1 Tama Jisasgo te po ola silama, tama te sogo naga aga te be tomode bidali tagalama, te bedu buluba soai. Tama aga pelama, te sigi ąį sesege badu dulalugi pai. 2 Tama we bidi hani hauwa aselama. aga pageba sisinagasobaso tama aga te geba me deli daiba holama duagulali, tama te asali we bidi augwali tigidali te sigi ąį sani sesegede bidaluai. 3 Tama agai po digi po hauwa begelama augwalibolo wai. Agai te po wali, “Te bidi me deli pelama, te giba nai wai ge telala biligi pai. 4 Tama agai te nai wai ge telala pobadi, tama te nai wai ge me badu te soabo tųde tudulaluali. Tama te tųde tudulaluali nai ge te ba dabego tuagasai. 5 Tama te nai wai ge me badu te tǫ ili hauwa meni yai digi te masigi elalubo madigi daiba tudulalualio. Te tǫ aiyanu dulisąwai madi tama te tedelaluali nai wai ge polo holali. 6 Tiali goli giliga pedaliyu posologo te nai wai ge te giligago ulai. Tama te nai wai sele meniama, tama tigidali sasia pelama, tama isali. 7 Tama meba te tedelawali nai wai ge te sesane yai bono elalubo madi tomoba tudulaluali. Tama te sesane yai bono elalubo madi tomodu te nai wai ge holali digi, te sesani yai bonogo haluama, tama te nai isilali. 8 Tiali goli te telala pali nai wai ge me badu te wiegi yai tǫba tudulaluali, tama te nai du walali. Meba te 100, tama me badugo te 60 walali, tama me badugo 30 tama waliyu yai,” wali.

9 “Duga po odobo olo elalubo bidigo da, te po bugagia odiąo,” Jisasgo te po wai.

10 Te Jisas aga wali pabo bidi dabe aga pageba aselama, te po wai, “Magi baso nago po digi po begelama augwalibolo obawe?”

11 Agai po wei ponoyu te po wai, “Godigo agai we bidi tonalubo sę geme dualaluali po page haninama te agai dagebolo ola mawai dao. Tiali goli e bidi dabebolo te geme dualali po page te haninai menio. 12 Magi baso menio. Bidi me deligo nai meba elalubaso da, teda Godigo agabolo te nai umabo mayu, tama aga nai hauwa elaluaibao. Tama bidi me deligo te dwasianu nai naga elalubaso da, teda Godigo te dwasianu nai dagala sąwaibao. 13 Tama tebo sęde eno te po digi po begelama augwalibolo obao: augwaligo gedugo da tonono bilibadi, tiali goli augwaligo magi nai me deli subo menio. Augwaligo olo mubadi, tiali goli augwaligo po me odisąyu tama kolesaga sabeo. 14 Te tiwai sę ebo we bidi augwalide te po me deli te Godigo po pusali profet bidi Aisaiago wali po te usu nanio. Agai te Godigo wali po asęai dao:

15 Magi baso meni. E we bidi hanigo homu kolesaga te puna pai dao. Tama augwaligo ologo po odobo te hagela eyu, tama augwaligo augwa gedu palia sai. Tiyu augwaligo gedugo te magi nai me deli suidali weyu tiali, tama augwaligo ologo po odidali weyu tiali, tama augwaligo homude te po page ma koneama, tama augwali begesa enaba ma aselama, te eno augwali usu ma ilidali weyu augwaligo tama kolesaga yai dao,’ *Ais 6:9-10

Aisaiago Godigo wali po augwalide tama asęai dao. 16 Tiali goli dage da, te wiegi yai homu pemene yao. Magi baso meni. Dagego gedugo te nai dabe te subo dao, tama dagego ologo po odobo dao. 17 Eno mu po dagebolo obao, polobadu te Godigo po pusali bidi hauwa dabego me, te doloba pai bidi hauwa augwaligo me te megi dagego te subo sę suainogo godolo yai, tiali goli augwaligo me subeo. Tama augwaligo me megi dagego te odobo po odainogo godolo yai, tiali goli augwaligo te po me odai menio,” Jisasgo te po wai. *Luk 10:23-24

18 “Te megi da dagego te bidigo nai wai ge te giba tededalo bilagasali po digi po page odiąo, bugagia koneao. 19 Te Godigo we bidi tonalubo kolesagade po wabo odobo digi te po page koneyu dąų wasiąwai bidi, te bidi te aga da te soabo tųba olo tudulaluali nai wai ge tiwai dao. Tama te Satan agaba aselama, tama polo te po Godigo aga homuba budali po te Satango te dagala sabo dao. 20 Tama te gi page bidigo te telala biligi pali nai wai ge meba te masigi elalubo madigi tudulaluali po wali da, te tiwai te bidigo te po odama tama polo selama, tama te pode wiegi yai homu pemene ebo. 21 Tiali goli aga da te sele meni yai nai tiwai dao. Tama tibaso, aga homu daide naga te odali po te dwasianu sogo naga elaluaibao. Tama nosali bidi mebago te Godigo po aiyaba elaluabo homu eyu da, teda te bidibolo augwaligo sęgę menama, tama dwai kolesaga agabolo eyu, tama agai konealubo po dąų wali te polo tagalama, tama tulalubo dao. 22 Tama meba te tedela palali nai wai ge te sesani yai bono elalubo madi tomoba tudulaluali, te bidigo po sabo tiwai yali, tiali goli agai homu hauwa te tǫde naiba pelama, tama agai mone dabe te doado bage hauwa sabobo homu hauwa yali, tama te homu ebogo te Godigo po mesegelama, tama agai nai ge walobeo. 23 Tiali goli te tedela palali nai wai ge te wiegi yai ili yai elalubo tǫba tudulaluali po wali da, te bidigo po odama tama te po page bugagia koneani dao. Te tobage we bidi augwaligo nai ge walaibao, te 100, ma 60, ma 30 tama walobo dao,” Jisasgo te po wai.

24 Te Jisasgo gasa po digi po begelama, augwalibolo te po wai, “Te Godigo we bidi tonalubo sę e tiwai dao. Te bidi me deligo aga wiegi yai nai wit wai ge te aga giba telala bilali. 25 Tama elama, tama me sogo hulide we bidi augwali godege piai digi yaide, te bidi aga boi bidi aselama, tama agai te nai wai telawali wit gi tomoba te dwai noswai wai ge sąsą bilagaselama, tama aga paialio. 26 Tama nosali te wit holama, tama nai ge walainogo ebadi, tama augwaligo te nai wai telawali gide te dwai noswai dali holobo suai. 27 Tama te gide sę ebo bidi dabe pelama, te gi aga ayabolo wagi peyu, augwaligo te po wai, ‘Genuai bidi, dago homugo nago gide wiegi yai nai wai ge naga tedelalo bilali homu yai dao. Tama magi ilama te tiwai dwai noswai dali pedalaliwe?’ te po wai. 28 Tama agai te sę bidi dabe augwalibolo te po wai, ‘Te boi bidi me deligo te tiwai sę yali dao.’ Tama te sę ebo bidi dabego agabolo te po wali, ‘Tama tibaso, nago homugo usu wida, teda da pelama, te dwai noswai gudama, sisinigi pabo te usu yaibawe?’ 29 Tiali goli, agai augwalibolo te po wai, ‘Mu menio. Tiyu dagego te dwai noswai gudama sisinibo sę eyu, dagego te wit dali gudabuo,’ te po wai. 30 ‘Dagego te si dali si holomainao, te si holama, tama te nai sabo sogode te usu naibao. Tama te nai sabo sogo eno te nai togwa sabo sę ebo bidi augwalibolo te po waibao, “Dagego te dwai noswai bolo hasia sisinama, tama dunama, siade ulainogo kęnama muao. Tiali goli, dagego te wit da, te te sisinama te eno nai mubo beba muao,” eno te po waibao,’ te bidigo te po wali,” Jisasgo te po wai.

31 Te Jisasgo gasa po digi po begelama, augwalibolo te po wai, “Te Godigo we bidi tonalubo sę te nai wai me deli tiwai, te nai mastet wai tiwai dao. Bidi me deligo te nai wai selama, aga gide bulubo dao. 32 Te nai mastet wai ge da, te kemeni ge tiwai sabi si dwasianunu mu dao. Tiali goli nosali te nai ge genuai hola silama, agai te gide holali haniani nai tigidali te aiyaba elalubo dao. Te ni tiwai holama, tama te ni nologoba te ba dabe duayagasobo dao,” wali.

33 Tama agai gasa po digi po me ma begelama, te po augwalibolo wai, “Te Godigo we bidi tonalubo sę te bret bo dabo nai yis tiwai dao. Te we me deligo te dwasianu yis selama, tama te genuai dramde munalubo tubo plaua dali taluama begelaibao. Tama nosali te plaua tigidali te bo dai subo dao,” Jisasgo te po wai.

34 Te ola mabo po tigidali tama odubadi, Jisasgo te we bidi augwalibolo te po digi po begelama naga wai. Agai te po me deli haninama augwalibolo me pusubeo. Menio. Agai po digi po begelama naga augwalibolo te po wai dao, 35 te Godigo po pusali bidi profet me deligo pedauwalide pusali po usu numainogo. Te profet bidi agai polobadu te po wai,

36 Te sogo Jisasgo te we bidi augwali tagalama, tama aga te be tomoba pelama bidai. Tama aga wali pabo bidi dabe augwali agaba aselama, te po wai, “Nago te dwai noswai te gide pedalobo po olama po digi po begelama wali po page te dabolo haninama ola mao,” te po wai.

37 Te Jisasgo po wei ponoyu te po wai, “Te wiegi yai nai ge telala pali bidi po wali da, te bidi da te ena dao, Godigo Bidi Mu dao. 38 Tama te nai ge tedelalo pali gi da, te e tǫ dao. Tama te wiegi yai nai ge da, te Godigo obo tomode bidibo we bidi dao. Tama dwai noswai da, te Satango we bidi dabe dao. 39 Te boi bidigo dwai noswai ge tedela bilagasali, te bidi da Satan dao. Te nai sabo sogo bodolu wali, te e tǫ silabo sogo dao. Te gi nai sabo bidi dabe augwali da, te Godigo sę ebo ensel mobo bidi dabe naga dao. 40 Te gi sę ebo bidi dabe augwaligo dwai noswai sisinama siade ulubo, te tiwai naga augwaligo e tǫ silibo sogo muani bodolude te tiwai yaibao. 41 Te Godigo Bidi Mu agai aga sę ebo ensel mobo bidi dabe tagala palama, tama augwaligo te Godigo tonalubo we bidi tomode elalubo dwai dwai sę ilabo kolesaga me, te haniani gasa dwai sę ebo we bidi me, augwali tigidali sisinama 42 tama augwaligo te we bidi dabe augwali te moni tigi dene ebo siaba sąwaibao. Tama te siade te augwali dwai gela mu weyu, tama augwa kele gąųgo halua tuyu bidaibao. 43 Tama te sogo te doloba pai we bidi augwali augwa Ayago we bidi tonalubo madide bidiyu, tama augwali tigide te giliga ula tiwai eyu bidaibao. Odo elalubo bidi dabego te po bugagia odiąo,” Jisasgo te po wai.

44 “Te Godigo obo tomode bidibo kolesaga te wiegi yai mu dao, te gide geme dualaluali dila pai nai mu tiwai dao. Bidi mego te nai subaso, tama agai ma dualali. Agai wiegi yai homu pemene yai, tama aga pelama, aga doado bage tigidali te bidi dabebolo menama, mone selama, tama te gi tǫ abelegi paibao, te aga suali dila pai nai somainogo,” Jisasgo te po wai.

45 “Te po me e dao. Te Godigo obo tomode bidibo kolesaga te wiegi yai mu dao, e tiwai dao. Bidi me deligo aga mone sabo bisnis sę eyu, te wiegi yai bis gegi bilibo dao. 46 Agai te bis wiegi wiegi yai mu me deli subaso, te bis gasa bis tigidali aiyaba elalubaso, teda aga pelama, te aga doado bage tigidalide te mone sigi pelama, tama te wiegi yai bis abelegi paibao,” Jisasgo te po wai.

47 “Ma, te Godigo we bidi tonalubo sę e tiwai dao. Bidi dabe augwaligo te sųgų sainu te genuai sųgų sabo wa te sigi ąįba sąnama, tama haniani sųgų te wa tomoba pabo te tiwai dao. 48 Tama te sųgų sabo wa pągą baso, teda augwaligo te wa kegasa te ąį saniba tuagasobo dao. Tama augwali dualama, te wiegi yai sųgų naga te genuai pede mebaba sisinaibao. Tiali goli te dwai sųgų dabe da, te augwaligo te sela sąbo dao. 49 Tama e tǫ de dagalu si silibo sogo te tiwai gilama naga yaibao. Te Godigo sę ebo ensel mobo bidi dabe augwali aselama, te dwai kolesaga yali bidi dabe te doloba pai bidi dabe tomode bidibo te dagalama, sela sąwaibao. 50 Tama augwaligo augwali te genuai tigi dene yabo siaba sąwaibao. Tama te siade augwali dwai gela weyu, tama augwa kele gąųgo ma halua tueibao,” Jisasgo te po wai.

51 Te Jisasgo augwalibolo hanalu wali, “Te eno megi pusali po page tigidali dagego koneaniwe?” Tama augwaligo agabolo te po wai, “Awe.” 52 Agai augwalibolo te po wali, “Awe, te Juda dabego polobadu bomo yai po page koneani bidi aga te Godigo we bidi tonalubo kolesaga tede te po te skul wai tiwai pedalobaso da, teda agai te Godigo polobadu wali po me, te megi elalubo gesi wiegi yai po dali, te po si aga homude elaluaibao. Tama te dwagi yai po hauwago agai gasa we bidi ola mabo usu mu yaibao,” Jisasgo te po wai.

53 Jisasgo te po digi po wali te po dabe ola silama, tama agai te bulu tagalama pai. 54 Tama aga page buluba pali, tama Godigo po agai te augwa bomo yai po odobo be tomode ola mawai. Tama augwali noma mu siyu, te po augwa hasi wai, “Te kolesaga koneani, me te bomai sę tigidali, te bidi agai magi ilama te tigidali kolesaga saliwe? 55 Te bidi da te kamda bidigo ogwa naga dao. Aga ida nogi Maria dao. Agai ama dabe te Jems, me Josep, me Saimon, me Judas, te augwali dao. 56 Agai abe dabe tigidali da dali bidibao. Te kolesaga koneani me te bomai sę tigidali agai magi ilama saliwe?” 57 Augwaligo te po olama, tama augwaligo aga dali dwai homu yai. Tiali goli Jisasgo augwalibolo te po wai, “Te Godigo po pusubo bidi profet agai nogi te tigidali bulude elalubo dao. Tiali goli aga page bulude me, aga bede me, te aga nogi meni yai elalubo dao,” te po wai. 58 Augwaligo agade konealubo po dąų wasiąbaso, agai bomai sę hauwa te aga page bulude ebeo.