1 Eno ama dedeo, te Krais e tǫba ma asama, tama da dali wiegi yai sę yaibao. Tama tibaso, dage aga dali polobadu wadolama tama megi bomo elama dolaluiąo. Eno dage dali wiegi yai homu mu pemene ebo dao, tama eno dagede homugo ma kone palobo si eno homu dene ebo dao. Dagego ena homu dwagi yai ilibo dao. Dage da, te eno bulali nai du walali tiwai dao.

2 Yuodia dali Sintike, te we dage sigo odao: dage si Krais dali wadolama, tama ama name si tiwai bidiyu, homu deli naga yao. Dage si tama naga tiao. 3 Tama nage me, nage ena dali homugo kęą pai bidi, ena dali deli sę ebo bidi dao, eno nagebolo e po obao, te we si augwaligo deli homu naga emainogo nago augwali tau sao. Eno Godigo po pusubo sę ebadi, augwali sigo tigi dene sę eyu, ena tau sali. Te bidi Klemen dali, gasa ena dali deli sę ebo bidi dabe dali, augwaligo te we si dali sę yali dao. Tama augwali tigidaligo nogi te Godigo bukude asęna elalubo dao, te bidibo ula sali bagego nogi asęani bukude.

4 Eno homugo dage te Genuai Bidi dali wadolali we bidi dage sesemane sogo dwagi yai homu pemene eyu bidao. Awe, eno te po ma obao, dagego homu dwagi yai pemene yao.

5 Dagego homu nagame ebo kolesaga tigidali sogo eyu, tama tigidali we bidi augwaligo te kolesaga sueibao. Dago Genuai Bidi ma asobo sogo pąba yagasai dao. 6 Dagego haniani naide moni homu egimio. Te menio. Te dageba pedalobo sę tigidalide dagego Godibolo tede po weyu, tama agabolo buba hwi olama, tama te dagego sǫą pabo naide aga hanalu wao. 7 Dagego tama tiyu da, teda dage Krais Jisas dali wadolama, tama aga dali hodobo bidiyu, tama Godigo dage nagamea pai homu ilibo kolesagago dage bugagia tonaluaibao, tama dage wi egobeo. Te nagamea pai homu ilibo kolesaga page te da tǫde bidibo we bidigo kuna munu me konegobeo, te agai kolesagago dago homu kolesaga aiyaba mu elalubo dao. Awe, tede dago homu kolesagago dęą sabo dao, tiali goli agai te nagamea pai homu ilibo kolesaga page me hauwa elalubao.

8 Eno ama dedeo, eno po silagasu wabo po me deli waibao. Dagego eno e nedebo kolesaga nogi selama tama augwalide naga dagego homugo bugagia kone pabalo piduao. E tobage kolesaga augwali dwagi yai dao, tama tigidali we bidigo e kolesaga ebo bidigo nogi ugwaba sabo dao. E dao: te tibo po wasiąbo kolesaga me, te wiegi yai kolesaga me, te Godigo gedude me bidigo gedude me dolo kolesaga, tama meda isąwai kolesaga dali, te abagi homu ilibo kolesaga dali, te doloba pai kolesaga dali, te dwagi yai nogi elalubo kolesaga dali, te tobage ebo kolesagade dagego homugo kone pabalu pidubadi geao. 9 Ena dage dali bidibadi eno te haniani kolesaga po dagebolo ola menama tama dagebolo mani. Tama dagego eno yali kolesaga gedugo suali. Dagego te enade tama sali kolesaga sesemane sogo iduao. Tama tiyu te dabolo nagame homu ilibo God aga dage dali bidaibao.

10 Ena te dago Genuai Bidi dali wadolama tama bidiyu, tama megi ena dwagi yai homu mu pemene ebao. Magi baso meni. Hauwa sogo silama tama dagego ena tau sabo tų ma dalama, tama dagego ena tau sabo kolesaga te ni dululi pisigalubo tiwai eyu, tama dagego mone ge enabolo tagala palali. Tama tiyu, tama dagego enade homugo konea palobo, te eno koneai. Dagego ena gegeda pabeo. Te meni. Tiali goli dage tų meni yai dao. 11 Tama tede ena nai sǫą pabo hobedagia bidibao, eno te po megi wabeo. Te meni. Eno elalubo nai, te naide ena dwagi yai homu eyu bugagia bidibo kolesaga te eno konea silai dao. 12 Ena magi nai meni yai bidi bidibo kolesaga dali, te nai hauwa elalubo kolesaga dali si eno koneai. Te eno polobadu konesiąwai kolesaga eno megi konebo dao. Tama tibaso, tigidali bulude me, tigidali sogo me, te ena dwagi yai homu eyu, bugagia bidabo ena usu yaibao. Ma, eno nai hauwa tubo sogo ma nasi ebo sogo, tama doado bage hauwa elalubo sogo, ma nai sǫą pabo sogo, te magigo menio. 13 Krais agai aga bomo ena menama, tama te bomogo eno tigidali sę ebo usu ebo dao.

14 Tiali goli, dagego ena dali hai namu si weyu, eno sęgę dagego tolai, te kolesaga dwagi yai dao. 15 Tama dage Filipai we bidi, duga digi mu koneai: te polobadu eno te Godigo gesi wiegi yai po sela pabo sę dage tomode ebo gagalali sogo, te sogo eno te Masedonia tǫ tagalama, tama gasa tǫba pali sogo, te sogo gasa Godigo po odobo we bidi hani augwaligo ena tau sabe, te dagego naga ena dali deli sę yabo homu eyu, tama enabolo mone ge menama, tama eno te mone ge sai dao. 16 Ena Tesalonaika bulude bidibadi tama eno nai sǫą pobaso, dagego ena si sela sogo tau sai dao. *Tpi 17:1; 2 Ko 11:9 17 Te dagego ena tau sabo badi, te eno dagego enabolo mani masigi gede homugo kone paluyu sabo homu ebo meni. Te meni. Eno homugo Godigo te dagego ena tau siyu duga nai dobabo dwagi yai sę ebo sulama, tama agai nosali dage wei ponaibao. 18 Dagego mani tigidali nai usu elama eno selama, ena sǫą pabo meni. Te dagego dwagi yai nai dabe te bidi Epafroditus nogoba munama, tama agai tolasa asai, te eno sai, tama megi ena pągąna pabo. Te dagego tolali nai dabe augwali da te Godibolo olo maiabo denami ebo ofa nai tiwai dao, te agai gedude te usu dao, tama agai homu dwagi yai ilibo nai dao. *Sai 29:18 19 Tama ena wali pabo God agai dage bugagia wei ponaibao. Dage Krais Jisas dali wadolama tama dagego mena nai sǫą pobaso da, teda agai umabo elalubo wiegi yai ula yai naigo dage tau siyu, tama dage me mu pągąna paibao. 20 Eno homugo da tigidaligo dena Aya Godigo bomo yai ula elalubo nogi sesemane sogo uganu sao, bidada peyu, bidada pabo sogo tama yao. Te mu tama dao.

21 Eno siade da wabo po te tede bidibo Godigo po odobo we bidi tigidalibolo wao, augwali Krais Jisasgo hani bage dao. Dago ama dabe ena dali ede bidibo bagego dage dali siade dao po olama tolobao. 22 Ede bidibo Godigo we bidi augwali tigidaligo dagebolo siade dao po ola tolobao. Meba gavman tuni bidi Sisar agai bede sę ebo bidi augwaligo te siade da wabo po bomo elama, dage dali te po wai.

23 Eno homugo dago Genuai Bidi Jisas Kraisgo olo tau sabo wiegi yai kolesaga dage dali bidao. Te tama dao.