1 Te Jehoiakimgo kibu be me si me si elalubadi, te Josaiago ogwa, te Juda king bidali sogo, Genuai Bidigo Jeremaiabolo mayu te tiwai po walio, *2 Kin 24:1; 2 Sto 36:5-7; Dan 1:1-2 2 “Te buku me deli selama, te eno nagebolo mabo po tigidali asęao, te sę dabe te Israel, me Juda, me gasa bulu tǫ kantri dabeba pedelaibao. Nago te po tigidali asęao, te hasia sogode mu gagalama, te eno nagebolo mawai, te king Josaiade gagalasa, te megi e sogoba usu nagasobao. 3 Te tigidali Judago eno te dwai sę augwaliba yaiba po wabo odobaso da, teda augwa homu begelama, te bidi deli deli augwa dwai kolesaga tagalomainao. Tama tiyu da, eno te augwa yali dwai sę yali sęgę elaluali sela sąwaibao,” po wai dao.

4 Tialima, Jeremaiago te Neriago ogwa, Baruk i olama, asali. Tama Jeremaiago te Genuai Bidigo agabolo mani po tigidali pusama, tama Barukgo te po buku me delide asęai dao. 5 Tama nosali Jeremaiago Barukbolo te tama po wali, “Ena digi ena te Genuai Bidigo beba me pogobeo. *Dago konebe, magi baso te Jeremaia Genuai Bidigo beba me pogobeo wai. Te gegunai bidi dabego aga me pigio olama, habu selibaso, te aga pogobe homu yali, ma aga wi homu eyu, tiyu augwaligo aga dolidali homu eyu yali, ma aga gasi elalubaso, te aga pogobe wali homu yai dao. 6 Tialima, eno homugo eno nagebolo te asęao wali buku nago selama, tama te Genuai Bidigo beba nage pelama, tama Genuai Bidigo te po te we bidi dabeba nedao. Nage te nai habu selebo genuai side me deli pagameo, magi baso meni, te Juda taun we bidi dabe Genuai Bidigo beba te side pelama bidibadi, tama augwaligo me te po odomainao. 7 Genuai Bidigo wado eyu, haliga sębę umabo mu te we bidi dabeba ebao, tama agai dene mabo sę augwaliba yaiba wali. Tialima, te we bidi deli deli augwa te dwai sę ebo kolesaga tagalaiba homu eyu, te Genuai Bidiba gedu haluasa po obaso da, teda agai augwaligo gedu haluasa po wabo odaibao,” wali.

8-9 Tialima, te polua 9 wabode, te kibu be a nagade te Jehoiakim te Juda king bidali sogo, te we bidi dabe augwa te nai gisilama, te Genuai Bidiba lotu weyu bidabo sogo dąį me deli ilali. Tama tigidali Jerusalem we bidi me, te Juda taun we bidi dabe me, te Genuai Bidigo beba sisinagasali. Te side Barukgo te Jeremaiago agabolo wali po gilama tigidali sę yali. Agai te Genuai Bidigo po elalubo buku selama, aga te Genuai Bidigo beba palio. 10 Aga te Genuai Bidigo be tomoba doligi pelama, tama Jeremaiago po te bukude elalubo po tigidali nedelama, te tigidali we bidigo odali. Barukgo te buku nedebo sogo, aga te be habu sunumi me deliba doligi pali, te Gemariago be habu, te Safango ogwa. Polobadu Safan te kingo kuskus sę ebo bidi bidali. Te be habu te sisinibo pesage ugwadu elaluali, te Genuai Bidigo be sunumi pąde, augwa nogi eyu Gesi Sunumi Dao wai.

11 Mikaia, te Gemariago ogwa, te Safango bulali wąį, aga te Genuai Bidigo bede bidai, tama Barukgo Genuai Bidigo po te bukude nedebo odalio. 12 Tialima, aga te kingo beba aiya dulali. Tama aga te kingo kuskusgo be habu tomoba pali, te tigidali kingo tobolu bidi ofisa dali, te kuskus Elisama te sisinama, po mibo be habu elaluali. Te ofisa dabego nogi e tiwai dao, Delaia, te Semaiago ogwa, Elnatan, te Akborgo ogwa, me Gemaria, Safango ogwa, me Sedekaia, Hananiago ogwa dao. Te gasa ofisa tigidali me bidalio. 13 Tama Mikaiago te Barukgo te we bidi augwaliba te po nedebadi, agai odali po te augwaliba pusali.

14 Te ofisa dabego te Mikaiago po odama, tialima augwaligo te bidi me deli tagala palama, te Baruk sigi pai. Te bidi aga nogi Jehudi, te Netaniago ogwa, te Selemiago bulali wąį da. Tama Selemia te Kusigo ogwa. Tialima, Jehudigo Barukba te tiwai po wagi pali, “Nago te we bidiba nedali buku selasa asao.” Tialima, Barukgo te buku selama, te ofisa dabeba sesalio. 15 Aga sabalobo si da, teda te ofisa dabego agabolo te tiwai po wai, “Nage duagulama, te buku nedama, dago odaibao,” wali. Tama Barukgo te bukude po augwaliba nedalio. 16 Augwaligo te bukude nedali po tigidali odama, te augwali wi elama, te midigi dwai mu siyu, te augwa hasiba digi tonono palio. Tama augwaligo Barukbolo te tama po wali, “Mu tama dao, dago kingba te sę yabo po dabe pusugi paibao,” wali. 17 Tama augwaligo Barukba te tiwai po hanalu wali, “Nago dabolo wao. Magi elama nago te po asęai dawe? Te Jeremaiago po odubadi, nago asęai dawe?” 18 Tama Barukgo te po wai, “Te dolo dao. Jeremaiago enabolo te tigidali po mobaso, tama eno te asębo nai medabu selama, te eno agai po te bukude asęai dao,” wali 19 Tialima, ofisa dabego Barukbolo te tiwai po wali, “Nage pelama, Jeremaia selama, dage si geme dula sigi pao, tiyu genuai bidi dabego te po odama, te dage si dali wado yabuo. Te dage si dula sigi pabo pesage te bidi me deligo konemainogo me elamu dao,” wali.

20 Tialima, te ofisa dabego Barukgo nogode te buku selama, te Elisamago be habuba muani, te kingo kuskus dao. Tama augwali hodasa pelama, king te bidi sisinibo pesageba sugi pelama, tama augwaligo agabolo te sę pedelali po pusalio. 21 Kingo te po odama da, teda agai te Jehudi tagala palama, te buku sigi pali. Jehudigo te buku te Elisamago be habude selama, te kingba dali, te king pąde dolaluali ofisa dabeba me nedalio. 22 Te polua 9 wabode te sę dabe pedelali, te kedau sogo ebadi. Te sogo te king aga te kedau sogo bidibo bede bidibadi dao. Aga te isi pąde dugulalu, te aga tigi posolo iliyu, isi gogo neduai. 23 Jehudigo te buku nedebo ebadi, te agai po meba nedela silibo si da, teda kingo te dwasianu hwą ge selama, tama te Jehudigo nedela silali pepa pedai te hwą gego tologolama, te isiba sąwai, kingo te tama sę ela pidu pidu genama, te buku tigidali ula silai dao. 24 King dali, aga ofisa dabego me, te bukude po tigidali odali, tiali goli augwa te wi dwasianu me isąma, te augwa ugwa dabe pisilama, te augwa yali kolesaga homu dene ebo me ola mabeo. 25 Elnatan, me Delaia, me Gemaria, te bidi selago te buku isiba ulugio po bomo yali, tiali goli kingo augwaligo po me odobeo. 26 Tama kingo aga ogwa, Jeremelbolo bomo yai po muani, me te Seraia, te Asrielgo ogwa, me Selemia, te Apdelgo ogwa, te augwali pelama, te profet Jeremaia, me kuskus Baruk, te augwali si pageabi igi pomainogo tagala palali. Tiali goli, Genuai Bidigo augwali si geme dualama, tama augwaligo te bidi si me subeo.

27 Kingo te Barukgo asęani buku siaba ulali tudi badu nosali, Genuai Bidigo Jeremaiabolo te tiwai po wali, 28 “Gasa buku me selama, te king Jehoiakimgo isiba ulali bukude asęani po tobage tiwai naga ma asęao,” wali. 29 “Tama me, nago kingba te tiwai po asęao, ‘Ena Genuai Bidi, eno te po obao, king Jehoiakim, naga digi te buku isiba uluyu, nago te tiwai po wali, “Dego te Jeremaiabolo obaso, te Babilon king te aselama, te tǫ kantri dolama, te tigidali we bidi ela muyu, te hasa sibi me ela mueiba po asęai dawe?” 30 King Jehoiakim nago te tobage po wali, tama ena Genuai Bidigo, eno nageba homu koneama, eno te po obao, te nago hani bidi me deli te king pedelama, te Devitgo sia kingde me dugulalugobeo. Te Jehoiakim nage isibo si da, teda augwaligo nago tigi te tǫba sąnama, te giligago posolo ilama, te hulide ais agaba tulalueibao. 31 Te eno nagebolo me, te nago wai dabeba me, te nago ofisa dabeba me, te dwai dene mu ilama, te dagego dwai kolesaga yali wei ponaibao. Te eno dwai dene me sęgę mabo sę te Jerusalem me Juda we bidi dabeba yaibao, te eno yaibao po wali gilama te sę yaibao. Eno te bukude asęani po augwaliba mani, tiali goli augwaligo me odobeo,’ te po te king Jehoiakimbolo asęao” Genuai Bidigo Jeremaiabolo wali.

32 Tialima, Jeremaiago gesi buku selama, te kuskus Barukbolo mawai. Tama Jeremaiago te king Jehoiakimgo isiba ulali bukude elaluali po tigidali ma pusai. Tama me agai te gasa po te po tobage tiwai naga pusali. Tama Barukgo te tigidali po te gesi bukude asęai dao. †Te kolesaga koneani bidi hauwago homugo te gesi bukude po dabe te megi elalubo me polasa elaluali po te buku profet Jeremaiago po megi nago nedebao homu yali. Tiali goli, te me badu pedai mu augwali e sogo asęani te dago mu konebeo, te mena badu pedai augwaligo te nosali wadolama yali homu ebao. Te e po page me te Dąį 37:1 tede suao, me te 2 Kin 24:17; 2 Sto 36:10, tede me te po page elalubao.