1 Te bidi Jisasgo te po aga bidi dabebolo olama, tama agai dagaluba tonaluyu, te po wai, “Aya, te bodolu muani sogo pedalalio. Tama eno nagebolo te genuai nogi momainogo, tama nago enabolo te genuai nogi mao,” Jisasgo aga Aya God dali te po wai. 2 “Tama nago ena sa muyu, moni bomo mayu yai dao. Ena te tigidali tǫde we bidigo genuai bidi dao weyu, tama nago te bomo enabolo mawai dao. Magi basowe? Te bidada pabo bomo te we bidi nago enabolo mani we bidi augwali eno te bidada pabo bomo mawaibao, te homu eyu, nago enabolo te nogi yai sę mawai dao. Tama te bidada pabo bomo menama, tama augwali bidada peyu, bidada paibao, gamonaibao. 3 Tama te bidada pabo bomo page e dao. Augwaligo nage koneyu, nage God deli mu dao. Augwaligo Jisas Krais koneyu, nago aga tagala palobaso asai bidi dao. Augwaligo te si mu koneyu da, teda te bidada pabo page te dao. 4 Eno nago genuai nogi dali, bomo dali, te si te tǫde we bidi augwalibolo ola mawai. Nago enabolo yao olama mani sę, te sę eno tigidali mu ela silai dao. Tama tiyu, eno nago nogi dali bomo dali te we bidi augwalibolo ola mawai. 5 Polobadu, te tǫ pedalisiąbadi digi, tama ena nage dali bidai dao. Tama ena nage dali bidiyu, bomo yai ula elaluai dao. Aya, ena nage dali bidiyu, tama nago megi enabolo te bomo yai ula digi ma mao,” Jisasgo te po God dali wai.

6 “Tǫde bidibo we bidi meba nago sa muyu, tama nago augwali dią sali. Tama nago augwali dią selama, tama nago augwali enabolo mani. Te augwali nago bidi te elaluama, tama nago enabolo mani. Tama augwalibolo eno nago nogi haninai dao. Tama augwaligo nago po bugagia wali pai dao. 7 Megi da augwaligo konebo, tigidali nai nago enabolo mani nai te nage pagedu te nai asai. 8 Nago enabolo wali po, te po tigidali eno augwalibolo pusai dao. Tama augwaligo te po sali. Te po selama, tama augwaligo mu koneai, polobadu ena nage dali bidilama, asai dao. Tama nago ena tagala palama, ena asai dao, te pode augwaligo homugo te po wali, ‘Te po mu po da,’ olama, tama augwaligo konealubo po te pode dąų wabo dao,” Jisasgo te po wai.

9 “Te nago augwali tau somainogo, eno nagebolo e po obao. Eno nago te tǫde we bidi augwali tau somainogo me wabeo. Eno e po nagebolo obao, nago ena mani bidi dabe augwali tau somainogo, augwali nago bidi hani bidibaso, eno te po nage dali obao. 10 Tama eno bidi tigidali augwali te nago bidi me dao. Tama nago bidi tigidali te eno bidi dabe dao. Tama augwaligo eno nogi ugwaba sai dao. 11 Tama megi da ena tǫde ma bidigobeo. Tialima, augwali da tǫde me bideibao. Tama ena da nage bidibo madigi asobao. Aya, nage magi dwai sę me isiąwai bidi, nago augwali tonaluao. Nago enabolo nago bomo mawai dao. Tama te bomogo nago augwali tonaluao, augwali me deli homu naga elama, bidimainogo yao. Dadi si deli homu elama bidibo gilama, te tiwai augwali me te emainao. 12 Tama ena augwali dali bidibo sogo da, nago nogi elalubo bomogo eno augwali bugagia tonaluali, nago te enabolo mani bomo. Eno augwali bugagia tonaluyu, tama augwali me hagabeo. Hagawali te bidi deli digi hagawai dao. Te nago polobadu bukude asęyu wali, te po nai gilama walomainogo, te dolabo bidi deli naga tamadi hagawalio,” wali. *Tib 41:9; Jon 13:18

13 “Megi ena nage pageba asobao. Tama eno te po e tǫde nage dali obao, te eno dwagi yai homu eno bidi dabe augwalide pągąnalumainogo augwali dwagi yai homu mu emainogo ebao. 14 Nago po eno augwalibolo mawai dao. Tama tǫde we bidigo augwali dali boi bidi gagawai dao. Ena da e tǫde bidi menio. Te tiwai augwali me e tǫde bidi menio. Tama tibaso, tǫde we bidigo augwali dali boi bidi gagawai dao. 15 Tama eno e po nage dali weyu, eno nage augwali te tǫde bidibo tagalomainogo hanalu wabeo. Te meni. Nago augwali bugagia tonalumainogo eno te po nagebolo obao, tama te dwai bidi Satan agai augwali dolidali weyu, eno e po nagebolo obao. 16 Ena da e tǫde bidi menio. Te tiwai augwali me e tǫde bidi menio. 17 Tama tibaso, naga digi nago mu po augwalibolo ola mao, augwali gasagi yai tedali bidi dabe bidimainogo, magi sę isiąwai bidi dabe bidimainogo yao. 18 Tama polobadu nago ena tǫba tagala palama, tama ena augwali tǫde we bidi tomode bidai. Te tama tiwai eno e bidi dabe me tagala palama, augwali te tǫde we bidi tomode bidigi pali. 19 Tama eno augwali tobade tau siyu, ena digi ena bidabo ula tagalama, nago po wali peyu, ena isaibao. Tama po mu wabogo augwali nago bidi hani mu bidimainao,” Jisasgo te po wai.

20 “Te nago augwali naga tau somainogo eno nage dali e po wabeo. Menio. Nosali augwaligo gasa we bidibolo eno po ola mayu, tama te po odobo we bidi augwaligo augwa homu enaba muaibao. Tama te tibo we bidi augwali tobade me tau siyu, tama eno megi nage dali e po obao, 21 augwali tigidali deli homu naga elama bidimainogo ebao. Aya, nage ena dali wadoloyu, tama ena nage dali wadoloyu bidibo tiwai, eno homugo augwali da si dali homu deli elama, wadoloyu bidimaio. Tama te tiwai elama, tama tǫde we bidi augwaligo te nago ena e tǫba tagala palali po odama, tama augwaligo te mu po dao olama, koneagameo. Tama te sę pedalomainogo, eno e po nage dali megi obao. 22 Nago enabolo te bomo mani, te bomo eno augwalibolo manio, augwali deli homu elama, bidimainogo, dadi si deli homu elama bidibo tiwai, augwali me te deli homu elama bidimainogo eno te bomo augwalibolo mani. 23 Ena e bidi dabe augwali dali bidiyu, tama nage ena dali bidiyu yai, tama tiwai eno homugo augwali me deli homu elama, bidimainao. Tama tiyu, te tǫde we bidi augwaligo koneaibao, nago ena tagala palama, ena asai. Te me augwaligo koneaibao, te nago ena godolo mu ebogia, nago e bidi dabe me godolo mu ebo dao,” Jisasgo te po wai.

24 “Aya, eno homugo nago ena mani bidi dabe augwali ena bidibo bulude ena dali da hodobo nosali bidaio, augwaligo eno bomo yai ula dali bomo dali sumainogo yaibao. Polobadu, te tǫ pedalisiąbadi, te sogo nago ena godolo mu eyu, tama nago te bomo yai ula dali te bomo dali enabolo mawai dao. 25 Aya, nage doloba pai bidi mu dao. Tama tǫde we bidi augwaligo nage konebeo. Tiali goli, eno da nage koneai dao. Tama e bidi dabe augwaligo konebao, te nago ena tagala palama, ena asai dao. 26 Tama nago nogi eno augwalibolo haninai dao. Tama tiyu, te sę nosali me eno mu ela paibao. Magi basowe? Te nago ena godolo mu ebo homu tiwai augwa hasi te godolo mu ebo homu emainogo eno nago nogi augwalibolo haninai dao. Tama ena me augwali dali bidimainogo, eno nago nogi augwalibolo hanilaibao,” Jisasgo te po Godigo aga bidi dabe tau somainogo wai.