva me gol mawai.
Tama agai te silva me gol te naigo
te tibo god Balba lotu wabo sę yai.
9 Tama tibaso, te gide nai inilama sabo side,
eno te nai dabe me wain agabolo mani nai
te eno ma saibao.
Tama aga tigi bolo olo elalu idali weyu,
eno te gudubo ugwa dabe polobadu mani.
Eno agabolo te mani gudubo wiegi yai
ugwa dabe me ma saibao,” wali.
10 “Tama eno agai gudali ugwa dabe
te agai godolo homu ebo bidi dabego
gedude pepeda sąwaibao,
te aga tigi bolu olo bidaibao.
Tama te bidi me deligo aga eno nogode
me dobola sogobeo.
11 Te eno agai te wiegi yai homu pemene ebo
te genuai side wabo te tigidali mu
silimainu yaibao.
Te genuai side da wabo te tiwai,
te lotu wabo genuai side te deli deli kibu bede pedalu,
te deli deli poluade pedalu yai,
tama te Sabat side lotu wabo me,
te gasa tobage lotu dabe me, te tama tiwai yai.
12 Te eno te wain ni dabe, me te ni fik kaya ni dabe
te bidi dabego aga wei elama, aga mani,
te aga mone mabo tiwai yai,
te nai dabe eno mu dolaibao.
Tama te uni hasa dabego
te wain gi dolagaselama,
tama te ni kaya fik gi me dolama,
te olo bus tiwai pedelaibao,” wali.
13 “Agai ena hauwa sogo homu kone gegeda palali,
tama te tibo god Balba te wiegi yai
denami ebo ofa iligi palio,
tama agai te wiegi yai au dobage munama,
te aga godolo ebo bidi wali bilali.
Tama tibaso, eno te dwai dene agaba mawaibao.
Ena Genuai Bidi, eno te tama po wai dao,” wali.
Genuai Bidigo aga we bidi godolo mu ebao
14 Genuai Bidigo te po begelama wabo pode te tiwai po wali,
“Tialima, eno te wiegi yai po te we Israel dali olama,
tama aga te masigi kemi pesageba
ma kekasa paibao.
Tama eno aga homu bega sabo po weyu,
agabolo te tiwai po waibao,
‘Eno nage godolo mu ebao,’ waibao.
15 Te eno te wain gi dabe agaba ma menama,
tama eno augwaligo te odogo nogi yali pesage
Te Dwai Sęgę nogi poali pesage te hasegelaibao,
tama te wiegi yai nai pedalubo pesage
pedelaibao,” wali.
“Te pesagede agai te eno po wali peyu,
te aga gesi wegi ogwa wede
te Isip tǫ taga soyu asali sogo tiwai
kolesaga yaibao. *Jos 7:24-26
16 Tama agai enaba te tama po waibao,
‘Nage eno bidi da,’ waibao.
Tama agai homugo ena te tibo god Bal da,
te homu munu me ma isąyu,
tama enabolo te tobage po weyu,
‘Nage Bal, nage eno genuai bidi da,’
te homu me egobeo.
17 Te eno agai te nogi Bal ma omainu me
egobeo. Mu menio.”
18 “Tama te sogo eno te dąų wabo bomai po kontrak
te buside tigidali uni hasa, me hasamani dabe dali,
me ba dabe dali te po dąų walaibao,” po wai.
“Tama augwaligo te eno we bidi dabe me dologobeo.
Tama eno te hwįbo doado bage tigidali sela sąwaibao,
te bobobage bainat ge hwą,
me enesigi ene sesemone,
tama eno we bidi dabe te tǫde dua digi
tegaluama bidiyu,
te augwali wi munu me egobeo,” wali.
19 “Israel, te eno nage te eno we tiwai
pedalumainu yaibao,
tama te nage sesemane sogo bidada pomainu yaibao.
Te eno doloba pai kolesaga nageba eyu,
tama eno nage me tagalugobeo,” wai.
“Tama eno nage sesemane sogo godolo mu eyu,
tama nagebolo eno te olo wiegi yai
homu kolesaga yaibao,” wali.
20 “Eno te ena dąų wali po wali peyu,
tama nage te eno we tiwai sesemane bidaibao.
Tama nago te tiwai koneyu,
ena tama te naga Genuai Bidi da homu yaibao,” wali.
21-22 “Tama te sogo ena Genuai Bidi,
te eno ena we bidi te Israel dabego
gedu haluasa po wabo te eno odaibao. *Te badu pedaide, profetgo te po te Israelde wali, tiali goli, agai te Israel nogi te Jesril poali. Te Godigo dwai nai hasegelibo tiwai agai te Israelde tiali, tama augwali te wiegi yai ma ilali. Tama tibaso, te ves 22 me 23 tede wali po te tiwai, Godigo te Hoseago ogwa sela nogi hasegelali. Te Dąį 1:11, tede wali po suao.
Tama eno te tulubage tǫba tulumainu elama,
tama augwaligo te bulali nai tigidali,
te wain me wel, te hauwa holomainu yaibao.
23 Tama eno te ena we bidi
te tǫba munama,
tama augwali te eno nigali wiegi yai
gi tiwai pedelaibao.
Polobadu eno ena we bidibolo te tama wali,
‘Eno Dage Godolo Me Ebeo,’ wai.
Tiali goli, nosali te eno augwali godolo mu yaibao.
Polobadu eno augwaliba te tiwai po wali,
‘Dage Eno Menio,’ wali.
Tiali goli, nosali eno te tiwai po waibao,
‘Dage Te Ena We Bidi Mu Dao,’ waibao.
Tama te augwaligo te tiwai po wei ponaibao,
‘Nage dago God mu dao,’ waibao.” *Rom 9:25; 1 Pi 2:10
*2:21-22: Te badu pedaide, profetgo te po te Israelde wali, tiali goli, agai te Israel nogi te Jesril poali. Te Godigo dwai nai hasegelibo tiwai agai te Israelde tiali, tama augwali te wiegi yai ma ilali. Tama tibaso, te ves 22 me 23 tede wali po te tiwai, Godigo te Hoseago ogwa sela nogi hasegelali. Te Dąį 1:11, tede wali po suao.