1 Te Israel dabe augwali te bulu Sitimde bidalubadi, tama Josuago te moni tǫ Kenanba sa pabo bidi si tagala palali, tama agai augwali sibolo te po wai, “Dage si pelama, te moni tǫ Jeriko genuai hanu me, te pąde elalubo tǫ me, bugagia suao.” Tialima, te bidi si te Jeriko hanu tǫba pelama, tama te penani we me deligo beba sabolali, te we aga nogi Rahap. Tama augwali si agai bede bidai. *Hib 11:31; Jer 2:25

2 Tama gasa bidi dabe augwaligo te Jeriko tuni bidibolo te tiwai po wai, “Dua dao! Te Israel bidi meba te e sogo hulide te tǫba sa asobo bidi asai dao.” 3 Tama te tǫde te gavman tuni bidigo te tiwai po odolama, agai te bidi meba tagala palama, te po te Rahapbolo wagi pao wali, “Te nago bede bidibo bidi dabe, augwali te e tǫba sa asai bidi dabe dao! Nago augwali odasa asao,” wali.

4 Rahapgo te bidi si deli deli geme dualama, tama agai te tuni bidigo po tolagasali bage augwalibolo te po wai, “Mu tamao, bidi meba te eno beba asali. Tiali goli, augwali mena bulu badu asali te eno konebeo. 5 Te be pio ebode, te bidi dabego te hanu tomoba asobo genuai sunumi palibo sogo, augwali ede bidali ma tagalali. Augwali menaba pali, eno konebe, augwaligo enabolo me wabeo. Tiali goli, dagego augwali wali polo pobaso da, teda dagego augwali gegebo usu yaibao,” te po wai. 6 Mu tamao, Rahapgo te po wali, tiali goli hasia bolo agai augwali si te aga bidigi beba ugwaba odasa holama, tama agai augwali si te aga te name ugwa nigibo nosai dabe dunama muani, te dologoba geme dualai dao. 7 Tialima, megi da, te tuni bidigo bage augwaligo te hanu tagalama, tama augwali te sa asali bidi si gegegi peyu pai. Augwaligo gege pali pidubadi genama, te wę Jordan bolabo madi me deliba pabo sunumidu pai. Nosali augwaligo te hanu taga soai madi, te sunumi tonalubo bidi dabego te hanu tomoba pabo genuai sunumi paliali.

8 Te Israel bidi si godege pisąbadi, tama Rahap te be ugwaba holama, 9 tama augwali sibolo te po wai, “Eno koneani, Genuai Bidigo e genuai tǫ te dage Israel dabego nogoba mawainogo ebao. Tama eno po dolo mu dage sibolo obao. Da tigidali dagede wi elama, tama da didibili dwai mu ebo. 10 Magi baso meni, dagego te Isip tǫ taga soali sogo te Genuai Bidigo te Nosai Elaluali Tamu Ąį wai ilali po augwaligo dabolo te po pusai. Tama dago odali, dagego te Amor dabego gavman tuni bidi Sihon de Ok si me, te augwali sigo ami bidi dabe dali, te wę Jordan u badu ela silali po dago odai dao. *Sai 14:21; Nam 21:21-35 11 Dago te po odolama, tama da dagede wi mu ebao. Tama megi, da tigidali bomo menio. Magi baso meni, God, dagego Genuai Bidi, aga te dagalu de tǫ sigo God dao. 12 Tialima, megi da, dage sigo te Genuai Bidigo gedude te dage sigo eno hani bage bugagia tonaluabo po dąų walao, magi baso meni, te eno dage si bugagia tonaluali tiwai gilama yao. Tama dage sigo duga si dąų wali po mu dąų walobo dąį me dedeli enabolo mao. 13 Tama mayu, dage Israel dabego te eno aya ida badi, te ama, me abe, me te augwa hani bage tigidali munu me ela munamuo! Dage sigo te bidi dabe augwaligo da elemainu sula tagalu munu me tilamu dao!” te we Rahapgo te po wali.

14 Tialima, te bidi sigo po wei ponoyu, te po wai, “Da sigo po nagebolo dąų mu obao. Tama da sigo te dąų wali po togobaso da, te Godigo da si dolomainu yaibao. Te nago da sigo yali sę po dabe hanilisiąbaso da, teda da sigo te dąų wali po munu me togosiąyu, te nage dali, nago hani bage dali tau saibao, te Genuai Bidigo te genuai tǫ dabolo mabo sogo te tama tiaibao,” te po wai.

15 Te penani we Rahapgo be te moni hanu bagulali obo dali kisilai elaluai, tama me badu dąį togwali badu te be pola sali windo dedage te obo ugwadu elaluai. Tama Rahapgo te bono baklain te windode kęnama, tama baklain te masigigo nigali bobobage obo bulu badu manama, te bidi sigo te bonodu nogo toda duluyu, aiyaba dulama, te hanu buluba dįą pomainu tama tiai dao. 16 Tama augwali si tama painu ebadi, tama Rahapgo te po wai, “Dage si te bulu duba geme duala sigi pelama, sela sogo bidao. Tiyu, tuni bidigo bidi dabego dage si gegelama, suabuo. Nosali augwali te Jeriko hanuba ma soai digi, teda duga si buluba ma pao,” wali.

17 Tama te bidi sigo Rahapbolo te po wai, “Te da sigo nagebolo te yao wabo sę tigidali ela silibaso da, teda da sigo megi nagebolo e dąų wabo po munu me togogobeo. 18 Tialima, megi nago bugagia odao! Te da Israel dabe e buluba sabalobo sogode, nago te mama yai bono kęnao, megi da si aiyaba e dulubo windode, te da sigo nagebolo e mabo mama yai bono kęnao. Tama nago naga aya ida, me te ama dede dabe, me te naga hani bage tigidali selama, tama augwali nago beba naga sisinao. 19 Te me deli te bede bidali tagalama, te hanuba pabo sunumidu pobadi, tama augwali ela muani da, teda aga digi te dolabo page yali dao. Te da sigo sę menio. Tiali goli, me deli te be tomode bidibadi dolobaso da, teda te sę yali page da side elaluaibao. 20 Tiali goli, dua dao! Te nago da sigo e yali sę po pusuyu da, teda da sigo dąų wali po te sia saibao,” wali.

21 Tama Rahapgo po wei ponani, “Eno dage sigo pode usu da po obao.” Agai te tama po olama, tama agai augwali si tagala palai. Nosali agai te mama yai bono te be windode gebelai.

22 Tialima, te bidi si te bulu du dabeba sabolama, tama augwali si geme dualaludai. Tama tuni bidigo hani dabe augwaligo te bidi si te sunumidu tigidali bulu badu sela sogo gegedu gegedubadi geai. Tiali goli, augwaligo bidi me deli susiąbaso, tama augwali te moni hanu Jerikoba ma geasa pai. 23 Nosali te bidi sigo te bulu du dabe tagalama, tama aiyaba dulai, tama augwali si te wę Jordan nogelama, tama te Josua bidibo madi ma sabolama, tama te tigidali sę pedelali po agabolo pusai. 24 Tama te bidi sigo Josuabolo te po wai, “Mu tamao, Genuai Bidigo te tǫ tigidali da nogoba mawaibao. Awe, te tǫ tolalubo tuni bidi aga we bidi tigidali dade te dwai wi mu ebo dao,” wali.