13
1 Polobadu te Efraimgo hanigo po obaso,
tama te Israel gasa hani wi elama,
te po odali.
Tiali goli, te Efraim hanigo te tibo god Balba
lotu po obaso, augwaligo sęgę salio.
Tama tialima, te augwali isaibao po wai dao.
2 Tama megi me, augwaligo
te dwai sę me idubo sę ebao wali.
Augwa te tibo god te silvago nigilama,
augwa teba lotu wabo dao.
Te bidi dabe augwa homugo digi koneama,
te tibo god noma piksa dabe te augwa
nogogo digi nigali.
Tama augwa te po weyu ebo,
“Dagego te piksa nomaba ofa yao,” wabo dao.
Ae, tegoba, augwaligo te bulmakau
nomaba te nono nani!
Augwali te menagi yai bidi mu dawe?
3 Tama tialima, te we bidi dabe augwali
te kigamu pedalubo dagalu pǫ te olo
sia sabo tiwai gilama yaibao wali.
Augwali te hulide tulali tulubage segeni
te nosade elaluama,
te giliga nanu polo sia sabo tiwai ąǫ yaibao.
Augwali te wit bo te waligo sela pelama,
te besela palobo tiwai yaibao.
Tama augwali te sia hano te be pedudu ugwaba holama,
te polo silibo tiwai yaibao wali.
4 Genuai Bidigo te tiwai po wali,
“Ena God, duga Genuai Bidi da,
eno dage te Isipde selama, tedu eba odasa asai.
Ena deli naga, ena duga God dao. Te gasa me menio.
Enaduba deligo naga eno dage ma sabo dao.
5 Dage te kemi tǫ wa pai bulude bidali sogo,
eno dage bugagia mu tonaluai dao.
6 Tialima, nosali dage te wiegi yai tǫba sabalubo sogo,
te dage nai pągąna pelama,
te dage tigidali nai usu yali.
Dagego te nai sela selama da, tama dagego te homu yali,
te duga bomogo digi dagego te nai sali homu yai.
Tama tiyu, dagego ena homu kone
gegeda palubao,” wai. *Bom 8:11-17
7 “Tialima, ena te dage soabo sunumide
geme duala selama,
tama eno dage te laion me gasa genuai uni pusigo
te bidi elibo tiwai gilama yaibao,” wali.
8 “Te ena samonama, posoga palu,
te dage hagawia aluaibao,
te hasa beago te aga wai hagawaide
sębę eyu, gasa hasa dali ebo
tiwai gilama yaibao,” wali.
“Tama eno dage subigila miminama,
tama dage te polo dalaibao,
te laion me gasa uni hasa dabego
augwa tubo hasade ebo tiwai yaibao,” wai dao.
9 “Te Israel dabe, te ena deli naga
te dage tau sabo usu yaibao.
Tiali goli, dagego hagela ebaso, tama eno dage dolaibao.
Tama dego dage tau sogowe? Te bidi dabe menio.
10 Polobadu dagego enabolo hanalu,
te king me polalubo tobolu bidi dabe
mao po odu geani,
tiali goli augwaligo dage mena tama tau sogowe?
Augwali usu munu me egobeo. *1 Sml 8:5-6
11 Polobadu eno wado elama,
te eno dageba king mawai.
Tama megi me, eno te wado po umabo mu olama,
te eno augwali sela sąwai dao,” wali.*1 Sml 10:17-24; 15:26
12 “Eno te Israelgo tigidali dwai sę yali
sęgę te eno bukude asęnama, te eno munalubao,
eno homu kone gegeda me pogobeo.
13 Te Israel augwali bugagia bidimainu yali,
tiali goli augwali te homu kolesaga
meni yai umuna pelama, augwa hagela homu yai.
Augwali da, te wai bou me deli tiwai dao.
Te wai bou te idago haliga tomode elaluama,
te idago ame nainogo ebo tiwai yali,
tiali goli te wai tega pabo homu ebeo.
14 Tiali goli, nosali eno te Israel bage
te isali bidi dabego pesagede ma saibao.
Isibo, ena te dwai nai tiwai pedelama,
tama nage ela mu silaibao.
Te isai bidigo pesage,
ena te moni dwai gasi tiwai pedelama,
tama nage dwai mu dolaibao.
Eno te Israel dabeba te olo tau sabo
wiegi yai homu kolesagago
tau me sogobeo,” wali. *1 Ko 15:55
15 “Te Efraim dabe hauwa mu pedelama,
tama te gasa Israel hani aiyaba elaluali,
tiali goli eno te posolo yai bomai wali mu
te giliga asobo badu tagala palama,
tama te waligo augwaligo te ulu wę
sula somainu ilaibao.
Tama te waligo augwa dwagi yai
doado bage sela pela silimainu yaibao,” wali.
16 “Te Samaria dabego enade hagoma mu yali,
tama augwali te dwai dene bolo somainao.
Te bomai wali tiwai eyu, te boi bidi dabego
augwaliba hwįagaselama, te augwali ela munama,
tama te dwasianu wai puluba tigidali
te tǫba sąsąnama, te augwali me isaibao.
Tama augwaligo te haliga elalubo
we dabego tabi togwaibao,” po wai dao.