1 Te kibu be nogo si te Sedekaia Juda king bidali side, Genuai Bidigo Jeremaiabolo po mawai. Te sogo te Nebukatnesar te Babilon king bidali, te 18 yia bidai elalubo sogo dao. *2 Kin 25:1-7 2 Te sogo te Babilon kingo ami bidi dabego te Jerusalem taun bagulubo sę yali, tama profet Jeremaia te ami dabe badu kalabus elama bidibadi, te Juda kingo genuai obo tomode bidai dao. 3-5 Jeremaiago profet po te tiwai pusai, “Genuai Bidigo te tama po walio, ‘Mu tamao, te eno te Babilon kingo te taun somainogo yaibao,’ wali. ‘Te Sedekaia te Kaldia dabede, te Babilon ami dabede wi me pogobeo. Menio. Ena Genuai Bidi, te eno te Babilon kingo aga pageabi emainu elama, tama Sedekaia te Nebukatnesargo gesabidiba doligi pelama, tama Nebukatnesargo hanalubo po dabe dolo ponaibao. Tama Nebukatnesargo te Sedekaia Babilonba sela pelama, tama Sedekaia te bulude bididubadi, te eno aga homu kone ma palabo sogo dąį ilaliba usu naibao. Te dagego Babilon dabeba hwįyu da, teda dagego augwali aiyaba me elalugobeo. Ena Genuai Bidigo, eno te po wai dao.’ Agai te po wali,” Jeremaiago te po wali. King Sedekaiago te po odolama, agai te Jeremaia dali wado eyu, te tiwai po wali, “Dego nagebolo obaso, nago te tobage profet po pusaliwe?” Tama Sedekaiago Jeremaia te kalabusiba muai dao.

6 Te Jeremaia aga po digi obao. Te ena, Jeremaia, te kalabuside bidali sogo, Genuai Bidigo enabolo te tama po wali, 7 “Odao. Hananel, te nago aya aga ama Salumgo ogwa, aga nageba asaibao. Te agai nagebolo hanalu, te agai Anatot taunde elalubo tǫ abela waibao. Magi baso meni, nage da te aga pąde mu elalubo ama dao, tama nage te tǫ abelibo polalubo bidi dao,” te po wai. *Te ede wali po page tiwai po te Prs 25:25 tede me te po mu elalubo suao. 8 Tialima, nosali Hananel te ena kalabus bidibo pesageba asali, te ami dabe bidibo madi aselama, ena suagasali, te Genuai Bidigo po wali gilama yai. Te Hananelgo enaba te tiwai hanalu wali, “Eno homugo nago eno tǫ te Anatot taunde elalubo abelao, te Benjamin hanigo tǫde elalubao, magi baso meni, nage eno ama, tama nage te tǫ abelibo polalubo bidi. Nago abelama, te naga tǫ elaluagameo,” wali.

Hananel aga digi dao te po ola silibaso, eno koneai, Genuai Bidigo homugo eno te Hananelgo wabo po tiwai gilama emainogo homu yai dao. *2 Kin 25:1-11; 2 Sto 36:17-21 9-10 Tama te tǫ eno abelali. Eno te tǫ abelibo bomo yai po kontrak asęnama, te eno haluama, tama tede eno dąį ilali, te bidi mebago gedude muai. Tama eno te silva bidi sese nogo si 200 gram sęgę yai silva usu nama, tedali dagalama, eno te Hananelbolo mawai, te tǫ pedai mone usu nama mawai dao. 11 Eno te pepa si asęai, te tǫ abelali bomo yai po, me da sigo dąų wali po me, te pepa side elaluai. Pepa me deli te eno bebelali, te gasa pepa me eno bebelibeo. 12 Tama eno te pepa si selama, te bidi Barukbolo mawai, te Neriago ogwa, te wai te Maseago wąį nǫų. Tama bidi hauwago eno te tǫ abeliyu ebo sę suali. Eno ama, Hananel, tama augwa te bomo yai pode nogi asęani bidi dabe me, tede dulaluali, te gasa Juda dabego me, tigidaligo eno te sę ebo suai dao. 13 Te bidi dabego tononalubadi, eno te Barukbolo te tiwai po walio, 14 “Israelgo God, aga Tigidali Bomo Elalubo Genuai Bidigo, agai te tiwai po wali, ‘Baruk, nago te bomo yai po asęani pepa si selama, te si te sospen sene me deliba muao, te si dali si sesabi elama, bugagia munalumainao,’ wali. 15 Magi baso meni, Israel God, aga te Tigidali Bomo Elalubo Genuai Bidi, agai te po wali, nosali te bidi dabego te be, me tǫ, me wain gi dabe te abelibo sę ma gagalaibao, e tǫ kantride,’ agai te po wai,” eno te po Barukbolo wali.

16 Baruk, te Neriago ogwago, te asęani bomo yai po sali dao, tialima, eno Genuai Bidiba te tiwai gedu haluasa po wai dao, 17 “O God, Genuai Bidi, te nago genuai bomogo nago te dagalu me tǫ nigai dao. Te nago isą yabo sę deli me elalube dao. 18 Sesemane sogo nago olo tau sabo wiegi yai kolesaga te umabo tausen we bidiba ebao. Tialima, te bidi me deligo dwai sę ebaso da, teda nago dwai dene mabo sę agabolo eyu, te aga wai dabeba yaibao, te aga yali dwai sę wei ponoyu tebao. God, nage polalubao, te nago bomo umabo elalubao, nago nogi e tiwai, Tigidali Bomo Elalubo Genuai Bidi dao. 19 Nago te wiegi yai sę dabe yabo homu kolesaga elalubao. Nago bomo elalu, te nago genuai sę dabe ebao. Nago te tigidali we bidigo ebo sę subo dao. Nago te bidi tigidali deli deligo ebo kolesaga dagalama, te augwa yali kolesagade usu nama, wei ponobo dao. 20 Polobadu nago genuai bomai sę dabe te tǫ kantri Isipde yai. Tama nago te tobage deli kolesaga naga te da Israel tomode idubadi, te gasa hani we bidi tigidaliba me ebao. Tama tigidali hanigo nagebolo genuai nogi mabo dao. 21 Nago genuai bomogo, nago bomai sę elama, te tobage genuai sę hauwa te Isip dabe wi iliyu yalio. Tama te kolesagade nago da Israel dabe sai, te naga hani dabe, te Isipde selama, da odasa asai dao. 22 Tama nago te tǫ dabolo mani, te nago dago wąį nǫų bomai po dąų wali gilama yali. Te tǫ ili hauwa elalubaso, te nai dabe wiegi yai bugagia mu holai dao. 23 Da hani dabego te tǫ selama, tede bidali. Tialima, te nago augwaliba mani tigidali po, me bomo yai po, te augwaligo wali me pabeo. Menio. Augwaligo nago po sela sąyu, te nago bomo yai po bolalio. Tama tibaso, nago te dene mabo sę dabe da haniba yai dao.”

24 “Tibaso, te Babilon dabego te Jerusalem bagua sagaselama, te da dali hwįbo sę yai. Augwaligo te taun obo pąde tǫ du holama, te augwa tede dolalu boi hwįnama, te taun sainu yai. Te boi bidi dabe da dali hwįbaso, te da nai sǫą pelama, te dwai gasi daba pedelali. Tialima, te Babilon dabego te Jerusalem saibao. Te nago po wali sę dabe, te pedelalio, te megi nago subao. 25 Mu tama, te Babilon dabego te taun sainogo yali. Tialima, God, Genuai Bidi, naga digi te tǫ abelao obaso, eno abelali, tama te bidi dabe seselama, augwa te dąų wabo bomo yai pode nogi asęmainogo yai dao.” Ena Jeremaia eno te gedu haluasa po wai dao.

26 Tialima, Genuai Bidigo te tiwai po Jeremaiabolo wali, 27 “Ena digi ena Genuai Bidi, ena te tǫde we bidi hani tigidaligo God dao. Eno tigidali sę ebo usu dao. 28 Tama ena Genuai Bidi, eno te taun Jerusalem te Nebukatnesarba mayu, te Babilon ami dabe dali mawaibao, te augwali Kaldia dabe dali mawaibao, te augwali Kaldia dabe augwaligo te taun selama, 29 te augwaligo isi nogolama, te taun siago tigidali ulaibao. Tama te isigo te we bidi ugwaba holama, augwa be pedude te wiegi yai denami ilibo ofa te tibo god Balba iduali alta isigo daibao, te gasa god dabeba te wain ofa geludali. Tama te kolesaga idualigo te we bidi augwaligo ena haliga sębę dwai mu iliduai dao,” wali.

30 “Te Israel me Juda augwali te gesi hani elalubo sogo gagalama, te megi e sogoba usu nagasobao, te eno suali, augwaligo dwai kolesaga naga iduali. Ena Genuai Bidi, eno po dolo obao, sesemane sogo augwaligo te tibo god nigibo kolesagago ena haliga sębę iliduai dao. 31 Te augwaligo Jerusalem nigali sogo gagalasa, megi e sogoba usu nagasu, te Jerusalem augwaligo ena dwai haliga sębę ilalio. Tama eno te taun dolabo homu elama, te eno munu me sugobe dao. 32 Te tigidali Israel me Juda we bidigo ena dwai haliga sębę umagia mu ilama, te augwaligo dwai kolesaga haniani yali. Tigidali olo we bidigo me, te king dabego me, tobolu bidi dabe me, pris dabe me, profet dabego me, tigidali Juda we bidi me, Jerusalemgo me, te dwai kolesaga ebo dao. 33 Augwaligo ena tudiba naga munama, te augwali ena pageba me asobeo. Eno hauwa sogo augwali ola mani, tiali goli, augwaligo eno po odisąyu, ma eno augwali ola momainogo ebeo. 34 Augwaligo te kugumini yai tibo god piksa te bede ugwaba dodolali, te Israel dabego enaba digi lotu omainogo yai be dao. Tama te kolesagade augwaligo te be eno gedude meda mu ilibo dao. *2 Kin 23:10; Jer 7:30-31; 19:1-6 35 Tama augwaligo te tibo god Balba lotu wabo pesage te odogo bulu Hinomde nigai. Tama augwa wai dabe digi te tibo god Molekba ofa ilali. Tiali goli, eno augwalibolo te kolesaga yao po me wabeo. Tama me eno te tobage bomo yai po augwaliba maiabo homu munu me ebeo. Eno homugo augwaligo te kugumini yai kolesagago te Juda dabe hodolama, te dwai sę emainogo ilibo te eno hagela homu ebo dao,” wali. *Prs 18:21; 2 Kin 23:10; Jer 7:31

36 Genuai Bidigo te tiwai po wali, “Te we bidi augwaligo te po waibao, ‘Te boi bidi dabego daba hwįagaselama, te da nai sǫą palio. Tama dwai gasigo da dolobao. Tama tebo kolesagade te Genuai Bidigo te Babilon kingo te taun somainu ilalio.’ Augwaligo te po waibao. Tialima, ena Genuai Bidi, ena dage Israelgo God, eno te taunde homu koneama, eno te gasa po me elalubao. 37 Mu tama, eno augwalide dwai haliga sębę mu elama, wado genuaigia mu elama, eno te we bidi dabe te tigidali tǫ kantriba sela sąwaibao. Tama eno augwali e tǫba ma odasa aselama, te augwali ede bugagia bidimainogo yaibao. 38 Tama augwali eno we bidi hani dabe bidiyu, te ena augwaligo God bidaibao. 39 Te eno augwaliba deli homu kolesaga naga mobaso, te augwaligo deli sunumi naga wali paibao. Te augwali ena dologode sesemane sogo bidibaso, te eno wiegi yai sę augwaliba eyu, tama augwa hani wai dabe me bugagia bidaibao. 40 Te eno gesi noma dąų wabo bomo yai po te augwaliba yaibao. Tama te dąų wali bomo yai po sesemane elalueibao. Eno te augwali wiegi yai bugagia ilibo kolesaga me tagalogobe po dąų walaibao. Te eno wiegi yai homu kolesaga augwaliba menama, te augwali ena dologode bidiyu, te augwaligo ena munu ma tagalogobeo. 41 Tama eno me te homu kolesaga deli naga elalu, te eno augwalide wiegi yai pemene elama, te augwaliba wiegi yai sę eyu, tama eno augwali te tǫde bugagia bidimainogo ilaibao,” wali.

42 “Ena Genuai Bidi, eno po ma te tiwai po obao. Hasia te eno dwai sę hauwa augwaliba pedalumainogo ilama, te augwali dolali. Tiali goli, nosali da, te eno wiegi yai sę augwaliba pedalumainogo ilama, te augwali bugagia mu tegaluama bidiyu, te eno augwaliba bomo yai po dąų wali tiwai gilama yaibao. 43 Te we bidi augwaligo te po wali, ‘Te tǫ dolama, tama tede te bidi me hasa sibi me bidisiąwai, magi baso meni, Genuai Bidigo te tǫ te Babilon dabeba mawai.’ Augwaligo te po wali. Tialima, ena Genuai Bidi, eno te po obao, nosali te Juda dabe te augwa tǫba ma bidagaselama, te augwa abeliyu, te tǫ bidibolo menama abelebo mone ma siyu yaibao. 44 Te bidi dabego tǫ abelama, te tǫ abelali dąų wabo bomo yai po asęaibao. Tama te bidi mebago gedude te augwa dąų wali po bebelama, te augwa dąį te mueibao. Te bidi dabego tǫ abelama, bidibolo mayu ebo te Benjamin hanigo tǫ me, te Jerusalem pąde tǫ me, Juda gasa taun dabe badu me, te bulu dude me, te Juda pedai saut badu me, te giliga degasa dulubo dwasianu bulu badu me, te tǫ abelama bidibolo mabo sę eyu yaibao. Te tama te sogo eno te Juda tǫ kantri bugagia ma bidimainu yaibao. Ena Genuai Bidigo, eno te po wai dao,” wali.