Te We Bidi Dabego Jerusalem Hagede Gela Wali
Hasia Nedebo Po
Bidi me deligo e buku te Babilon dabego te taun Jerusalem dolali sogo asęai dao. Tama te we bidi augwaligo augwa wiegi yai taun hobede genuai mu yai dao. Hasia te taun Jerusalem me Godigo tempel be tede elaluai dao, aga da te God, aga te Israel hani dali aga dali bidiba wabo piksa tiwai elaluai dao. Tama te Jerusalem dolali sogo da, te Israel dabego te Genuai Bidide homu dąų wali dwasianu tula pai dao, tama augwaligo homu kolesaga dolali. Tama tibaso, augwali gela olama, hobede hauwa mu yali. Te e bukude deli deli dąįde te we bidigo hobedai gela balia Jerusalemde wali, te balia po dao. Te Juda hani augwaligo te genuai sęgę augwaliba pedelali, te sogo ma kone paliyu, augwaligo te balia po weyu ebo dao.
E buku tomode te gasa po me elalubao. Te Juda bagego koneani, te Jerusalem dolali sę te page elaluali. Te page e dao, augwaligo augwa God Genuai Bidi tudiba muyu, tama haniani tibo god dabeba lotu po weyu, dwai kolesaga hauwa mu eyu yai dao. Tama koneama, augwali mebago ge neyu, augwa homu begeleyu, da ma dobola sao po weyu bidai dao. Tama te Dąį 3 te ves 21de gagalama, te ves 26ba sabolama, te ves dabede e tobage po elalubao, God da, te we bidi godolo mu ebo God da, tama “agai te kolesaga munu me siligobeo. Menio. Te agai te kolesaga tigidali bubugade gesi noma pedalubo tiwai ebo dao.”
1
Jerusalem hanu te genuai sęgę elalubo wilawe we tiwai bidibao
1 Jerusalem da, hobede mu dao,
aga te yǫya pai we me deli tiwai bidibao.
Polobadu da, agai we bidi hauwa mu elaluai dao.
Tiali goli, tegoba, megi da, aga olo mu te elalubao.
Awe, polobadu agai gasa tǫ kantri dabe we bidi tomode
genuai nogi elaluai da.
Tiali goli, megi da, aga sęgę genuai elalubao,
te wilawe we me tiwai dao.
Polobadu aga te polalubo kwin we tiwai bidama,
agai provins hauwa tonaluai dao.
Tiali goli, megi da, te boi bidi dabego aga aiyaba
elaluama,
tama aga olo sę ebo we tiwai te bidibao.
2 Polobadu da, tigidali kantri dabego aga abagi wai
dao,
tiali goli megi da, te gasa kantri mego agade hobede
me ebeo.
Te abagi dabego aga dali ili po olama,
tama augwali agai boi bidi pedelali.
Tialima, tigidali sogo hulide Jerusalemgo gela dwai mu
weyu idubo,
mu tama agai gela gųgai nabogedu aiyaba tulalubo
dao.
3 Te boi bidi dabe augwaligo te Jerusalem pąde bidali
Juda dabe dali dwai sę elama, augwali dene manio.
Tama megi da, augwaligo te Juda dabe gasa kantriba
kalabus elama, odasa palio.
Te kantri Juda te meba Israel hani isąwai kantri tomode
elalubo dao,
tiali goli agai bugagia dulalubo meni dao.
Te boi bidi dabego aga pobeasa pelama,
aga bagua sai elaluai dao.
Tiali goli, aga wi pabo usu meni yai dao.
Tama augwaligo aga pageabi yai dao.
4 Te taun Saionba pabo sunumi dabe olo elaluyu,
hobedai gela oduali.
Magi baso meni, te augwalide te genuai lotu wabo
genuai sogo dabede te bidi dabe me augwalidu te
moni lotu be tempelba me soayu isąma ebaso.
Te taun tomoba pabo sunumi dabe olo elalua pali.
Tama te pris dabe augwali homu sęgę mu elama,
te bidigo dene sobaso gela wabo tiwai elama gela
wabo.
Te Saion bulu gesi wegi mani sęgę genuai mu tolobao,
tama augwaligo te tempel bede balia po me wabo
menio.
Tama me te taun Saion aga me te dwai dene mu siyu
elalubao.
5 Te boi bidi dabego ugwa ela holobaso,
augwaligo Jerusalem tonalubo dao.
Tama augwaligo magi naide moni homu me ebo meni.
Magi baso meni.
Te Jerusalem dabego augwalibolo sęgę maiabo usu
isąbaso.
Jerusalemgo Genuai Bidi tudi ola mayu,
tama dwai sę hauwa mu yali.
Tama tibaso, Genuai Bidigo agai
te genuai dene tolomainu tagalali.
Tama te boi bidi dabego te Jerusalemgo wai bǫų dabe
te hwįbode selama, kalabus elama, tigidali digibulu
buluba dabe kalabus elama, odasa pali.
6 Saiongo polobadu elaluali genuai nogi polo tulaluai
dao.
Tama agai tobolu bidi dabe te boi bidi dabede wi
painogo eyu,
augwaligo bomo sia sali,
te nai tusiąwai bulu hasa dabego
augwali dili bomo kilabo tiwai yalio.
7 Megi da, te Jerusalem dolai elalubadi,
aga we bidi dabe digibulu sese mu tama usu nama,
wau bilibo dao.
Tama agai polobadu mu munolua asali wiegi wiegi yai
nai dabeba homu kone ma palobo dao.
Te boi bidi dabego Jerusalem we bidi sali sogo,
te meba gasa hanigo aga me tau sai menio.
Tama te boi bidi dabego aga dolobo suali,
tama augwali gisugu dwai mu wali.
Awe, aga tulalubaso, augwaligo kęnę po wali.
8 Jerusalemgo dwai dwai sę hauwa yai madi,
tama te dwai sę ebogo aga te dwai meda yai nai
pedelali.
Polobadu da, te gasa hanigo agabolo genuai nogi mawai
dao.
Tiali goli, megi da, augwaligo agai hale sulama,
tama augwaligo agabolo posobo po weyu,
gisugu mabo dao.
Tama te Jerusalem hale eyu,
aga gesabidi duala selama, genuai dene ebaso,
hwąwa wabo tiwai yali.
9 Polobadu aga dwai kolesaga te pepeli dilide mu
elaluai dao.
Tiali goli, agai aga dolabo homu kone me ebeo.
Tama tialigo aga mu dolama, mu dolali,
tama bidi mego aga hobede eyu,
tau sabo me egobeo.
Tama Jerusalem agai e tama tiwai po i obao,
“Genuai Bidi, eno e sęgę suao.
Te boi bidi dabego ena aiyaba mu elalualio.
Tama augwaligo ena dolalide wiegi yai homu pemene
elama,
gana pali dao,” wabo.
10 Polobadu te God Genuai Bidi te habu selebo po
weyu,
te Israel hani isąwai bage te moni lotu be tempel
tomoba pelamuo po wai dao.
Tiali goli, te Jerusalem we bidigo suali,
te tobage boi bidi dabe te bomo yai po boliyu,
augwali tomoba pelama,
tama tede elaluali wiegi wiegi yai nai dabe sese
tama wi salio.
11 Te Jerusalem we bidi augwali nasi genuai mu ebaso,
tama augwali nai gegebo bomai sę mu te ebao,
tama augwali hwąwa dwai mu obao.
Augwa tigi bomo ma sainu eyu,
augwaligo augwa wiegi wiegi yai nai dabego
te dobu si ebo sę eyu, te nai sela tubo dao.
Tama Jerusalemgo i weyu, te po obao,
“Genuai Bidi, sulama, koneao, ena dwai bidu,
te olo nai tiwai naga bidibao,” wabo.
12 Jerusalemgo aga pąde elalubo sunumide soabo we
bidi dabeba i wabo sę ebao.
Agai te po obao. “Suiąo,
ena genuai sęgę genuai mu elama,
tama Genuai Bidi agai ena dene genuai mu manio,
te aga sębę moni posolo tiwai mu yali sogode.
Te polobadu te bidigo te tobage dene me sai meni yali
bogo,
tiali goli, dagego homugo te olo nai da weyu ebao.
13 Genuai Bidigo isi tagala palama,
tama eno dili isi ulama,
tama eno bomo tamunanio.
Agai ena hagani wa gebelai digi, ena tola sali.
Tama agai ena sąna palali digi, ena tudiba degali.
Tama agai ena mu tama tagalali digi,
tigidali sogo ena dene dwai mu doliyu ebao.
14 Genuai Bidigo digi eno yali dwai sę sese sisinama,
tama agai dąų olama, kęnama,
tama agai eno magede kęnani.
Tama te dwai sę dabe sęgę mu elama,
eno bomo sese mu silalio.
Tama Genuai Bidigo ena boi bidigo nogoba muani,
tama eno augwali dali hwįabo bomo menio.
15 Genuai Bidigo eno bomai ami bidi dabeba tudi ola
manio.
Agai ami i olama, ena dali hwįagasomainu elama,
tama eno gesi bidi dabe dolalio.
Genuai Bidigo kantri Juda we bidi dabe aiyaba agayalio,
te bidi dabego wain wę nigainu,
te wain du agabo masigi poude te wain agabo tiwai
yalio.
16 Te tialigo eno gela uga selama,
aiyaba dulumainu ilali.
Tama ena dali hobede elama,
tama ena ma dili ilabo bidi menio.
Te boi bidi dabego ena aiyaba polo elaluai madi.
Tama tibaso, eno wai puluba augwali
dodolama mu bidibao,” Jerusalemgo te po obao.
17 Saiongo bidi mebago aga tau somainu homu eyu,
aga nogo balalubao, tiali goli, te bidi aselama,
aga dali hobede eyu, tau siyu me yagasobeo.
Genuai Bidigo boi bidi dabe tigidali bulu badu i olama,
tama te Israel hani dali hwįagasali.
Tama te boi bidi dabego te Jerusalem te dwai damua
pai pesage tiwai mu tonobo ąǫ yali.
18 Tiali goli, Jerusalemgo te po wali,
“Genuai Bidigo ena dali te yali kolesaga te dolo mu dao.
Magi baso meni.
Eno agai po sela sąwai dao.
Tega, dage tigidali kantri we bidi,
dagego eno te po odiąo.
Eno te genuai sęgę tolali suao.
Te boi bidi dabe augwaligo eno gesi bidi
me gesi wegi dabe selama,
tama augwali digibulu tǫ kantri dabeba mu kalabus igi
palio.
19 Eno abagi dabego ena tau somainu i wai dao.
Tiali goli, augwali eno boi bidi pedelalio.
Eno pris dabe, me tobolu bidi dabe,
augwali nasi genuai mu yali.
Tama augwali bugagia bidabo tubo nai gegebo bomai
sę mu yalio.
Tiali goli, augwali nai meniama,
tama augwali eno sunumi dabede isai dao.”
20 “Genuai Bidi, ena suao.
Ena genuai sęgę mu selama,
tama ena dolama mu bidibao.
Tama eno homu dwai mu elalubao.
Magi baso meni, eno hagoma genuai mu elama,
tama nago po sese tama sela sąwai dao.
Te boi bidi dabe augwaligo eno we bidi dabe
eno sunumi dabede ela wiala silalio.
Tama me te bede bidaluali we bidi augwali nasi eyu,
gasi me eyu, isai dao.
21 Te meba gasa we bidi hanigo eno ena te dene ebaso,
gela wabo po odali.
Tiali goli, ena dali hobede yabo bidi meni yai.
Te eno boi bidi dabego nago enabolo te mani te genuai
sęgę po odali.
Tama augwaligo nago te yali sędę augwali wiegi yai
homu pemene genuai mu ebao.
Polobadu nago enabolo dwai dene maiabo bodolu muai
dao.
Tama te bodolu polo pedelalio.
Tiali goli, megi da, eno homugo nago eno boi bidi
dabeba me deli tiwai kolesaga me yao.
22 Nago eno yali dwai sę kone palama,
tama nago ena dene manio.
Tama tialima, nago megi da, te boi bidi dabego dwai
kolesaga koneama,
tama nago ena dali yali te kolesaga tiwai elama,
tama nago te boi bidi dabe dene mao. Magi baso
meni.
Ena gela dwai odubao, tama eno bomo tamunaluyu,
didibili elama, tulolueibao.”