1 Te Jehoiakim, te Josaiago ogwa, te Juda king pedelali sogo, Genuai Bidigo Jeremaiabolo te tiwai po wali, *2 Kin 23:36–24:6; 2 Sto 36:5-7 2 “Ena Genuai Bidi, eno po obao, nage te eno be mesalo obo tomoba pelama, te bidi sisinibo pesageba doligi pelama, te Juda taun we bidi dabe tigidaliba po pusao, augwali te eno be tomoba lotu wainogo asaibao. Eno nagebolo mani po tigidali, te nago augwaliba pusao. Nago po deli me tagalamu dao. 3 Te nago eno po tigidali bugagia pusubaso da, teda te we bidi deli deligo nago poba olo bugagia munama, te homu begelama, te augwa ebo dwai kolesaga tagalaibawe, te dago sueibao. Augwaligo tama tiyu da, teda eno homu hasegelama, te eno augwaliba yainogo yali sę tagalaibao, te augwa yali dwai kolesaga wei ponainu tiaibao. 4 Nago te po augwaliba mao, ‘Genuai Bidigo dagede te tiwai po elalubao. Dagego Genuai Bidi eno po odama, tama eno dageba mani bomo yai po wali pao,’ wali. 5 ‘Te eno sę bidi, te eno profet dabego, dagebolo mabo po tigidali te wali pao. Hauwa sogo eno te profet dabe tagala palama, te dageba po pusagasali, tiali goli, dagego augwaligo po wali me pabeo. 6 Te dagego eno po wali pisąbaso da, teda eno te eno e be dolaibao, te eno polobadu te Silo taun be dolali tiwai yaibao. Tama te gasa tǫ kantri we bidi dabego augwa boi bidi dabeba dwai po wabo sogo, augwa te tiwai po waibao, “Dage dolobaso, te Jerusalem dolali tiwai yao.” Augwaligo te po waibao.’ Nago te po te Juda we bidibolo pusao,” Genuai Bidigo Jeremaiabolo wali. *Jos 18:1; Tib 78:60; Jer 7:12-14

7-8 Tialima, Jeremaia hogodama, te Genuai Bidigo beba pelama, tama Genuai Bidigo agai te we bidi dabeba pusumainogo yali po tigidali pusali. Tama te pris dabe, me profet, me te we bidi dabego te po odali. Tama Jeremaiago te po ola silibo si da, tigidaligo aga pageabi yagaselama, te po walio, “Nage isaibao,” wali. 9 “Magi baso nago te dwai po te Genuai Bidigo nogide pusubawe? Te Silo dolali tiwai gilama, te be dolaibao po nago me wagio. Te taun dolama, tama tede bidi me bidigobeo, te po me nago obao, te tiwai po nago me wagio,” wali. Te Genuai Bidigo bede bidali we bidi tigidali, augwaliaselama, te Jeremaia bobegela sagasalio.

10 Te sogo Juda tobolu bidi dabe te kingo bede bidalu, te sę yali po odalio. Tialima, augwali hogodasa pelama, te Genuai Bidigo beba ugwa holali. Tama augwali te augwa bulu pesagede dugawali, te nogi Gesi Sunumi da wabo sunumi pąde elaluai dao. 11 Tialima, te pris dabego me, profet dabego me, te po te tobolu bidiba, me te we bidi dabe tigidaliba te tiwai po wali, “Te bidi isimainao, magi baso meni, agai te po wai, te taun dolaibao. Duga digi agai te profet po wali odai dao,” wali.

12 Tialima, Jeremaiago te tobolu bidi dabe me te tigidali we bidi dabego po wei ponoyu, te po wali, “Genuai Bidigo digi ena tagala palama, eno dagego te odali profet po pusagasali. Aga digi po weyu, te be me te taun dolaiba po wai dao. 13 Tama tialima, megi da, dagego te duga bilibo kolesaga dodolao. Tama dagego te Genuai Bidigo po wali pao, te dena God dao. Te dagego tama tibaso da, teda Genuai Bidigo homu hasegelama, tama agai dage dolabo sę me egobeo, te agai po weyu, te sę yaibao po wali. 14 Tialima, ena da, te duga nogode bidibao. Tama dagego enade magi sę me deli yainogo, tama dagego homugo te kolesaga wiegi yai doloba pai da homu ebaso da, teda dagego te sę eyu naga yao. 15 Tialima, eno homu dagego te tiwai konemainogo ebao. Mu tamao, Genuai Bidigo digi ena tagala palobaso, te ena aselama, te eno pusali po dageba pusagasalio. Tama te ena dagego ela mubaso da, dagede te magi dwai sę deli me isąwai bidi odolali elali, te sęgę elalueibao. Tama te dwai sę yali te taunde elalu, te tigidali taun we bidi dabede te sęgę elalueibao,” Jeremaiago te po wai. 16 Jeremaiago po ola silibo si da, teda te tobolu bidigo, me te tigidali we bidigo te pris dabeba me te profetba te tiwai po wali, “Te bidigo te dago God Genuai Bidigo nogide te po pusalio. Agai dwai sę me elalubeo, tama tialima, dago aga me ela mugobe dao,” te po wai.

17 Tialima, te Juda genuai bidi meba dolugulama, te we bidi augwaliba te tiwai po walio, 18 “Polobadu, te Hesekia Juda king bidali sogo, te profet Maika te taun Moreset bidigo te Juda dabeba te tiwai po pusai, ‘Tigidali Bomo Elalubo Genuai Bidigo te po wai, te Jerusalem nai tigidali dolama, te pobele bage du holobo tiwai pedelaibao,’ wai dao. ‘Te Saion olo tǫ bulu pedelama, te bidi dabego tede gi bulaibao. Tama te bulu dude ni dulu pedelaibao, te Genuai Bidigo be elaluali madi te tama tiaibao.’ *Mai 3:12 19 Maikago te tiwai po obaso, te Hesekiago me tigidali Judago aga ela muai da, agawe? Mu menio. Hesekia wi elama, te Genuai Bidi dologoba pelama, te Genuai Bidiba hanaluama, te agaba te olo mu tau sabo wiegi yai kolesaga emainogo yali. Tama Genuai Bidigo homu hasegelama, te agai augwaliba yaiba po wali sę te ebeo. Tialima, megi dago te Jeremaiabolo yainogo ebo kolesagago da, te daba digi genuai sęgę sesaibao,” te tama po wai.

20 Nosali bidi me deli, aga nogi Uriago, te Genuai Bidigo nogide po pusali. Uria aga te Semaiago ogwa, aga te taun Kiriat Jearim bidi da. Agai te po weyu, te Jerusalem me Juda dolaibao po wali, te Jeremaiago wali po tiwai wai dao. 21 Tama te king Jehoiakim dali, te tobolu bidi dabe me, aga ami bidi dabego dali Uriago te po odolama, tialima, te kingo aga ela muabo sunumi gegali. Tialima, Uriago kingo te sę yabo po odolama, te aga wi ebaso, te Isipba wi pai dao. 22 Tialima, king Jehoiakimgo Elnatan tagala palali, te Akborgo ogwa, te bidi meba dali, Isipba palio. 23 Augwaligo te Uria selama, aga te king Jehoiakimba odasa asai. Tama kingo po obaso, te bidi dabego Uria te bainat hwągo elama, tama augwaligo aga tigi te olo bidi dabego gų pageba sąwai dao.

24 Tialima, te we bidi augwaligo te Jeremaia ela muainogo yali sogo, Ahikam, te Sefango ogwago, te Jeremaia tau selama, te augwaligo agade dwai sę me ebeo.