Polgo Pas Filemonba Asęani
Hasia nedebo tau sabo po
Te me sogo Pol kalabus tomode bidibadi tama aga te kalabusde bidali gasa bidi nogi Onesimus suali. Te Onesimus polobadu te Kolosi moni hanude bidama, tama aga te bidi Filemon aga masigi sisąbo olo sę ebo bidi bidali. Tiali goli aga wi peyu, tama gasaba pelama, te Pol kalabus bidibo digi sabolali. Tama Polgo agabolo Kraisgo po pusa menama, tama Onesimus aga homu hasegelama, te aga yali dwai sę tudiba munama, te Kraisgo po wali pabo bidi pedalali. Tama Polgo Onesimus te aga tonalubo bidi Filemon tebolo ma tagala palainogo eyu, tama agai e pas asęyu tama Onesimusgo nogoba muani. Agai homugo te Filemon agai Onesimus dali sębę esiąyu tama aga bugagia sao wali. Tama Pol nosali te Filemon bidibo digi asaibao, te po me asęna tolali.
Filemongo olo sę ebo bidi wi pali, tama nosali aga Godigo po wali pabo bidi pedelai, tama Polgo te bidi aga te Filemon bidibo digi ma tagala palali po
1
Ena Pol da. Tama eno we bidibolo Krais Jisasde po weyu, tama augwali mebago hagela eyu, tama augwaligo ena kalabus beba muani. Tama ena te kalabus bede bidibadi, te ena dali, dago abagi Timoti dali, da sigo e pas asęnama, Filemon nagebolo tolobao. Nage dago dwagi yai abagi mu, da dali deli sę ebo bidi dao. Tama da sigo e po te we Apiabolo me, te bidi Arkipusbolo me asęai. Tama Arkipus agai te we bidi tau sabo sęde te aga bomo eyu te tau sabo sę ebo dao, ami bidigo bomo eyu hwįbo te tiwai ebo dao. Tama da sigo nago beba sisinibo Godigo po wali pabo we bidibolo me e po asębao. * Kol 4:17
Eno homugo dago Aya God dali, te Genuai Bidi Jisas Krais dali, augwali sigo dage olo tau sabo kolesaga te homu dage dali bidimainao, dage dwagi yai homu eyu bidimainogo hagede.
Filemon agai dwagi yai kolesaga ebo dao
Eno abagi Filemon, eno Godibolo eno gedu haluasa po weyu, eno nago nogi wabo si, sesemane sogo eno Godibolo buba hwi wabo dao. Magi basowe? Sesemane sogo eno odali augwaligo nagede po weyu, nago te Genuai Bidi Jisasbolo dwagi yai homu eyu, tama nago konealubo po agade dąų wai. Tama tiyu nago Godigo we bidi tigidalibolo dwagi yai homu eyu, tau sabo dao, te po me eno odali. Tama eno Godibolo gedu haluasa po weyu, eno te homu ebo dao: da dena homu Jisasba muyu, te da nage dali wadolobo dao. Tama tiyu, eno homugo dago Jisasde konealubo po dąų wabo kolesaga ebogo nage ola momainao. Tama ola menama, tama God agai da Jisasde wadolali we bidi da dali yabo dwagi yai sę page nago gisiga mu koneaibao. Te homu eyu, eno Godibolo hanalu wabo dao. Eno dwagi yai ama, Godigo we bidi tigidali nago augwali dali dwagi yai homu eyu, godolo mu ebo dao. Tama tiyu, nago te kolesaga eyu, augwaligo homu pua peyu, dwagi yai ilai. Tama te kolesaga ebode ena dwagi yai homu elama, tama eno moni homu me esiąyu, te eno homu dwagi yai elama bidibao.
Filemon agai Onesimus te aga ama ma oda sabo tiwai yao
Te nago te we bidi tau sabo sę ebaso, eno te homu elalubo dao: Te Kraisgo nogi te bomode eno te po bomo elama, nagebolo weyu te nage wiegi yai doloba pai kolesaga me yainogo wagi sogo da, tama tiyu eno po nago wali pigi dao. Tiali goli eno homugo nago te kolesaga emainogo te eno nagebolo te bomo elalubo po wagobeo. Menio. Dago dena hasi wiegi yai homu eyu godolo ebo homu eyu, tama da deliba wadolama bidibao. Tama tiyu, eno nage dali po bomo elama wabo homu eno egobeo, te eno duadigi nage dali hanaluyu te po obao. Ena Pol, ena da Godigo po sela pabo bidi dao, tama Krais Jisas tobade augwaligo ena kalabus beba munama, megi tede bidibao. Tama ena te Pol, tiali digi, eno nagebolo te po bomo elama wagobeo. 10 Tama tibaso, “Abagi aga tau saibao,” homu eyu, eno te bidi Onesimus tobade megi nage dali eno hanalu obao. Tama ena te kalabus bede bidibadi, te bidi Onesimus aga me te kalabus bede bidai. Eno agabolo Godigo po pusulama, tama Onesimus agai te po bugagia odama, aga homu begelama, tama aga Godigo hani bidi pedalali. Tama tibaso, megi aga da eno ogwa tiwai dao. * Kol 4:9 11 Tama polobadu Onesimus aga nage dali bidali sogo aga nago olo sę ebo bidi bidiyu, tama aga hagela eyu, tama aga nage tau sisąbo bidi bidai. Tiali goli megi da, aga nage dali ena dali tau sabo bidi mu bidaibao.
12 Te eno te bidi Onesimus dali dwagi yai homu eyu godolo mu ebo digi, megi eno aga nage pageba ma tagala palobao. 13 Tama eno homugo agai ena tau somainogo aga ede ena dali bidimainao, homu yali. Eno Godigo gesi dwagi yai po te we bidibolo pusubaso, augwaligo ena e kalabus beba muani. Tama ena ede bidibadi nage digibulu bidiyu, nago ena tau sabo usu sąbaso, eno homugo Onesimus aga e hanude bidiyu agai ena tau somaina homu yali. 14 Tiali goli nago te usu da po wasiąbaso da, te eno aga ede bidao wagobeo. Eno nage dali bomo egobeo. Menio. Eno homugo nago dwagi yai sę eyu, nago homugo Onesimus agai ena tau siyu ede bidiyu bidimainogo homu eyu da, nago te homu usu eyu da, te aga ede bidiyu ena tau saibao.
15 Te Onesimus wi peyu, agai nage tagalama, osogo eba bidagasai. Magi basowe? Nago aga ma siyu, tama aga nage dali mu bidaibao, eno te homu ebao. 16 Tama megi aga te olo sę ebo bidi naga ma egobeo. Menio. Da bidi sela Genuai Bidi Jisasde wadolobaso, te bidi Onesimus aga da te da sigo ama mu dao. Tama megi aga dago ama mu gagawali, dago dwagi yai homu aga dali ebo dao. Te eno digi aga dali te eno ama mu te homu eyu, aga dali wiegi yai homu ebo dao. Me ma, nago eno ebo homu aiyaba elaluyu, tama nago te homu eyu, aga nago sę ebo bidi bidiyu, te me nago ama dao, tama nago aga dali dwagi yai homu elama, godolo mu yao.
17 Te nago homugo ena te Kraisgo sęde age name si ebo tiwai homu eyu da, te aga nage pageba ma asobo si, te nago Onesimus bugagia ma sao, te nago ena dali wiegi yai homu ebo gilama te nago Onesimus dali me wiegi yai homu eyu aga ma sao. 18 Tama agai nage dali dwai sę me elama, tama agai nage dali negeli elaluyu da, teda nago agai te negeli ilali hasegelama, eno nogi tede muao. 19 Ena Pol, ena digi eno e po eno nogogo asęai, ena digi eno te Onesimusgo negeli ma wei ponaibao. Tama eno nagebolo Godigo po polobadu ola magi menigi sogo da, teda te sęde nago ena dali genuai negeli elalugi menigi da. Tiali goli megi eno te genuai negelide po wagobeo. 20 Eno ama, te Genuai Bidi Jisasgo nogi tobade nago enabolo te wiegi yai homu nagame ilao. Tama da si te Krais agai sę ebo bidi bidai, tama tiyu nago te ebo dwagi yai kolesaga te Onesimusde eyu, te nago eno homu wiegi yai pua pomainogo tama tiao.
21 Eno te homu bomo ebogo da, te nago eno te po wali pabo homu ebao. Tama tiyu eno nago Onesimus tau sao po nagebolo asęna tolobao. Eno koneani, nago yabo te kolesagago megi eno nagebolo te yao wabo kolesaga te aiyaba elaluama, tama nago te Onesimus dali nosali ebo kolesaga te wiegi yai mu yaibao. 22 Tama tiyu, eno po me deli elalubao. Te eno homugo dagego gedu haluasa po wabo te Godigo odabo homu yaibao. Tama tiyu, agai ena dagebolo ma maiabo homu yaibao. Tama tibaso, ena nage dali bidabo be tomode dąį togwali te ena bidabo digi sisi elama elaluao.
23-24 Te bidi Epafras aga ena dali e kalabus bede bidibao. Da sigo Krais Jisasgo sę ebaso, augwaligo da si kalabus beba muani. Tama Epafras dali, Mak dali, Aristarkus dali, te Demas dali, te Luk dali, te bidi tigidali augwaligo ena dali Kraisgo sę ebo bidi dabe dao. Tama tiyu, augwaligo nagebolo nage tao po obao. * Tpi 12:12, 25; 13:13; 15:37-39; 19:29; 27:2; Kol 4:10
25 Eno homugo te dago Genuai Bidi Jisas Krais agai we bidi olo mu tau sabo kolesaga dage tigidalide bidimainao. Tama dao.

*1:2: Kol 4:17

*1:10: Kol 4:9

*1:23-24: Tpi 12:12, 25; 13:13; 15:37-39; 19:29; 27:2; Kol 4:10