1 Te Genuai Bidigo te Moses dali te bulu du Sainaide po wali sogo, te Aron de Moses sigo wai puluba e tama elaluali. 2 Arongo te ogwa me si me si tama elaluali. Agai te gomunai ogwa te Nadap dao, te tudi badu Abihu, te tudi badu te Eleasar, te tudi badu te Itamar dao. *Nam 26:60 3 Mosesgo augwaligo tobolude wel gelama, tama augwali te pris bidi naga nigilali. 4 Tiali goli, augwali te nai meni yai bulu Sainaide bidiyu, te Nadap de Abihu augwali sigo te wiegi yai denami ebo hano holobo nai selama, tama Genuai Bidibolo te ofa tiwai mani. Te Genuai Bidi agai mao po wasiąbadi, tama tibaso Genuai Bidigo augwali si elama isilali. Tama augwali sigo wai bǫų dabe meni yai dao. Tialima, te Eleasar de Itamar sigo naga te pris sę yai dao, te Aron augwa aya bidibadi. *Prs 10:1-2; Nam 26:61

5 Te Genuai Bidigo Mosesbolo e tama po walali, 6 “Te Livai dabego hani odasa aselama, tama augwali te pris Arongo sę bidi tiwai sa muao. 7 Augwali eno name ugwa bede sę eyu, me pris dabe tau sabo sę eyu, me te we bidi tau sabo sę eyu emainao. 8 Augwaligo eno name ugwa lotu bede doado bage dabe bugagia tonaluyu emainao. Te eno Israel dabebolo emainu wali tiwai. 9 Te Livai dabe augwaligo te sę deli naga dao. Augwali te Aron dali aga ogwa dabego sę tigidali sogo emainao. 10 Nago te Aron me aga ogwa dabe augwaligo naga te pris sę emainogo sa muao. Tiali te gasa bidi dabego me te pris sę yainogo ebaso da, teda dagego aga ela muiąo,” wali.

11 Tama Genuai Bidigo Moses e tama tiwai po walali, 12-13 “Megi eno te Livai hani te ena hani mu tiwai sa megi mubao. Te eno te Isip dabego gomunai ogwa dabe ela muani sogo, eno te dagego gomunai wai dabe me, te bulmakau sipsip meme dabego gomunai wai dabe me, eno sa muai dao. Tama augwali sese ena mu dao po wai dao. Tiali goli, megi da, eno te gomunai ogomani dabe me sogobeo. Menio. Te Livai dabego augwali hasegelali, tama te Livai dabe te ena mu dao. Ena Genuai Bidi, eno po polo wali.” *Sai 13:2

14 Te nai meni yai bulu Sainaide Godigo Mosesbolo te po wai, 15 “Te Livai dabe nedama, tama augwa we wai tali tali augwa hanide lista nigao,” po wali. “Tama nago te augwaligo ogwa wai dabe te polua deli polo yai waide gagalasa, tama tigidali ogwa me bidi dabego nogi me sao,” te po wali. 16 Tama te Mosesgo te Genuai Bidigo wali po selama, tama tiwai yali. 17 Te Livaigo ogwa sela elaluali. Te Gerson, me Kohat, me Merari, tama dao. 18 Te Gersongo ogomani nogi te e tama dao, te Lipni me Simei dao. 19 Te Kohatgo ogomani nogi e tama dao, te Amram, me Ishar, me Hebron, me Usiel, tama dao. 20 Te Merarigo ogomani nogi da e tama dao, te Mali me Musi si dao.

Te Livai dabego hani wąį nogi te e tobage nogi elaluali. 21 Gersongo hanigo bidi hani te si digi tama elaluali, te Lipni me Simei hani. 22 Augwaligo te bidi dabe dali te ogwa dabe te polua deli polo yai wai dabede gagalasa nedama, tama te namba te 7,500 tama elaluali. 23 Te hani wąįgo be dabe te name ugwa lotu be tudi badude te giliga pabo badu elalumainao, te Godigo be elalubo tǫ sesegede. 24 Tama Eliasap, te Laelgo ogwa, te hanigo tobolu bidi dao. 25 Augwaligo te Godigo ugwa be tonalubo sę elaluyu, me te name be ugwadu halubo nai dabe tonalubo sę elaluali, me te sunumi palibo name ugwa me tonaluyu, 26 me te alta sai, me te ugwa be bagulubo name ugwa dabe tonalubo sę eyu, me te name ugwa obo sunumi palibo name ugwa tonaluyu yali. Augwaligo te nai dabe tonalubo sę naga elaluali.

27 Te Kohat hani wai dabe te me si me si elaluali. Augwali te Amram, me Ishar, me Hebron, me Usiel tama. 28 Te augwaligo bidi dabe dali te ogwa dabe te polua deli polo yai wai dabede gagalasa, ugwaba iguluyu nedama, te 8,300 tama elaluali. *Te Hibru pogo te po wali, 8,600 bidi. Tiali goli, te bidi mebago te Grik pode begelai, tama augwaligo te 8,300 tama asęani. Te tonobo te 8,300 te dolo tama yali. Magi baso meni, te ves 39de te po wali te bidi dabe namba te 22,000 tama wali. Ma, dago te 8,600 ede muyu da, teda te tigidali bidi namba te 22,300 tama yaibao, tama te usugobeo, te dolo si menio. 29 Te hani augwali te name ugwa be te saut badu augwaligo name ugwa be nani elama bidaluyu emainao. 30 Tama augwaligo tobolu bidi te Usielgo ogwa Elisafan dao. 31 Augwaligo Godigo Dąų Wali Bomai Po Munalubo Halobage me, tebol sai me, lam tolalubo nai me, alta si me, genuai pou me, plet dabe te pris bidi dabego te habu selai te habu badu me, te habu selai te be habu palibo name ugwa me, tama tonalubo sę ebo dao. 32 Te pris bidi Arongo ogwa Eleasar te tigidali Livai dabego tobolu bidi dao. Agai te bidi dabe te Godigo be tomode sę ebo bidi dabe tonalubo dao.

33 Te Merari hanigo aga hani si elaluali. Te augwali te Mali dabe me Musi dabe, tama dao. 34 Augwaligo bidi dabe dali te wai ogwa dabe te polua deli polo yai ma ugwaba igulali ogwa dabe me te namba te 6,200 tama usu nani. 35 Te Abihailgo ogwa Suriel te augwaligo tobolu bidi dao. Tiali tama, te hani augwaligo name ugwa be nani te Godigo ugwa be te not badu augwaligo be nani emainao. 36 Augwaligo te ugwa bego dili tonalubo sę elaluali. Augwaligo te be ni pos, me te pos ni tulubo halobage tonalubo sę eyu, me te pos ni tuabo te bobobage ni dabe me, te meba te be dili tolalubo doado bage dabe me tonalubo sę ebo dao. Tama augwaligo te nai dabe naga tonalubo sę emainao. 37 Te me augwaligo te ugwa be mesalo bagulubo obo pos ni dabe, me te pos ni tulubo te halobage dabe me tonalubo sę emainao. Me te brasgo nigai bobobage nil dabe, me te baklain bono me tonalubo sę emainao, te name ugwa be bomo elama kegaluabo.

38 Moses me Aron si augwa wai puluba dabe dali augwaligo be Godigo name ugwa be gedu dolo mu dodolama muani, te giliga asobo badu. Te hani augwali deli naga te habu selalubo te be habuba pelama, tama augwaligo te haniani sę eyu, me te we bidi tau sabo ofa nai mayu yali. Ma, te sę gasa hani mebago ebaso da, teda Israel dabe augwaligo aga ela isilimainao.

39 Te Livai hani bidigo namba te 22,000 bidi dabe tama usu nama elaluali. Augwaligo tigidali bidi dabe me, tigidali ogwa dabe me, te tigidali ogwa wai dabe te polua deli polo yai gagalasa, ugwaba igulali te genuai ogwa bidiba usu nani, te me augwaligo nedali.

40 Tama Genuai Bidigo Mosesbolo walali, “Te dage Israel dabego gomunai ogwa dabe te tigidali te eno naga dao. Tama tibaso, nago te tigidali gomunai ogwa dabe nogi sao, augwali polua deli polo yai dabede gagalasa, tama te genuai ogwa bidiba usu nama pao. 41 Tiali goli, eno te bage hasegelama, tama te bidi dabe bidimainu sula tagaliyu, tama eno te Livai dabe naga saibao. Te Genuai Bidi ena hani tiwai mu yaibao. Te me ma, te Livai dabego gomunai kau kibu omai dabe eno siyu, te we bidigo gomunai kau kibu omai dabe tagalaibao. Ena da, ena Genuai Bidi dao,” wali.

42 Tama Mosesgo Genuai Bidigo po wali peyu, te te Israel dabede tigidali gomunai bidi dabe dali, te ogomani dali, 43 te polua deli edelai ogwa dabe me nedali, te 22,273 tama elaluali.

44 Tama Genuai Bidigo Mosesbolo ma weyu e tama po wali, 45 “Megi da, nago te Livai dabe tigidali enabolo mao, te Israel dabego gomunai bidi dabe ogomani hasegeleyu, tama te Livai dabe te eno hani mu bidaibao. Tama augwaligo kau kibu ena mayu, tama augwaligo te Israel dabego gomunai kau kibu hasegelaibao. 46 Te Israel dabego gomunai bidi dabego te Livai dabe te 273 nambago augwali edelali, tama tibaso dagego te bidi dabe ma abela sao, te 273 bidi dabe. 47 Nago te silva mone ge a naga, a naga, tama sesa pao, te augwaligo deli deli bidi dabede, te augwali ma abelama siyu yao. 48 Tama te mone te Araon aga ogomani dali augwalibolo mao,” te po wai.

49-51 Tialima, Mosesgo Genuai Bidigo te sę yao wali po wali peyu, te deli deli ogwa dabede te mone siyu, te 13,650 kina selama, tama te mone te Aron me aga ogwa dabe augwalibolo te mone mani.