1 Te Israel dabego Genuai Bidigo gedude dwai sę ma yai. Tama agai augwali te Midian dabego aiyaba elalumainu ilama, tama augwali te Midian dabego tonalubadi te kibu be nogo a naga olama, me badu nogo si kibu be bidai. 2 Te Midian dabego bomogo te Israel dabego bomo aiyaba mu elalubaso, tama te Israel dabe te Midian dabede wi ebaso, augwali te masigi dedagede me gasa bulude me te augwali geme duala sigi pela silama, tama te Midian hani bidi dabego augwali gegainu ebo usu meni yani. 3 Tigidali sogo te Israel dabego nai dabe te gide bulama elalubadi, te Midian dabe me, te Amalek dabe dali me, te kemi tǫ bulude bidibo bidi dabe, te giliga pedalubo badu bidi dabe, te tama bidi hani aselama, tama augwaligo te Israel dabe dali boi hwįagasali. 4 Augwali bidabo pesage te tǫ pedai badu nigagaselama, tama gide elalubo nai dabe tigidali dolama, te Gasa tǫ pedai badu te saut teba usu nigi palio. Augwaligo te Israel dabego nai me badu dwasianu tagalama elalumainu me ilibeo. Tama augwaligo te sipsip dabe me, te bulmakau dabe me, te tigidali donki dabe me, te augwaligo tigidali sela pela silalio. Augwaligo te nai dabe te deli me tagalama me elalumainu ebeo. 5 Augwali te augwa bulmakau me te augwa ugwa be dabe dali sela asela wali, te sagado sibi dabe sisinama asobo tiwai elama asali. Te we bidi dabe dali te augwa kibu te kamel dabe me te augwali umabo mu, tama te bidigo nedabo usu meni yani. Augwali aselama, tama te tigidali gi dabe dolagasali, 6 tama te Israel dabego te augwali dali hwįabo bomo meni yani. Tama te Israel dabego te augwa Genuai Bidiba gela weyu, te augwali tau sao wali.

7 Te Midian dabego te Israel dabe augwali dolali sogo, teda te Israel dabego te augwa Genuai Bidiba gela weyu, te augwali tau sao wali. 8 Tama Genuai Bidigo profet me deli te augwaliba tagala palali. Te profetgo Godigo te po sali, te Israel bagego Genuai Bidi dao. Tama agai te po wali, “Eno dage odasa asaligo tama dage te Isipde kalabus sę yali taga soai dao. 9 Eno dage te Isip dabego nogode ma dobola selama tialigo tama e tǫde te bidi dabego dage dali te boi hwįani. Te dage asali sogo, te eno augwali ela gudulai. Tama augwaligo tǫ te eno dagebolo mawai dao. 10 Tama eno dagebolo wali, ‘Ena te God, duga Genuai Bidi da,’ po wai. ‘Dagego te Amor dabego tibo godiba lotu me olamu da,’ po wali. ‘Te bidi dabe augwaligo tǫde dage bidalu, te augwaligo tibo godiba lotu po me wagio,’ po wali. Tiali goli, dagego eno po me odobeo.” Profet bidi me deligo te Genuai Bidigo po wali.

11 Nosali Genuai Bidigo Mobo Bidi ensel asama, tama te moni ni te Ofra bulu pąde te ni dologode bidagasali, te Abiesergo hani bidi Joasgo bulude. Te aga ogwa Gideon, aga te Midian dabede wi ebaso, tama aga te wit agabo masigi me deli te tǫ dedage tiwai elalubo madi tede te geme duala sigi pelama bididuali. Tama agai te wit bo wali sela sąbo sę iduai. 12 Tama Genuai Bidigo Mobo Bidi ensel agaba pedelama, tama te po wai, “Nage te boi hwįabo bomai bidi dao, te Genuai Bidi nage dali bidibao!” Te po wai.

13 Tama Gideongo agabolo te po wali, “Genuai bidi, eno te po me deli nagebolo hanalu obao. Te Genuai Bidi da dali bidibao wida, magi baso te dwai sę dabolo pedelama elalubawe? Tama agai polobadu dago hani tau sali wiegi yai kolesaga, te tobage kolesaga agai te megi ma ebo menio. Magi basowe? Agai te dago wąį dabe te Isipdu sela soali, tama dago aya dedego dabolo te tiwai po pusai. Tiali goli, megi da, Genuai Bidigo da tagalama, tama da te Midian dabego nogode bidibao.” Gideongo te po wali.

14 Tama Genuai Bidigo agabolo te po wali, “Nago bomo tigidali dali te nage pelama, tama nago te Israel dabe te Midian dabego nogode ma dobola sao. Ena digi eno nage tagala palobao,” wali.

15 Tama Gideongo te tiwai po wei ponani, “Tiali goli, Genuai Bidio, te eno Israel dabe mena tama ma dobola sogowe? Eno hanigo bomo menio. Te gasa Manasego hani dabego da aiyaba elaluali. Tama ena da, te ena hanide te olo nai tiwai elalubao,” wali.

16 Tama Genuai Bidigo agabolo te po wai, “Nago ebo usu yaibao, magi baso meni, te eno nage tau saibao. Te nago Midian dabe eliyu, te bidi deli elibo te tiwai yaibao.” Te po wai.

17 Tialima, Gideongo te tiwai po wei ponai, “Te ena nago gedude dwagi yai bidi da omainogo da, nago enabolo te eno koneabo dąį me deli ilibaso, teda eno koneama, te nage Genuai Bidigo digi te ena dali po miani, te eno koneaibao. 18 Tama nage me pigio. Te nai meba eno nagebolo te wiegi yai homu ilama ofa mawaibao,” wali. Tama Mobo Bidi enselgo te po wali, “Te ena nage asobo tonalu bidaibao.”

19 Tama Gideon te aga be tomoba pelama, tama te ogwa bidi tamadi nisai meme me deli elama ulali. Tama agai te plaua meba ulali, te naigo sęgę te 10 kilo, tama yis meni yai. Agai te kibu mi te basket me delide muani, te sup ulali te poude muai. Tama agai te nai te Genuai Bidigo Mobo Bidi ensel te moni ni dologode bidibadi teba magi pali.

20 Tama ensel agabolo te po wali, “Te kibu mi dali te bret me te masigi daiba manao,” wali. “Tama te naiba ugwadu te sup gelao.” Tama Gideongo tama tiwai yali. 21 Tialima, te Genuai Bidigo Mobo Bidi enselgo te dono me deli agai nogogo tolasama, tama agai te dono habu te kibu miba dali te bretba me ugwadu muani. Tama polo te masigide sia bogoli pedelama, tama te kibu mi dali te bret me siago dali. Tama te Mobo Bidi ensel polo palio. 22 Tama Gideongo koneani, agai te Genuai Bidigo Mobo Bidi ensel suali homu elama, tama aga dwai noma mu selama, tama te po wai, “God Genuai Bidi dao! Eno nago Mobo Bidi ensel gesabidi sualio. Megi da magi nai enaba pedelaibawe?”

23 Tiali goli, Genuai Bidigo agabolo te po wai, “Te usu da, nage wi me igio. Te nage me isibeo,” wali. 24 Tama tibaso, Gideongo Genuai Bidigo alta me deli te bulude nigilama, tama agai te alta nogi weyu, “Te Genuai Bidi aga te homu nagame dua ebo bidi da,” wali. Te nigali alta te Abiesergo hani bagego tǫ pedai badu e po asębo sogode me elalubao, augwaligo te bulu nogi Ofra wai dao.

25 Te sogo hulide Genuai Bidigo Gideonbolo te po wai, “Nago te naga ayago bulmakau omai me deli sobadi, tama gasa bulmakau te kibu be 7 yai, te bulmakau me sao. Tama nago te naga ayago te tibo god Balba lotu wainu nigali te alta aluama dolao. Tama te pąde dolaluali, te tibo god we Asera aga noma piksa elalubo pos ni me te gelama, tama isi bagayao,” wali. 26 “Tama nago te Genuai Bidigo alta wiegi yai me deli te dwasianu bulu du daide nigao. Nosali nago te si wali bulmakau selama, tama nago te togali te habu selali ni pos dali te ofa tiwai elama ulao.” Genuai Bidigo te po wai.

27 Tialima Gideongo aga sę ebo bidi nogo si selama, tama augwaligo te Genuai Bidigo wali po selama, te tiwai sę yali. Tiali goli, Gideongo te sę te giligade me ebeo, magi baso meni, aga deli hani sibide wi ebaso, tama me te hanu tomode bidalubo bidi dabede me wi yali. Tama tibaso, agai te sę hulide yai dao.

28 Te kigamu mu te hanude bidaluali we bidi hogodama, tama augwaligo te alta dali te habu selali Asera pos ni dali tede elalubo me subeo. Tama augwaligo suali, te bidi dabego te si wali bulmakau te gesi altade ofa elama ulai sualio. 29 Tama te we bidi dabego augwa hasi tomode digi hanalua bilali, “Dego te sę yaliwe?” Augwaligo hanalua bilama, tama augwaligo bugagia gege bilama, te Gideongo te sę yali suali, te Joasgo ogwago, te sę yai. 30 Tama augwaligo Joasbolo te po wali, “Nago ogwa eba odasa asao, tama dago aga elaibao! Agai te god Balba ofa yali alta dali, te pąde dolaluali te dago god we Asera pos ni me dolalio,” wali.

31 Tiali goli, Joasgo te aga dali wado po wabo bidi dabe augwalibolo te tiwai wai, “Te dage da, dagego te tibo god Bal tau sabo homu elama, tama tiyu dagego te konila po obawe? Mena bidi agai te tibo god Bal tau siyu, te konila po wabo bidi da, te aga te giliga pedalisiąbadi isimainu yaibao. Te Bal te god me deli yai baso da, teda aga digi aga tau somaina,” Joasgo te po wali, “te magi baso meni, te augwaligo te togolama dolali alta te Bal aga nogi elalubo alta dao,” Joasgo te po wali. 32 Te sogo gagalasa, megi e sogo usu nagasu, te Gideongo gesi nogi elaluali Jerubal, *Te nogi Jerubal te page elalubao, “Bal aga digi aga tau somainao,” tama wabo. magi baso meni, Joasgo tama po wali, “Te Bal aga digi aga tau somainu yao,” wali, “te magi baso wabe, augwaligo te togolama te dolali alta te Bal aga digi nogi elalubo alta dao,” po weyu, agai te tiwai po wai dao.

33 Megi da, te Midian dabe me, te Amalek dabe me, tama te olo kemi tǫ bulude bidibo bidi dabe me, augwali sisinai elaluali. Augwaligo te wę Jordan nogelama, tama te Jesril tǫ malu odogo bulude te osogo bidibo pesage nigilama bidai. 34 Tialima, Genuai Bidigo po wabo Mobo Ogwa Wai te Gideonba dulama, tama Gideongo te nai biugel me deli bu wali, te nai augwaligo te sipsip gąųgo nigai, te Abiesergo hani augwali aga wali asomainu i wali. 35 Agai te po sela pabo bidi dabe te tigidali buluba tagala palama, te Manasego hanibolo wagi pelama, te augwali aga wali asao po wai. Agai te po sela pabo bidi augwali te po te Asergo haniba me tagala palu, te Sebulungo hanibolo me, te Naptaligo haniba me te po sela pali. Te augwali me aselama, tama aga dali sisinama talualio.

36 Tama Gideongo Godiba te po wai, “Nago po weyu, te nago ena bomo mobaso, te Israel dabe tau sagameo po wai. 37 Tialima, eno te kibu sipsipgo tigi nisi meba te tǫba muaibao, te dago te wit haluyu agabo madi te tama tiaibao. Te kigamu te wę segeni naga te sipsip niside elalu, tama te tǫde wę segeni me elalusiąbaso da, teda eno mu koneama, te nago homugo eno te Israel dabe tau somainu te tiwai po nago wali gilama te sę yali te homu yaibao.” Gideongo Godibolo te po wai. 38 Tama te naide te tiwai sę pedelali. Tama Gideon te kigamu digi mu hodaluama, tama agai te sipsip niside elaluali ąį segeni sela sąwani. Tama te węgo te dwasianu pou me deli pągąwai.

39 Nosali Gideongo Godibolo te po ma wai, “Genuai Bidi, nago ena dali wado po wabo homu me elamuo, eno deli sogo digi ma po miabo homu ebao. Eno homugo nago enabolo te sipsip nisi deli sogo ma usu somainu yabo po eno nage dali omainu yao. Eno homugo te sipsip niside ąį segeni ebo te niside elalugobeo, tama te tǫde naga te ąį segeni elalumainu homu yai.” Te po wai. 40 Tialima, te sogo hulide Godigo te tama tiwai naga ilali. Te sipsip niside te ąį segeni elalubeo, tiali goli te tǫde da, te ąį segeni elaluali.