12
Mariago te dwagi yai denami ebo wel Jisas sągąde gelai
(Mat 26:6-13; Mak 14:3-9)
1 Te Sarere deli elalubadi, te Juda bagego bo disąwai nai bret tubo si, te sogo pedalaibao. Te olo bidibo sogo nogi Pasova dao. Te Pasova sogo pedalisiąbadi, tama Jisas te Betani be naniba pai, te Lasarus aga bulu dao. Te bidi Jisasgo gų pagede hodolali bidi dao. 2 Augwaligo Jisas nai te bulude nogeai. Tama te we Marta agai te nai dobabo tau sai. Tama Lasarus Jisas dali nai tubo bidi dabe dali dulaluai. 3 Tilama, te we Maria aga dwagi yai denami ebo wel selasa asai, dwasianu genagide. Te wel abelabo moni te hauwa mu, te dila pai nai mu dao. Agai te wel Jisas sągą sawalide pilai. Tama Jisas sągą Maria aga moni bobobage tobolu nisigo holai. Tama te bede bidali we bidi tigidali augwaligo te wel denami odai.
4 Te Jisas aga wali pabo bidi me Judas, aga page bulu Keriot, nosali te bidigo Jisas boi bidigo nogoba muani bidi, agai te wede wado po wai. 5 Agai te po wai, “Te we agai te wel dabolo menama, tama dago te wel munama, gasa bidigo abelegi sogo da, teda dago masigi hauwa 300 kina sigi dao. Te sę egi sogo da, teda te masigi ge dago te nai meni yai we bidibolo magi da. Magi baso agai te tiwai sę ebewe?” Judasgo te po wai. 6 Judas agai te nai meni yai we bidide homu dene elama, te po wabeo. Menio. Aga nai wi sabo bidi bidai dao. Tama agai te Jisas wali pabo bagego masigi mubo halobage tolalu, tama aga te halobagede mubo masigi deli deli sogo meba wi sai dao. 7 Tialima Jisasgo te po Judasbolo wai, “Te we tagalao, wado po wagio. Agai te wel tolalubadi, ena gų pageba muabo sogo asobo si, te wel ena tigide mumainao. 8 Nai meni yai we bidi augwali dage dali sesemane sogo bidaibao. Tama tibaso, dagego augwali tau sabo sogo hauwa elaluaibao. Tialima, ena da dage dali sesemane sogo bidigobeo,” Jisasgo te po wai.
Te pris tobolu bage augwaligo Lasarus elabo po miai
9 Te Juda bage hauwa mu augwaligo Jisas te be nani Betanide bidibo po odolama, tama teba Jisas sugi pai. Augwali Jisas naga suainogo asobeo. Augwaligo Lasarus te Jisasgo polobadu gų pagede ma hodolali bidi dao obaso, te Lasarus me augwaligo suainogo asai. 10 Tama tibaso, te pris hani tobolu bidi dabe augwaligo Lasarus me elabo po miai. 11 Magi basowe? Juda we bidi hauwa augwaligo te Jisasgo Lasarus dali yali sęde homu elama, tama augwaligo te pris bage wali pabo tagalama, tama augwaligo augwa homu tigidali Jisasba naga muani.
Jisas Jerusalem hanu tomoba tuni bidi tiwai pai
(Mat 21:1-11; Mak 1:1-11; Luk 19:28-40)
12 Umabo we bidi augwali Jerusalem moni hanuba asai dao, te Pasova olo bidibo side. Tama do tama wabo sogo augwaligo Jisas Jerusalem buluba asaibao wabo po augwaligo odai. 13 Tama tibaso, genuai bidi asobo homu eyu, augwaligo te ni sebedi nologo tiwai ni selama, Jisas tųdu tiąba pai. Augwaligo bomo elama, i wai, “Dago Godigo nogi ugwaba sao. Dago te bidi nogi ugwaba sao. Aga Genuai Bidigo nogide asai. Aga da Israel bidi dabego tuni bidi dao,” augwaligo te po wai, Jisasde. Te genuai bidi dabe augwali genuai wiegi yai kibu hos tudide dualasa pabo dao.
14 Tialima Jisas aga nagamea pai homu eyu, tama gasa kibu hos nogi donki, te donki wai selama, tama te donki wai tudide dualasa pai. Te yali sę te Godigo bukude wali po egilama, te po tama wai,
15 “Te dage Jerusalem hanu tomode bidiyu te
bulu du nogi Saion tede bidibo bage, dage wi egio.
Suao. Dagego tuni bidi asobo, aga kibu donki waide
dualasa asobao,” *Sek 9:9
te po polobadu bukude tama po asęani.
16 Te sę yali sogo Jisas wali pabo bidi dabe augwaligo te sę page konebeo. Tiali goli nosali Jisas dagaluba hodaluama, aga genuai nogi dali, genuai bomo dali si ma selama, te sogo augwaligo te bukude asęani po ma koneai. Te po ma koneyu, augwaligo te homu yai ‘Jisas te kibu donki wai tudide dualasa pali me, te we bidi augwaligo wali po me, te po si polobadu bukude asęani po wali peyu, te sę yai.’
17 Polobadu Lasarus isilama, gų pagede munalubadi, tama we bidi hauwa augwali Jisas aga dali bidibadi, tama agai Lasarus i olama, hodolai, tama augwaligo suai. Megi te we bidi hauwa augwaligo Jisasgo te yali sę po te gasa buludu tamadi asai we bidibolo pusai. 18 Te tamadi asai we bidi augwaligo Jisasgo te bomai sę yali po odobaso, tama augwali Jisas tiąba pai. 19 Tama te Farisi bage augwaligo te we bidigo te sę ebo sulama, tama augwa hasi po weyu, te po wai, “Megi dagego koneao. Agade dago yali sę usu ebeo. Tigidali tǫde bidibo we bidi augwaligo aga wali poba,” te Farisi bage augwaligo te po wai.
Grik bidi dabe augwaligo Jisas suainogo yai
20 We bidi umabo augwali te olo bidibo side Jerusalem hanuba holama, lotu po Godibolo wainogo yai. Tama Grik bidi hani bidi me badu augwali me Jerusalem hanuba lotu po wagasai. 21 Te Grik bage augwali Filip pageba asai. (Te bidi Filip aga page bulu te Betsaida be nani, te Galili tǫde.) Tama te Grik po wabo bage augwaligo Filipbolo hanaluyu, te po wai, “Edao, dago Jisas gedugo sulama, te bidi deli dali dago po mieo,” te po wai. 22 Tama tilama, Filip te bidi Andru pageba pelama, tama agabolo te Grik bagego hanalu wali po pusali. Tama pusulama, tama Andru dali, Filip dali augwali si pelama, Jisasbolo te Grik bidi dabego wali po wagi pai. 23 Tama Jisasgo augwali dali po wei ponoyu, te po wai, “Te Godigo Bidi Mu aga moni nogi dali, moni bomo dali, te si sabo sogo mu pedalai dao, megi. 24 Eno mu po dagebolo obao, te nai wit wai tǫba tulaluai, te pedama, kulubi holisiąyu da, te agaduba deli bidaibao, te tǫde daumua paibao. Tialima, aga pedama, kulubi pedaliyu da, te agai nai hauwa walaibao. Te ena me tiwai dao. 25 Tama te tiwai bidi aga tǫde bidibo sogode aga tobade aga digi dąų obaso da, teda nosali te bidi aga mu bidada pabo sogo mu hagawaibao. Me ma, bidigo e tǫde bidibo sogo aga digi tudiba muyu da, te bidi aga bidibo sogo mu elaluaibao, aga bidada peyu, bidada paibao. 26 Niwai bidi me deligo eno sę yainogo ebo bidi, te bidi aga ena wali asao. Tama ena bidibo bulu, te bulude naga eno sę ebo bidi ena dali bidaibao. Bidigo eno sę ebo bidi, te eno Ayago te genuai nogi mawaibao,” Jisasgo te po wai.
Jisas aga isabo te po wai
27 Agai po ma weyu, Jisasgo te po wai, “Megi eno homu sęgę mu eyu, midigi ebao. Tama eno magi po wagowe? Tiyu eno te po wagawe, ‘Aya, nago te enabolo tamadi pedalainogo ebo sę sela sąyao, enaba asidali.’ Eno te po wagawe? Woo, te po eno wagobeo. Tialima, te tiabo sogo ena pedalagasai dao, te ena dene somainogo yaibao. 28 Aya, naga nogi genuai emainao, eno homugo tama te ebo dao,” Jisasgo te po wai. Te po olama, tama dagaludu po me deli duali, “Eno ena nogi genuai yai dao. Tama eno nogi genuai ma ilaibao,” dagaludu po asiyu, te po Jisas dali wai.
29 We bidi dabe pąde dolaluai, augwaligo te po odolama, mebago te po wai, “Be kulu wai,” tama mebago te po wai, “Ensel mobo bidi me deligo aga dali po wai,” te po wai. 30 Jisasgo po wei ponoyu te po wai, “Te wali pogo ena tau sabo po wabeo. Menio. Te wali po agai dage tobade asai, dage tau somainogo yai. 31 Megi Godigo tǫde we bidi osola suyu, sęgę mabo sogo dao. Megi e tǫde elalubo dwai kolesaga tobolu bidi Satan sela sąbo sogo dao. 32 Nosali augwaligo ena ni pedaide ugwaba selama, elaibao. Tama te sę ebo sogo eno tigidali tǫde we bidi ena pageba gegasa asaibao,” Jisasgo te po wai. 33 Agai augwalibolo aga isabo tų ola mayu, agai augwali dali te po wai.
34 Te we bidi augwaligo Jisasbolo po wei ponoyu, te po wai, “Dago bomo yai pode tama po elalubo dao, Godigo sa muyu, asaiba wali bidi Krais aga bidada peyu, bidada paibao, te po wai. Tama tibaso, magi baso nago te po obawe, augwaligo te Godigo Bidi Mu ugwaba sao, po wai. Te Godigo Bidi Mu wali te de dawe?” augwaligo te po wai. *Tib 110:4; Ais 9:7; Ese 37:25; Dan 7:14
35 Tama Jisasgo augwalibolo te po wai, “Dwasianu sogo me te ula dage dali bidaibao. Te hulia sabo dageba asidali weyu, megi dagego te ula elalubo si, te ulade dage bidao. Te hulide pabo bidi aga mena pabowe te agai konegobeo. 36 Megi ula dagede elalubao. Tama tibaso, duga homu tigidali te ulaba muao. Tama tilama, dage te ula tiwai pedalama, bidaibao,” Jisasgo te po augwalibolo wai.
Juda bage hauwa augwaligo homu Jisasba mube
Jisasgo te po olama, tama agai augwali taga peyu, geme duala sigi pai. 37 Agai yali bomai sę hauwa augwaligo suali goli, augwaligo agabolo homu dąų olama mubeo. 38 Magi basowe? Polobadu Godigo nosali yabo sę po ola mani profet bidi nogi Aisaia, agai asęani po usu numainogo yai. Aisaiago polobadu te po wai,
“Genuai Bidi, dago wali po mena bidigo aga homu
te poba mubowe? Bidi menio. Tama Genuai Bidigo
aga bomo yai sę yali goli te bidi mego te homu teba
me mubeo,” *Ais 53:1
Aisaiago te po asęani. 39 Tama te we bidi augwaligo homu Jisasba mubo usu egobeo. Magi basowe? Po me Aisaiago asęani, e dao,
40 “ ‘Augwaligo homu begelegi sogo da, teda eno
augwali usu ma iligi da,’ Godigo te po wai. Tialima,
augwaligo gedugo sulama, homugo koneidali weyu,
Godigo augwaligo gedu haluai dao. Agai augwali
te homu tomoba masigi sąwai gagawai we bidi
ilali,” *Ais 6:10
Aisaiago te po polobadu asęani. 41 Aisaiago Jisasgo nosali sabo moni bomo suyu, agai moni nogi po odoyu yai dao. Tama tibaso Aisaiago agade te po asęani.
42 Te Juda bage augwaligo Jisasgo yali bomai sę suali goli, augwaligo agabolo homu tigidali mubeo. Tiali digi, Juda bage tobolu bidi hauwa augwaligo agabolo augwa homu muai. Tialima, augwali te Farisi bage dali wi eyu, augwaligo augwa homu Jisasbolo muani po gasa bidibolo hanilama te po wabeo. Farisi bagego augwali te bomo yai po ola mabo be tomoba asobo habu selidali weyu, augwaligo gasa bidibolo te po pusubeo. 43 Augwaligo te homu yai, ‘Bidi dabego dabolo “Dage dwagi yai bage dao,” obaso, te usu dao, te genuai dao. Te Godigo naga dabolo “Dage dwagi yai bidi dao,” obaso, te genuai menio, usu egobeo,’ augwaligo te homu yai.
Jisasgo pogo bidi po tų ela mawaibao
44 Te Jisasgo i weyu, te po wai, “Bidigo homu enaba mubo bidi, agai enabolo naga homu mubeo. Te bidi agai homu te ena tagala palali bidibolo me muani. 45 Tama niwai bidigo aga gedugo ena suali bidi, agai te ena tagala palali bidi me subo. 46 Ena e tǫba asali, te ula tiwai dao. Magi basowe? Tigidali bidi enabolo homu muani bidi augwali te hulide bididali weyu, ena te tǫde ula tiwai asai dao. 47 Bidi me deligo eno po odolama, wali pisąwani bidi, aga eno po tų ela magobeo. Ena tǫba asali, te eno te tǫde we bidi po tų ela momainogo asobeo. Ena asali eno augwali ma sagasainogo asai. 48 Bidigo te ena tudiba munama, eno po agai sela sąbo bidi, aga po tų yabo sę elalubao. Eno wali po, te pogo nosali te tǫ dagalu silibo side te eno wali pogo te bidi dali po tų yaibao. 49 Magi basowe? Eno po ena digi homugo me wabeo. Te menio. Aya Godigo ena tagala palobaso, ena asai dao. Aga digi enabolo te po wai, ‘Nago te sę eyu, po weyu yao,’ te po wai. 50 Tama eno koneai, eno Ayago pogo te bidada peyu, bidada pabo bomo te we bidibolo mabo dao. Tama tibaso, eno wabo po tigidali agai enabolo wali po eno te po tigidali wabo dao,” Jisasgo te po wai.