1 Genuai Bidigo Mosesbolo te tiwai po wali, 2 “Te Israel tigidaliba walama. augwaligo te wiegi yai ni oliv wel te eno sel Ugwa Be tomode munalubo lamba muabo wel sesao. Te pris dagego tigidali hulide lam sole udaludaibao,” te po wai. 3 “Arongo te lam sole dabe pio ebode mu udulama. te tigidali hulide te lam ula elaludu. te sogo kigamuba usu naibao. Te lam dabe te genuai walali ugwa dąį togali bulu.badu edade elalu. te Dąų Wali Bomai Po Munalubo Halobage te Tedali Gasagi Yai Mu Be Habu tomode munalubo ena Genuai Bidi, eno sueibao. Eno te bomai po dagebolo mani, te dage me duga hani nosali pedalubo hanigo me te bomai po sesemane wali pao. 4 Arongo te ni dagede elalubo lam sole bugagia tonaluao, te bugagia tonaluyu, te lam ula sula sabuo, te augwali ula elalubo eno sueibao,” wali.

5 Genuai Bidigo Mosesbolo te po ma weyu, te tiwai wali, “Nago te sęgę 12 kilogram elalubo wiegi yai plaua selama, te plauago 12 bret nigao. Te sęgę deli deli dobolama, te bret deli deli nigao. 6 Nosali te bret dabe te tebolba muao, augwa te ni akasgo me wiegi yai golgo nigali, te Genuai Bidi ena gedude e munalueibao. Te bret nani si wasilao, te bret a naga me deli te nani deli deli wasilao. *Sai 25:30 7 Te wiegi yai denami pedalubo pauda meba dali te bret nani si dali muao, te nosali augwaligo te pauda enabolo ofa yao, te bret hasegeliyu, tama yao. 8 Te tigidali Sabatde te pris augwaligo te bret tebolba mubaso eno sueibao. Sesemane sogo te Israel augwaligo te kolesaga wali pao. Tede te po dąų wabo kontrak me deli eno augwali dali ebao. 9 Te bret te Aron dali aga hani pris dabe daligo nai elalueibao. Augwaligo te bret eno sel Ugwa Be obo tomode tuao, magi baso meni, te we bidi augwaligo enaba ofa yali nai dage dao. Te ena nai digi, te eno pris dabeba mawaibao.” Godigo te po Mosesbolo mawai dao. *Mat 12:4; Mak 2:26; Luk 6:4

10-11 Bidi me deli bidali, aga aya Isip bidi, aga ida Israel we me deli. Ida nogi, te Selomit, Selomit te Dirigo wegi, te Dango hani. Te Selomitgo ogwa te bidibo pesagede bidiyu, te Israel bidi me deli dali hwįani. Augwa si hwįbo sę eyu, te Selomitgo ogwago te Genuai Bidigo nogide agabolo po dwai wali. Tama augwaligo aga Mosesba sela palio. 12 Tama Mosesgo aga kalabusiba munama, te Genuai Bidigo te bidiba mena sę yabo po te agabolo wabo tonaluali.

13 Tialima, Genuai Bidigo Mosesbolo po walali, 14 “Te bidi selama, te bidibo pesage buluba pao. Agai enabolo po dwai po wabo odali bidi tigidali, augwaligo nogo aga toboluba muao. Augwaligo tama tebo, te we bidi augwaliba ola mayu, te bidigo dwai sę yalio, te sęgę agade elalubao. Te tigidali we bidigo agaba masigi sąnama, te aga isibo siba usu nao. 15 Nosali nago Israel augwaliba te po walao, ‘Te bidi me deligo enaba po dwai wali da, aga yali dwai sęgę elalubaso, te aga yali sęgo sęgę tolalubo dao. 16 Agai te dwai po wabo sogo ena Genuai Bidi nogi ebaso da, teda aga isimainao. Te Israel bidi mu me, te Israel tomode bidibo gasa hani dabe me, tagalao. Te bidigo ena nogi te tiwai nogi ebaso da, teda tigidali we bidigo agaba masigi sąnama, aga isiboba usu nao,’ te po wao,” wali.

17 “ ‘Te gasa bidi ma we ela mubo bidi yai baso da, teda dagego aga me ela muao. *Sai 21:12 18 Bidigo gasa bidi mego bulmakau ela mubaso da, te agai gasa bulmakau te bidiba wei ponao. Te tobage dwai sę ebo dodolobo kolesaga e tiwai. Bidigo gasa bidigo kibu elali, agai te tobage tiwai naga agaba wei ponao.’ ”

19 “ ‘Te bidi mego gasa bidigo tigi dolobaso da, teda dagego deli tigi poai sę agaba wei ponao. 20 Te agai gasa bidigo dili togai baso, dagego aga dili me togao. Te agai gasa bidigo gedu dolali, dagego agai gedu me dolao. Te agai gasa bidigo kele degai baso da, teda dagego agai kele me degao. Bidigo mena sęgo te gasa bidi dolai baso, dagego te tobage deli kolesaga naga agaba wei ponao. *Sai 21:23-25; Bom 19:21; Mat 5:38 21 Bidigo gasa bidigo kibu ela muani da, agai te bidiba deli tigi tobage naigo wei ponao. Tiali goli, bidigo gasa bidi me ela muani da, dagego te bidi aga digi ela munama, wei ponao. 22 Eno te bomai po deli dage Israelba me dage tomode bidibo gasa haniba me dąį mubao. Ena Genuai Bidi, ena dagego God dao, eno dagebolo te po wai dao,’ ” wali. *Nam 15:16

23 Mosesgo te po dabe Israel we bidi augwaliba pusula silama da, te nosali augwaligo te Godiba po dwai wali bidi selasa, te bidibo pesage buluba odasa pali. Te augwaligo agaba masigi sąnama, aga ela muani. Te kolesaga yali te Israel augwaligo te Genuai Bidigo Mosesba mani po wali peyu yai dao.