1 Genuai Bidigo Mosesbolo walali, 2 “Nago Aronbolo walao, te agai te 7 lam sole te lam tolalubo naiba mubo sogo da, te Tedali Gasagi Yai Be Habude mubo sogo, agai augwali bugagia mumainao, tama te be habu tomoba te sole ula emainao,” wali.

3 Tama Arongo Genuai Bidigo po wali pelama, tama agai te lam sole dabe te lam tolalubo naigo nogo dabede mumuna pali, tama te sole ula te Tedali Gasagi Yai Be Habuba ula yali. 4 Polobadu te nai nigali sogo, augwaligo gol meba selama, tama hamago te lam sole tolalubo nai sese nigainogo elali, tama agai pagede gagalama, agai nogo me aga au me te ni plaua dabe tiwai yali. Augwaligo te Genuai Bidigo Mosesbolo ola mani piksa tiwai tama nigali. *Sai 25:31-40; 37:17-24

5 Tama Genuai Bidigo Mosesbolo po geninama weyu, e tiwai po walali, 6 “Nago te Livai dabe naga te Israel hanide dįą siyu i olama, tama eno gedude wiegi yai ilao. Te augwali i olama, tiao. 7 Nago e tama tiao: te bidi dabe eno gedude wiegi yai ebo ąį selama, tama augwali tigiba sąyao. Tama me augwaligo augwa tigide elalubo tigi nisi sese tama toga sąyu, me augwa ugwa wę telayu emainao. Augwaligo te tama tila silama da, teda augwali wiegi yai yaibao. 8 Tama nosali augwaligo ogwa bidi kau kibu omai deli siyu, me te oliv wel dali begelai plaua wiegi yai me siyu yao, te wit ulubo ofa yainogo. Tama augwaligo te kau kibu dali ofa emainao. Tama me augwaligo gasa kau kibu omai me somainao, te sęgę sela sąyabo ofa yainogo. 9 Tama te Livai dabe eno ugwa lotu be sesegeba odasa aselama, tama te Israel hani augwali dali deliba sisinao. 10 Tama te Livai dabe eno gedude dolalubadi da, te Israel dabe dagego augwaligo toboluba nogo muiąo. 11 Tama Arongo te Livai dabe te nogogo tola selama, iba eda ebo ofa tiwai yali gilama, nogo tola selama, eno gedude iba pogoliyu, eda kegeyu yao. Tama te ebo kolesagago te Israel dabego te Livai dabe eno sę bidi dabe pedelaibao,” wali.

12 “Tama te Livai dabego augwa nogo dabe te omai kau kibu sigo toboluba mumainao. Tama augwaligo me da te sęgę sela sąbo ofa mayu, me da augwaligo isigo sese mu ulubo ofa eyu emainao. Te ofa nai si da, te Livai dabego sęgę sese mu sela sąbo ofa dao. 13 Nago te Livai dabe enabolo te wiegi yai nai mabo tiwai yao. Te Livai dabe augwali te Aron dali aga ogwa dabego gesabidide dolalumainao. Tama Arongo te Livai dabe te nogogo tola selama, iba eda ebo ofa tiwai yali gilama, nogo tola selama, eno gedude iba pogoliyu, eda kegeyu yao. 14 Tama nago te ebo kolesagago te Livai dabe te meba Israel hanide gasagi yai me pedalomainogo magi ilama, tama ena hani mu bidaibao,” wali.

15 “Te nago augwali eno gedude wiegi yai ilama enabolo mabo si da, teda augwali eno ugwa bede sę ebo usu yaibao. 16 Eno te Israel dabe dagego gomunai ogwa dabe eno hasegelama, tama eno te Livai dabe eno sai dao. Tama te Livai dabe te eno mu dao. 17 Odao. Dage Israel dabego gomunai ogwa dabe, me sipsip, meme, bulmakau kibu dabego gomunai wai dabe me, eno mu dao. Augwali eno te Isip dabego gomunai wai dabe elali sogo, eno dagego ogwa dabe me sipsip kibugo hasia wai dabe eno sa muai dao. *Sai 13:2 18 Tama tialima, megi da, eno te Livai dabe sobao, te Israel dabe dagego gomunai ogwa dabe hasegelama salio. 19 Tama eno te Livai hani te Aron aga ogwa dabe augwalibolo olo mobao, te wiegi yai olo mabo tiwai ebao, augwaligo te Israel dabe dagebolo eno ugwa be tomode yao wali sę emainu ebao. Tama tialima, augwaligo dage hasegelalio. Tama dage te habu selai be habuba dage me peyu egobeo. Tiyu, dage pąba pabo digi eno dage dolidali weyu,” te po wai.

20 Tama te Moses, me Aron, me Israel we bidi augwaligo te po wali peyu, te Livai dabe te Genuai Bidigo hani pedalumainu sa muani. 21 Te Livai dabego te Godigo gedude wiegi yai pedalobo kolesaga wali pelama, tama augwa ugwa dabe wę telawali. Tama Arongo te nogo tulama mabo ofa tiwai elama, nogo tulama, tama Genuai Bidigo gesabidide iba eda hoga yali. Tama agai augwaligo sęgę sela sąyabo ofa yali, te augwali wiegi yai pedalaibao. 22 Te we bidigo Genuai Bidigo Mosesbolo walali po wali pelama, te Livai dabebolo tigidali sę tama yali. Tama tibaso, te Livai dabego Godigo ugwa be tomode sę yabo usu yali. Tama Aron aga ogwa dali augwaligo augwali tonaluali. 23 Tama Genuai Bidigo Mosesbolo e tiwai po wali, 24 “Te Livai dabe augwali te kibu be 25 yai bagego eno ugwa bede sę emainao. 25 Augwaligo te sę ela pidubadi, augwa te kibu be 50 tama usu nama te sę emainao. 26 Te sę elama, nosali augwaligo te sę ma tulamuo. Tiali goli, augwaligo augwa deli sę ebo bidi tau siyu digi emainao, te name ugwa be tomode. Nago te po te Livai dabebolo menama, tama augwaligo te tama timainao,” Genuai Bidigo Mosesbolo te po wai.