1 Te Hesekia king bidibadi, te kibu be nogo si olama, sągągo me si me si, te14 yia elalubo sogo, te Asiria king Senakerip te aga ami dabe dali aselama, te Juda dabeba boi hwįagaselama, te augwali aiyaba elaluama, te tigidali bomai obo elalubo hanu sali. Tiali goli, te Jerusalem augwaligo sisąbadi, te elalualio. 2 Senakerip te Lakisde bidiyu, agai aga amide polalubo namba wan ofisa dali, te genuai ami hani dali tagala palali, te Jerusalemba pomainu yai. Augwali te Jerusalemba sabolama, tialima te ofisa te Jerusalemba pabo te Ugwadu Elalubo Ulu Wę nogi wabo sabo wę pąba pelama, bidigi pali. Te ąį gamia te pelama, bidigi pali. Te ąį gamia te name ugwa nigibo madiba pabo genuai sunumi pąde elaluai. 3 Tialima, te Israel ofisa bidi selago aga sugi palio. Augwaligo nogi e tiwai, Eliakim, te Hilkiago ogwa, te kingo be tonalubo bidi da, tama Sepna, te kingo kuskus, me Joa, te Asapgo ogwa, aga te kingo ebo sę po page tigidali asębo bidi dao. 4 Augwali sela bidi te Asiria ofisa bidiba sabalubo si da, agai po bomonama, augwaliba te tiwai po wali, “Dage pelama, Hesekiaba te kingo bomai po magi pao, aga te Asiria king dao. Agai te tiwai po wali, ‘Hesekia, nago mena tobage tiwai bomo elalu, tama nage ena dologode bidisąyu ebawe? 5 Te odolali mibo pogo te boi hwįabo bomo usu elalueibao, agawe? Nago enade hagoma ebao. Nago homugo dego nage tau sagasaiba homu elama, te nago enade hagoma eba, agawe? 6 Eno koneani, nago te kantri Isipba tonaludu, te agai nago hwįbo tau sagasomainu tonalubao. Tiali goli, eno nagebolo obao, Isip te togwa pai awi dili tiwai elalubao. Te nago bilibo dono tiwai tola selama, pobaso da, teda te awi dili sagago nago nogode dolaibao. Te Isip king bidigo kolesaga te tobage tiwai elalubao. Tama nago te boi hwįbaso, te aga aselama, nage tau me sagasogobeo. *Ese 29:6, 7 7 Tialima, nago te po weyu, te dage Israel dabego konealubo homu te Genuai Bidiba mubaso, te duga God, te agai dage tau saibao po obaso, eno homugo te me usugobeo homu ebao. Magi baso meni. Hesekia, nago te agai lotu wabo pesage dabe, me te gasade elalua pali alta dabe, dolali. Nago te Juda dabeba me Jerusalemba te po weyu, augwali te Jerusalemba aselama, tama te alta deliba naga lotu wagasao po wai dao.’ ”

8 “Te eno kingo gasa po elalubao. Hesekia, eno kingo nageba te 2,000 hos mawaibao wali, nago te hosde dugulama, te hwįabo ami bidi te 2,000 elalubaso da, te tama tiaibao. Tiali goli, eno koneani, nagede digi te tobage bidi tama me elalubeo. 9 Nago homugo te Isip ami bidi dabe te hosidu ma karisdu aselama, te nage boi hwįbo tau sagasaibao homu ebao. Tiali goli, mu menio, augwali me asogobeo. Tama tialima, nago bomogo te dago dwasianu ami hani aiyaba elalueiba homu ebaso da, te usu me egobeo. 10 Eno kingo te po wali, ‘Nago homugo ena homugo digi aselama, te nago bulu tǫ kantriba hwįagaselama, te dolagasali homu eba, agawe? Mu menio. God Genuai Bidigo digi enabolo te kantri dolagasao po obaso, ena asai dao,’ eno kingo te po wali.” 11 Eliakim, me Sepna, me Joa, augwali selago te po odama, tialima augwaligo te Asiria ofisa bidiba te po wali, “Nago te po dabolo te Siria pogo wao, magi baso meni, dago te bulu po koneai dao. Nago te Hibru po me wagio, tiyu te taun obo daide dodolalu bidibo bidi hani dabego nago te wabo po odabuo,” wali.

12 Tiali goli, te ofisago po wei ponoyu, te tiwai po wali, “Eno kingo ena tagala palali, te po dage dali, me dagego king dali naga omainu me tagala palobeo. Menio. Te obo daide dodolalubo hani bage, augwaligo me te po odomainao. Magi baso meni, te boi hwįbaso, dago te Jerusalem bagua sagasobo si da, teda te dwai sę ebo si dage tigidaliba pedelaibao. Tama te obo banisde dodolalubo hani bage te nai mu sǫą paibao, tama augwa di ma tuyu, poi wę ma tuyu yaibao, te tiwai dage me yaibao,” wali.

13 Tialima, te Asiria ofisa bidigo te obo daide bidibo hani bidiba tonalu, te Hibru pogo genuai po dagą olama, i weyu, te tiwai po wali, “Dagego te bomai kingo poba olo bugagia muiąo, aga te Asiria king dao. 14 Agai te tama po wai, dage te Hesekiago dage tibo po ola momainu me elamuo. Hesekiago dage tau selama, te dage bugagia me bidigobeo, wali. 15 Dagego te Hesekiago dage homu bega sabo po me odigio, dagego konealubo homu te Genuai Bidiba dąų wabo te agai dage tau selama, te da Asiria dabego dage aiyaba elaluama, te taun Jerusalem sogobeo wabo po, te po odogio. 16 Hesekiago po dagego odolama, te ena dali hwįabo homu me egio. Te tobage homu ebo tagalama, te hanu eno somainu buluba teda solama, tama da dali te poi pibo ilibo po minao. Tama tibaso da, teda dage bugagia bidiyu, te duga elalubo ulu węde wę tuyu, te ni wain du, me te ni kaya fik du, te duga gide digi tuyu bidaibao. 17 Te dage bugagia bididubadi, te ena ma asiyu, te dage gasa bulu kantriba selasa peyu, te duga bulu tǫ kantri tiwai buluba paibao. Te bulu kantride te wain gi, me bret nigibo wit gi, te hauwa elalubo dao,” te po wai.

18 “Hesekiago dage tibo po ola mayu, te po obao, ‘Genuai Bidigo da tau sobaso, te dago augwali aiyaba elalueibao,’ po wai. Tiali goli, te Hesekiago tibo po wabo po odogio. Dagego homugo te gasa hani dabe augwa godigo te augwali tau selama, te boi hwįani augwaligo da Asiria dabe aiyaba elaluali da, agawe? Mu menio. 19 Dago te taun Hamat, me Arpat, me Sefarvaim, teba boi hwįgi pali sogo, te augwa god menade bidiyu, te augwali tau sagasobewe? Te dago Samaria buluba boi hwįgi pali sogo, te Samaria augwa godigo augwali tau selama, te da aiyaba elalualiwe? Mu menio. 20 Dago te bulu tǫ kantri hauwaba boi hwįgi pali, te augwa god hauwa elaluali. Tiali goli, te god me deligo te aga bulu tǫ kantri me tau selama, te da hwįgi pali aiyaba me elalubeo. Tama tialima, magi baso dage Jerusalem bagego homugo te duga Genuai Bidigo dage tau saiba homu elama, te dago dage aiyaba me elalugobe da homu ebawe?” wali.

21 Te Asiria ami ofisago te aga wali po te siminani, tiali goli te genuai obo daide bidali hani bidi te augwa pedauwali pania selama, te po me deli wei me ponobeo, magi baso meni, king Hesekiago augwali habu seliyu, te augwaligo Asiria dabego po wei me ponamuo po wai dao. 22 Tiali goli, te Asiria ami ofisa bidigo wali pogo te Eliakim, me Sepna, me Joa te haliga sęgę mu ilali. Tama augwa gudali ugwa pįsilama, tama augwali pelama, te ofisago wali po tigidali te king Hesekiabolo pusigi palio.